ប្រសិនបើការលក់លំនៅឋានរបស់លោកអ្នកចាប់ផ្តើមដោយលំបាក និងប្រើពេលវេលាយូរជាងការគិតទុក ការរកអ្នកមានអាជីពដូចជា «ឈ្មួញកណ្តាល» ចូលមកជួយ ក៏ជាជម្រើសមួយដែលមនុស្សជាច្រើនបានអនុវត្ត ព្រោះ
ប្រសិនបើការលក់លំនៅឋានរបស់លោកអ្នកចាប់ផ្តើមដោយលំបាក និងប្រើពេលវេលាយូរជាងការគិតទុក ការរកអ្នកមានអាជីពដូចជា «ឈ្មួញកណ្តាល» ចូលមកជួយ ក៏ជាជម្រើសមួយដែលមនុស្សជាច្រើនបានអនុវត្ត ព្រោះឈ្មួញកណ្តាលទាំងនេះតែងមានជំនាញផ្នែកលក់ និងស្វែងរកអតិថិជនបានច្រើន ប៉ុន្តែទាំងនេះក៏មិនមែនមានន័យថា ការលក់លំនៅឋានតាមរយៈឈ្មួញកណ្តាល នឹងល្អរហូតនោះទេ ។ អ្នកខ្លះអាចធ្លាប់ជួបហេតុការណ៍ឈ្មួញកណ្តាលបោកប្រាក់ ឬប្រាក់មិនបានទៅដល់ដៃអ្នកលក់គ្រប់ចំនួន និងធ្វើឲ្យមនុស្សភាគច្រើនចាប់ផ្តើមញញើតថា នឹងអាចជួបឈ្មួញកណ្តាលល្អឬទេ ? នេះជាសំណួរគួរសួរមុននឹងលក់ផ្ទះតាមរយៈឈ្មួញកណ្តាល ៖
១-មានបទពិសោធន៍ និងជំនាញអ្វីខ្លះ ៖
រឿងសំខាន់បំផុតក្នុងការជ្រើសរើសឈ្មួញកណ្តាល គឺសួរដល់ជំនាញរបស់ពួកគេថា មានភាពស្ទាត់ជំនាញផ្នែកណា ដូចជា ឈ្មួញកណ្តាលខ្លះស្ទាត់ជំនាញក្នុងការលក់ខុនដូ, ខ្លះជំនាញខាងទីតាំង និងខ្លះទៀតអាចនិយាយភាសាជប៉ុនបាន ដែលសមនឹងការរកអតិថិជនជនជាតិជប៉ុន (សម្រាប់អ្នកដែលចង់បានអតិថិជនជប៉ុន) ។
ត្រង់នេះយើងអាចកំណត់ថា ចង់បានឈ្មួញកណ្តាលដែលស្ទាត់ជំនាញផ្នែកអ្វីជាពិសេស ។ យើងសូមណែនាំថា គួរជ្រើសរើសឈ្មួញកណ្តាលដែលមានជំនាញខាងទីតាំង គឺល្អជាង ព្រោះគាត់នឹងដឹងព័ត៌មានលម្អិតទាំងទីតាំង និងតម្លៃ ។
២-ធ្វើការជាក្រុម ឬឯកជន ៖
បច្ចុប្បន្ននេះ ឈ្មួញកណ្តាលដែលទទួលទិញ-លក់ផ្ទះមានច្រើនបែប ទាំងជាក្រុមដែលមានការទទួលស្គាល់ និងលិខិតអនុញ្ញាត ។ ឈ្មួញកណ្តាលខ្លះធ្វើជាលក្ខណៈឯកជន គឺមិនអាស្រ័យលើក្រុមណាមួយឡើយ ។
ដូច្នេះ បើអ្នកចង់បានឈ្មួញកណ្តាលដែលអាចទុកចិត្តបាន គួរស្វែងរកអ្នកនៅក្នុងក្រុមហ៊ុនគួរជឿទុកចិត្ត និងមានលទ្ធផលការងារដែលអាចបញ្ជាក់ថា អាចលក់ផ្ទះបានពិតប្រាកដ គ្មានប្រវត្តិបោកប្រាស់ ឬបញ្ហានៅពេលក្រោយ ។
៣-សុំមើលលទ្ធផលការងារកន្លងមក ៖
មិនមានន័យថា ឈ្មួញកណ្តាលដែលគ្មានក្រុម គឺមិនគួរឲ្យទុកចិត្តនោះទេ គ្រាន់តែអ្នកត្រូវពិនិត្យឲ្យបានលម្អិតច្រើនជាងឈ្មួញកណ្តាលមកពីក្រុមហ៊ុន ។ វិធី គឺត្រូវសើុបពីប្រវត្តិលទ្ធផលការងាររបស់ឈ្មួញកណ្តាលរូបនោះសិន ។
បច្ចុប្បន្ន មានច្រើនវិធីដែលឈ្មួញកណ្តាលទទួលអតិថិជនដូចជា ហ្វេសប៊ុកជាដើម។ អ្នកអាចទាក់ទងជាមួយអតិថិជនចាស់ដើម្បីសួរនាំទាក់ទងពីឈ្មួញកណ្តាលរូបនេះថា ជាមនុស្សដូចម្តេច? ទាំងនេះគឺដើម្បីជួយកាត់បន្ថយហានិភ័យពីការបោកប្រាស់របស់ឈ្មួញ កណ្តាលឯកជន ។
៤-បានដាក់ផែនការទីផ្សារដូចម្តេចខ្លះក្នុងការលក់ផ្ទះនេះ ៖
កុំភ្លេចសួរដល់ផែនការធ្វើការរបស់ឈ្មួញកណ្តាលថា មានផែនការបែបណាដើម្បីធ្វើឲ្យផ្ទះនេះលក់ដាច់ ឬជួលបានឆាប់រហ័ស ព្រោះគោលបំណងរកឈ្មួញកណ្តាលជួយលក់ផ្ទះ គឺត្រូវការឲ្យលក់បានលឿន និងបង្កភាពងាយស្រួលដល់អ្នកក្នុងផ្នែកផ្សេងៗផងដែរ ។
ដូច្នេះ បើអ្នកស្តាប់ផែនការទីផ្សាររបស់គាត់ហើយមើលទៅមិនចាប់អារម្មណ៍ ឬគិតថាមិនដំណើរការ ក៏មិនចាំបាច់រកសេវាពីឈ្មួញកណ្តាលរូបនេះទេ គឺអាចរកអ្នកដទៃដែលសមស្របជាងវិញ ។
៥-មានពាក្យសម្រាប់ណែនាំឬទេ ៖
ឈ្មួញកណ្តាល មិនបានមានតួនាទីជួយយើងលក់ផ្ទះតែម្យ៉ាងនោះទេ ប៉ុន្តែអាចផ្តល់ការប្រឹក្សា និងពាក្យណែនាំផ្សេងៗផងដែរ ។ កុំភ្លេចថា គាត់ជាអ្នកមានជំនាញច្រើនជាងយើង ដូច្នេះ គាត់មានទិន្នន័យ និងបានត្រៀមខ្លួន ។
ពាក្យប្រឹក្សាភាគច្រើន ដែលឈ្មួញ កណ្តាលគួរផ្តល់ដល់យើងនោះ ដូចជា ការដាក់តម្លៃមានភាពសមស្របឬនៅ ឬវិធីលក់បែបណាល្អ បែបណាមិនល្អ ជាដើម ។ អ្នកគួរប្រឹក្សារកទិន្នន័យដោយខ្លួនឯងផងដែរ មុននឹងជឿជាក់លើអ្នកដទៃ ព្រោះចុងក្រោយ ការទទួលបានចំណេញ ឬខាតបង់ វាគឺជាប្រាក់របស់អ្នក មិនមែនប្រាក់របស់ឈ្មួញកណ្តាលនោះទេ ៕
ចែករំលែកព័តមាននេះ