ខេត្តបាត់ដំបង ៖ ក្នុងឱកាសពិធីបុណ្យភ្ជុំបិណ្ឌរយៈពេល០៣ថ្ងៃ ភ្ញៀវទេសចរជាតិ និងអន្តរជាតិបានសម្រុកមកលេងកម្សាន្តតាមរមណីយដ្ឋាននានា ក្នុងខេត្តបាត់ដំបង សរុបជាង២១ម៉ឺននាក់ គឺកើនឡើងជាង៤៥៦% បើប្រៀបធៀបទៅនឹងឆ្នាំទៅមិញ។ នេះបើយោងលើរបាយការណ៍បូកសរុបរបស់មន្ទីរទេចសចរណ៍ខេត្ត ដែលបានរាយការណ៍ជូនអាជ្ញាធរខេត្តបានជ្រាប។
មន្ទីរទេសចរណ៍បានឲ្យដឹងថា រយៈពេល០៣ថ្ងៃ នៃពិធីបុណ្យភ្ជុំបិណ្ឌឆ្នាំនេះ ចាប់ពីថ្ងៃទី២៤ ដល់ថ្ងៃទី២៦ ខែកញ្ញា ឆ្នាំ២០២២ ភ្ញៀវទេសចរបានសម្រុកមកលេងខេត្តបាត់ដំបងយ៉ាងច្រើនកកកុញ នៅតាមរមណីយនានា តែក៏មានរមណីយដ្ឋានមួយចំនួនស្ងាត់គ្មានភ្ញៀវចូលលេងដែរ ដោយសារមានភ្ញៀវធ្លាក់ខ្លាំងបង្កការរំខានដល់ដំណើរកម្សាន្តរបស់ភ្ញៀវ។
តាមរយៈរបាយការណ៍មន្ទីរទេសចរណ៍ បានអះអាងថា រយៈពេល០៣ថ្ងៃ នៃដំណើរកម្សាន្តរបស់ភ្ញៀវទេសចរនាឱកាសបុណ្យភ្ជុំបិណ្ឌឆ្នាំនេះ មានសរុបចំនួន២១០,១២២នាក់ កើនឡើងចំនួន ៤៥៦,០៥% បើប្រៀបធៀបឆ្នាំទៅម៉ិញមានភ្ញៀវមកកម្សាន្តនៅខេត្តបាត់ដំបង ត្រឹមតែចំនួន៣៧,៧២៤នាក់ប៉ុណ្ណោះ។ បើនិយាយពីភ្ញៀវអន្តរជាតិវិញ សម្រាប់ឱកាសបុណ្យភ្ជុំបិណ្ឌនាឆ្នាំនេះ មានរហូតដល់ទៅចំនួន៣៥៨នាក់ គឺកើនឡើង១០០% ។ នេះបើប្រៀបធៀបទៅនឹងពិធីបុណ្យភ្ជុំបិណ្ឌឆ្នាំទៅម៉ិញ។
មានការកត់សម្គាល់ផងដែរថា ភ្ញៀវទេសចរស្ទើរ២៤ខេត្ត-រាជធានី នៃព្រះរាជណាចក្រកម្ពុជា បានធ្វើដំណើរមកលេងខេត្តបាត់ដំបង ដែលជាខេត្តវ័យចំណាស់បំផុតមួយ សំបូរទៅដោយតំបន់ទេសចរណ៍ធម្មជាតិ និងតំបន់ទេសចរណ៍ប្រវត្តិសាស្ត្រ។ ក្នុងដំណើរកម្សាន្ត គេសង្កេតឃើញថា ភ្ញៀវទេសចរភាគច្រើនលើសលប់បានធ្វើដំណើរទៅកម្សាន្តនៅតាមរមណីយដ្ឋានដែលមានទឹកធ្លាក់ និងតំបន់មានប្រាសាទបុរាណ ជាពិសេស «ប្រាសាទបាណន់»។ ប៉ុន្តែនៅតាមរមណីយដ្ឋានខ្លះ ដែលមានទឹកឡើង និងហូរខ្លាំងក៏ស្ងាត់ភ្ញៀវដែរ ព្រោះមិនហ៊ានចូលលេងខ្លាចទឹកជំនន់។
មន្ត្រីទេសចរណ៍បានឲ្យដឹងថា ពេលព្រឹកភ្ញៀវបាននាំគ្នាធ្វើដំណើរភ្លូកទឹកភ្លូកដីទៅលេងនៅតំបន់ដែលមានទឹកធ្លាក់ ជាពិសេសនៅស្រុកសំឡូត។ លុះនៅពេលរសៀល ពួកគេធ្វើដំណើរត្រឡប់មកវិញ ចូលលេងតាមរមណីដ្ឋានប្រវត្តិសាស្ត្រនានា ដូចជា រមណីដ្ឋានប្រវត្តិសាស្ត្រ «ភ្នំសំពៅ ប្រាសាទបាណន់ និងប្រាសាទឯកភ្នំ»។ ប៉ុន្តែជាមួយនឹងការទស្សនាប្រាសាទបាណន់ ភ្ញៀវដ៏ច្រើនលើសលប់ ក៏ប្រជ្រៀតគ្នាទៅជិះ «ឡូរី» កម្សាន្តនៅជើងភ្នំបាណន់យ៉ាងណែនតាន់តាប់ផងដែរ។
ក្រៅពីតាមរមណីដ្ឋាននានា កកកុញទៅដោយភ្ញៀវទេសចរទៅកម្សាន្តពេលថ្ងៃ ដោយឡែកនៅពេលរាត្រីវិញ គេក៏សង្កេតឃើញនៅតាមអាហារដ្ឋាន ភោជនីយដ្ឋាននានា តាមសណ្ឋាគារ និងផ្ទះសំណាក់ នៅក្នុងក្រុងបាត់ដំបង ក៏ស្ថិតក្នុងស្ថានភាពណែនតាន់តាប់ទៅដោយភ្ញៀវស្នាក់នៅ។
យ៉ាងណាក្ដី ជាមួយនឹងការធ្វើដំណើររបស់ភ្ញៀវទេសចរជាតិ និងអន្តរជាតិ យ៉ាងច្រើនសន្ធឹកសន្ធាប់ចូលមកកម្សាន្តនៅក្នុងទឹកដី នៃខេត្តប្រវត្តិសាស្ត្រ ក្នុងឱកាសបុណ្យភ្ជុំបិណ្ឌនាឆ្នាំនេះ ភ្ញៀវទេសចរក៏ជួបនូវបញ្ហាប្រឈមខ្លះៗដែរ។ នេះបើតាមការវា.យតម្លៃរបស់មន្ទីរទេសចរណ៍ខេត្ត ដែលមន្ត្រីជំនាញ នៃមន្ទីរនេះ បានចុះតាមពិនិត្យលើស្ថានភាពជាក់ស្ដែងនៅតាមរមណីយដ្ឋាននានា។
មន្ទីរទេសចរណ៍បានលើកឡើងអំពីបញ្ហាប្រឈមទាំងនោះថា ប្រជាពលរដ្ឋ និងភ្ញៀវទេសចរជាច្រើននាំឲ្យពិបាកក្នុងការចូលរួមអនុវត្តនូវវិធានការ ការពារការឆ្លងជំងឺកូវីដ១៩ កកស្ទះចរាចរណ៍នៅតាមផ្លូវចូលរមណីយដ្ឋាន និងកកស្ទះតាមគោលដៅទេសចរណ៍ ភ្ញៀវធ្លាក់រាល់ថ្ងៃនាំរំខានដល់ដំណើរភ្ញៀវធ្វើដំណើរកម្សាន្ត និងតំបន់គោលដៅទេសចរណ៍មួយចំនួនជាប់មាត់ស្ទឹង មិនអាចចូលទៅកម្សាន្តបាន ព្រោះខ្លាចទឹកស្ទឹងឡើង ទើបត្រូវបិទតែម្ដង។ ប៉ុន្តែយ៉ាងណា របាយការណ៍មន្ទីរទេសចរណ៍ខាងលើនេះ មិនបានបញ្ជាក់ទេថា តើក្នុងដំណើរកម្សាន្តរយៈពេល០៣ថ្ងៃ នៃពិធីបុណ្យភ្ជុំបិណ្ឌនាឆ្នាំនេះ មានមនុស្សគ្រោះថ្នាក់ដោយសារលង់ទឹកដែរ ឬអត់នោះទេ?៕
ចែករំលែកព័តមាននេះ