លទ្ធផលនៃដំណើរទស្សនកិច្ចផ្លូវរដ្ឋរបស់លោក ប៊ុនញ៉ាង វរជីត ប្រធានរដ្ឋឡាវនៅកម្ពុជា
រាជធានីភ្នំពេញ ៖ ១-តាមការអញ្ជើញរបស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា
រាជធានីភ្នំពេញ ៖ ១-តាមការអញ្ជើញរបស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា
រាជធានីភ្នំពេញ ៖ ១-តាមការអញ្ជើញរបស់ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា លោក ប៊ុនញ៉ាង វរជីត ប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ បានដឹកនាំគណៈប្រតិភូជាន់ខ្ពស់ឡាវ មកបំពេញទស្សនកិច្ចផ្លូវរដ្ឋនៅព្រះរាជាណាចក្រកម្ពុជា ចាប់ពីថ្ងៃទី២២ ដល់ថ្ងៃទី២៣ ខែកុម្ភៈ ឆ្នាំ២០១៧ ។
២-ក្នុងពេលបំពេញទស្សនកិច្ចផ្លូវការនេះ លោក ប៊ុនញ៉ាង វរជីត បានអញ្ជើញដាក់កម្រងផ្កានៅវិមានឯករាជ្យ និងមណ្ឌលព្រះករុណាព្រះបាទសម្ដេចព្រះនរោត្ដម សីហនុ ព្រះមហាវិរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ។ លោកប្រធានរដ្ឋ ក៏បានជួបជាមួយសម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្ដេចអគ្គមហាពញាចក្រី ហេង សំរិន ប្រធានរដ្ឋសភា និងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ។
៣-នៅក្នុងជំនួបទ្វេភាគីរវាងសម្ដេចអគ្គមហាសេនាបតីតេជោ ហ៊ុន សែន និងលោក ប៊ុនញ៉ាង វរជីត ប្រធានរដ្ឋឡាវ ថ្នាក់ដឹកនាំនៃប្រទេសទាំងពីរបានពិភាក្សា និងផ្លាស់ប្ដូរទស្សនៈយ៉ាងទូលំទូលាយស្ដីពីទំនាក់ទំនងមិត្ដភាពទ្វេភាគី និងកិច្ចសហប្រតិបត្ដិការលើគ្រប់វិស័យ ក៏ដូចជាបញ្ហានៅក្នុងតំបន់ និងអន្ដរជាតិ ដើម្បីផលប្រយោជន៍រួមនៃប្រទេសទាំងពីរ ។ ជំនួបពិភាក្សាទ្វេភាគីនោះ បានប្រព្រឹត្ដទៅក្រោមបរិយាកាសទំនាក់ទំនងល្អមិត្ដភាព ប្រពៃណី សាមគ្គីជាបងប្អូន និងជាអ្នកភូមិផងដ៏ល្អ ដោយទទួលបានលទ្ធផលដូចខាងក្រោម ៖
ក-សម្ដេចអគ្គមហាសេនាបតីតេជោ ហ៊ុន សែន បានសម្ដែងនូវការអបអរចំពោះលោកប្រធានរដ្ឋ ប៊ុនញ៉ាង វរជីត ហើយតាមរយៈលោកប្រធានរដ ជូនចំពោះថ្នាក់ដឹងនាំឡាវ ដែលទើបនឹងត្រូវបានជ្រើសតាំងថ្មីៗនេះ ។ សម្តេចអគ្គមហាសេនាបតីតេជោ ហ៊ុន សែន ក៏បានវាយតម្លៃខ្ពស់ចំពោះការមកបំពេញទស្សនកិច្ចផ្លូវរដ្ឋជាលើកទី១របស់លោកប្រធានរដ្ឋ ប៊៊ុនញ៉ាង វរជីត និងបានសម្តែងនូវការអបអរសាទរចំពោះប្រទេសឡាវ ដែលសម្រេចបានសមិទ្ធផលគួរឱ្យកត់សម្គាល់ក្នុងការអភិវឌ្ឍ និងកំណែទម្រង់ជាតិក្រោមការដឹកនាំប្រកបដោយភាពឆ្លាតវៃរបស់រដ្ឋាភិបាល និងបក្សប្រជាជនបដិវត្តន៍ឡាវ ។
ខ-លោក ប៊ុនញ៉ាង វរជីត បានសម្តែងនូវការអបអរសាទរយ៉ាងកក់ក្តៅចំពោះប្រជាជនកម្ពុជា ជាបងប្អូនចំពោះសមិទ្ធផលដ៏ធំធេងដែលសម្រេចបានប្រកបដោយមោទនភាពក្នុងការអភិវឌ្ឍសេដ្ឋកិច្ច-សង្គម និងបានគូសបញ្ជាក់ថា ឡាវតែងតែផ្តល់តម្លៃចំពោះទំនាក់ទំនងមិត្តភាពដ៏ល្អ និងបានជួយជ្រោមជ្រែងបន្តបន្ទាប់របស់ប្រជាជន និងថ្នាក់ដឹកនាំកម្ពុជាក្នុងការចូលរួមចំណែកធ្វើឱ្យកិច្ចប្រជុំកំពូលអាស៊ានលើកទី ២៨ និងលើកទី២៩ និងកិច្ចប្រជុំកំពូលពាក់ព័ន្ធនានាទទួលជោគជ័យកាលពីឆ្នាំកន្លងទៅ
នេះ ។
គ-សម្តេចតេជោនាយករដ្ឋមន្ត្រីបានឯកភាពចំពោះការវាយតម្លៃខ្ពស់របស់ប្រធានរដ្ឋឡាវ និងបានបញ្ជាក់សាជាថ្មីថា កម្ពុជានឹងអនុញ្ញាតឱ្យប្រទេសឡាវជាមិត្តប្រើប្រាស់កំពង់ផែ និងផ្លូវទឹក ផ្លូវគោកកម្ពុជា សម្រាប់ជាការដឹកទំនិញចេញចូល ដើម្បីជំរុញការតភ្ជាប់ពាណិជ្ជកម្មរវាងប្រទេសទាំងពីរ ជាពិសេសនៅភាគខាងត្បូងនៃប្រទេសឡាវ និងនៅភាគឦសាននៃកម្ពុជាឱ្យកាន់តែរីកចម្រើន ។
ឃ-ភាគីទាំងពីររីករាយចំពោះទំនាក់ទំនងមិត្តភាពជាប្រពៃណីដ៏ប្រសើរ ភាពជាអ្នកជិតខាងល្អ សាមគ្គីភាព និងកិច្ចសហប្រតិបត្តិការគ្រប់ជ្រុងជ្រោយ ដែលបានផ្តល់ផលប្រយោជន៍សម្រាប់ប្រជាជននៃប្រទេសទាំងពីរក្នុងរយៈពេលប៉ុន្មានឆ្នាំចុងក្រោយនេះដូចជា វិស័យអប់រំ ពាណិជ្ជកម្ម ការប្រយុទ្ធប្រឆាំងគ្រឿងញៀន និងការកាប់ឈើខុសច្បាប់ ។
ង-ភាគីទាំងពីរបានកត់សម្គាល់ដោយការពេញចិត្តចំពោះលទ្ធផលដែលប្រទេសទាំងពីរសម្រេចបានថ្មីៗនេះដូចជា ៖ ១-ការដាក់ឱ្យប្រើប្រាស់ប័ណ្ណឆ្លងកាត់ព្រំដែននៅថ្ងៃទី១ ខែមករា ឆ្នាំ២០១៧ និង២-ការសម្ពោធដាក់ឱ្យប្រើប្រាស់ជាផ្លូវការនូវច្រកទ្វារអន្តរជាតិនេះមិនត្រឹមតែជួយសម្រួលការឆ្លងកាត់ព្រំដែនរបស់ប្រជាជននៃប្រទេសទាំងពីរប៉ុណ្ណោះទេ ថែមទាំងជួយជំរុញទំនាក់ទំនងរវាងប្រជាជន និងប្រជាជន ពាណិជ្ជកម្ម និងទេសចរ ។
ច-ថ្នាក់ដឹកនាំទាំងពីរក៏បានស្វាគមន៍ចំពោះលទ្ធផលនៃដំណើរទស្សនកិច្ចផ្លូវការនៅកម្ពុជារបស់លោក សាលើមសៃ គុំម៉ាស៊ីត រដ្ឋមន្ត្រីការបរទេសឡាវកាលពីថ្ងៃទី២៣-២៥ ខែមករា ឆ្នាំ២០១៧ ដែលបានរួមចំណែកពង្រឹង និងពង្រីកទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការរវាងប្រទេសទាំងពីរ ។
ឆ-ភាគីទាំងពីរបានកត់សម្គាល់ចំពោះលទ្ធផលថ្មីៗនៃការបោះបង្គោល និងកំណត់ព្រំដែន និងបានសម្តែងនូវការកោតសរសើរខ្ពស់ចំពោះកិច្ចខិតខំប្រឹងប្រែងរបស់គណៈកម្មការព្រំដែនកម្ពុជា-ឡាវ(JBC)ដែលសម្រេចបាន៨៦%នៃការងារកំណត់ និងបោះបង្គោលព្រំដែនឈរលើគោលការណ៍នានា ដែលភាគីទាំងពីរបានឯកភាពយកមកអនុវត្តន៍ក្នុងការដោះស្រាយព្រំដែន ។ ថ្នាក់ដឹកនាំនៃប្រទេសទាំងពីរបានលើកទឹកចិត្តឱ្យគណៈកម្មការព្រំដែនរួមនៃប្រទេសទាំងពីរ ស្វែងរកដំណោះស្រាយជាក់លាក់មួយចំពោះបញ្ហាព្រំដែនដែលនៅសេសសល់ ដើម្បីបញ្ចប់ឱ្យបានឆាប់នូវដំណើរការបោះបង្គោល និងកំណត់ព្រំដែនគោក ។
ជ-ភាគីទាំងពីរយល់ឃើញថា ក្រសួងស្ថាប័នពាក់ព័ន្ធ គួរបន្តអនុវត្តកិច្ចព្រមព្រៀង កិច្ចសហប្រតិបត្តិការ កំណត់ហេតុ និងអនុស្សរណៈនៃការយោគយល់ ដែលបានចុះហត្ថលេខាដោយប្រទេសទាំងពីរ ។
ឈ-ភាគីទាំងពីរបានសម្តែងនូវការកោតសរសើរចំពោះការសម្របសម្រួល និងកិច្ចសហប្រតិបត្តិការរវាងប្រទេសទាំងពីរនៅក្នុងវេទិកាពហុភាគីនាបណ្តាឆ្នាំកន្លងមក ។ ក្នុងបរិបទតំបន់ដែលមានការប្រែប្រួលជាមួយនឹងការវិវត្តនាពេលបច្ចុប្បន្ន ភាគីទាំងពីរបានប្តេជ្ញាបង្កើនកិច្ចសហប្រតិបត្តិការ និងការសម្របសម្រួលបន្ថែមទៀតនៅក្នុងតំបន់ និងអន្តរជាតិដូចជា កិច្ចសហប្រតិបត្តិការក្នុងក្របខ័ណ្ឌអាស៊ានកិច្ចប្រជុំកំពូលកម្ពុជា-ឡាវ-វៀតណាម ស្តីពីតំបន់ត្រីកោណអភិវឌ្ឍន៍ (CLV-DTA) កិច្ចប្រជុំកំពូលកម្ពុជា-ឡាវ-មីយ៉ាន់ម៉ា-វៀតណាម (CLMV) កិច្ចប្រជុំកំពូលយុទ្ធសាស្ត្រកិច្ចសហប្រតិបត្តិការសេដ្ឋកិច្ចអាយេយ៉ាវ៉ាឌី-ចៅប្រាយ៉ា-មេគង្គ (ACMECS) មហាអនុតំបន់ទន្លេមេគង្គ (GMS) កិច្ចសហប្រតិបត្តិការមេគង្គ ក៏ដូចជាក្នុងក្របខ័ណ្ឌអង្គការសហប្រជាជាតិ តាមរយៈការលើកកម្ពស់កិច្ចសហការ ការចែករំលែកព័ត៌មាននិងការគាំទ្រគ្នាទៅវិញទៅមក ដើម្បីធានាបាននូវសន្តិភាព សន្តិសុខ ស្ថិរភាព និងការអភិវឌ្ឍប្រកបដោយនិរន្តរភាពនៅក្នុងតំបន់ និងលើឆាកអន្តរជាតិ ។
ញ-សម្រាប់បញ្ហាសមុទ្រចិនខាងត្បូង ភាគីទាំងពីរបានលើកទឹកចិត្តឱ្យភាគីដែលពាក់ព័ន្ធដោយផ្ទាល់ដោះស្រាយជម្លោះដោយមធ្យោបាយសន្តិវិធីរូមមាន ការចរចា និងការពិគ្រោះយោបល់ ការអត់ធ្មត់ គ្មានការគំរាមកំហែង ឬគ្មានការប្រើប្រាស់កម្លាំង ស្របតាមគោលការណ៍ដែលទទួលស្គាល់ជាសាកលនៃច្បាប់អន្តរជាតិ រួមមានអនុសញ្ញាអង្គការសហប្រជាជាតិឆ្នាំ១៩៨២ ស្តីពីច្បាប់សមុទ្រ (UNCLOS) ។
ដ-ភាគីទាំងពីរបានបញ្ជាក់ពីសារៈសំខាន់នៃដំណើរទស្សនកិច្ចផ្លូវរដ្ឋរបស់ប្រធានរដ្ឋឡាវ ដែលជាព្រឹត្តិការណ៍ដ៏មានសារៈសំខាន់ ក្នុងការរួមចំណែកពង្រឹងទំនាក់ទំនងមិត្តភាពជាប្រពៃណីដ៏ប្រសើរ សាមគ្គីភាពជាបងប្អូន និងភាពជាអ្នកជិតខាងល្អរវាងប្រទេសទាំងពីរប្រកបដោយចីរភាព ។
៤-គណៈប្រតិភូឡាវ បានសម្តែងនូវការកោតសរសើរយ៉ាងកក់ក្តៅ និងបដិសណ្ឋារកិច្ចប្រកបដោយសមានចិត្ត ជូនចំពោះគណៈប្រតិភូឡាវ ក្នុងអំឡុងពេលស្នាក់នៅក្នុងទីក្រុងភ្នំពេញ និងការរៀបចំដ៏ល្អប្រសើរសម្រាប់គណៈប្រតិភូឡាវ ក្នុងអំឡុងពេលទស្សនកិច្ចផ្លូវរដ្ឋរបស់លោក ប៊ុនញ៉ាង វរជីត ប្រធានរដ្ឋនៃសាធារណរដ្ឋប្រជាធិបតេយ្យប្រជាមានិតឡាវ ៕
ចែករំលែកព័តមាននេះ