ខេត្តកំពង់ឆ្នាំង ៖ ដោយសារតែអស់លទ្ធភាពក្នុងការព្យាបាលជំងឺចម្លែក(ហើមដៃ)មើលមិនជា ហើយអស់ទ្រព្យសម្បត្តិពីខ្លួនទៀត ស្ត្រីមេម៉ាយ និងជាប្រធានសមាគមនារីឃុំ …
ខេត្តកំពង់ឆ្នាំង ៖ ដោយសារតែអស់លទ្ធភាពក្នុងការព្យាបាលជំងឺចម្លែក(ហើមដៃ)មើលមិនជា ហើយអស់ទ្រព្យសម្បត្តិពីខ្លួនទៀត ស្ត្រីមេម៉ាយ និងជាប្រធានសមាគមនារីឃុំស្រែថ្មី បានលើកដៃសំពះ សូមអំពាវនាវរកសប្បុរសជន និងគ្រូពេទ្យជំនាញ មេត្តាជួយព្យាបាលរូបគាត់ផង ព្រោះសព្វថ្ងៃនេះទ្រព្យសម្បត្តិរបស់គាត់បានលក់អស់ហើយដើម្បីព្យាបាលជំងឺ នៅតែមិនជា ។
ស្ត្រីមេម៉ាយមានជម្ងឺចម្លែករូបនោះ ឈ្មោះ លឿង ផាន្នី អាយុ៦៣ឆ្នាំ ជាប្រធានសមាគមនារី ឃុំស្រែថ្មី មានទីលំនៅភូមិត្រពាំងស្បូវ ឃុំស្រែថ្មី ស្រុករលាប្អៀរ ។ គាត់បានរៀបរាបថា គាត់មានកូន៣នាក់ បែកមានប្តីប្រពន្ធអស់២នាក់ សល់ម្នាក់មានប្តីប្រពន្ធរស់នៅមើលថែគាត់រាល់ថ្ងៃ ។
ស្ត្រីរូបនោះបានរម្លឹកពីប្រវត្តិជំងឺក្នុងខ្លួនគាត់ថា កាលពីជាង៨ឆ្នាំមុន គាត់បានកើតជំងឺដុំគីសលើដោះខាងស្តាំ កាលណោះគ្រូពេទ្យបានសម្រេចកាត់ដោះគាត់ចោលដើម្បីព្យាបាល ហើយបានជាសះស្បើយ តាំងពីនោះរហូតមកមិនដែលមានហេតុភេទអ្វីទេ គាត់អាចធ្វើការធ្ងន់ស្រាលបាន ។ ស្រាប់តែនៅខែឧសភា ឆ្នាំ២០១៦ ដៃខាងស្តាំរបស់គាត់បានចាប់ផ្តើមពើតចុកចាប់ និងហើមពីមួយថ្ងៃទៅមួយថ្ងៃ រហូតដល់សព្វថ្ងៃដៃគាត់ហើមប៉ុនជើងទៅហើយ ។ គាត់បានទៅព្យាបាលជំងឺជាច្រើនកន្លែងដែរតែមិនជា គ្រូពេទ្យថា មិនដឹងឈឺអីឲ្យប្រាកដដែរ ។ ចាប់តាំងពីកើតជំងឺហើមដៃ និងពើតចុកចាប់មក គាត់បានលក់ស្រែ លក់មាសប្រាក់អស់រលីងពីខ្លួន នៅតែមិនអាចព្យាបាលដៃគាត់ជា ។ ពេលនេះគាត់អស់លទ្ធភាពហើយ មានតែលើកដៃសំពះសូមអំពាវនាវដល់សប្បុរសជន អាជ្ញាធរខេត្ត ពិសេសប្រមុខរាជរដ្ឋាភិបាល សូមមេត្តាជួយរកគ្រូពេទ្យណាជួយព្យាបាលរូបគាត់ផង ។
សូមបញ្ជាក់ថា កាលពីរសៀលថ្ងៃទី២៥ ខែកុម្ភៈ ឆ្នាំ២០១៧ លោកគ្រូពេទ្យសប្បុរសធម៌ម្នាក់ដែលសុំមិនបញ្ចេញឈ្មោះ បានជួយចាក់ថ្នាំបំបាត់ការចុកចាប់ឲ្យស្ត្រីខាងលើ ដោយគាត់បានបញ្ជាក់ថា ជំងឺស្ត្រីរូបនោះមិនច្បាស់ថាកើតអ្វីឲ្យប្រាកដនោះទេ ព្រោះតាមដឹងគាត់ធ្លាប់ទៅព្យាបាលនៅមន្ទីរពេទ្យរាជធានីភ្នំពេញ រួចហើយនៅតែមិនជា ។
លោកគ្រូពេទ្យរូបនោះបញ្ជាក់ថា ជំងឺនេះមិនមែនជាជំងឺមហារីកទេ តែលោកសង្ស័យអាចស្ពៀតសរសៃឈាមណាមួយ ទើបបណ្តាលឲ្យហើមដៃធំបែបនេះ តែនេះជាកាសង្ស័យរបស់គាត់ប៉ុណ្ណោះ បើសិនគាត់ឬមានសប្បុរសជនយកគាត់ទៅព្យាបាលនៅមន្ទីរពេទ្យធំៗល្បីៗ គាត់អាចនឹងជាឡើងវិញ ៕
ចែករំលែកព័តមាននេះ