«Reuter» ផ្សាយកាលពីពេល ថ្មីៗកន្លងមកថា រដ្ឋបាវ៉ារីយ៉ា ប្រទេសអាល្លឺម៉ង់ ត្រៀមចេញច្បាប់ហាមស្ដ្រីមូស្ល៊ីមឃ្លុំក្បាលបិទបាំងផ្ទៃមុខនៅមហាវិទ្យាល័យ ទីកន្លែងរដ្ឋ និងអង្គភាពបោះឆ្នោត ។ គោលនយោបាយនោះបានស្នើឡើងមុនពេលមានការបោះឆ្នោតទូទៅនៅអាល្លឺម៉ង់ រយៈពេល៧ខែខាងមុខ ដោយរំពឹងថា បញ្ហាជនភៀសខ្លួន គឺជាករណីដ៏សំខាន់ក្នុងការលើកយកមកពិភាក្សា ។ គណបក្ស«Christian Social Union» (CSU) រដ្ឋបាវ៉ារីយ៉ា កំពុងបារម្ភថា គណបក្សអាចបាត់បង់សំឡេងទៅគណបក្សជម្រើសអាល្លឺម៉ង់(AFD) ដែលមាននយោបាយប្រឆាំងលើជនភៀសខ្លួន ។ លោកថូអាឃីម ហ៊ឺម៉ាន រដ្ឋមន្ដ្រីក្រសួងមហាផ្ទៃ រដ្ឋបាវ៉ារីយ៉ា ផ្ដល់បទសម្ភាសន៍ថា «សម្ព័ន្ធភាពមិនបានកើតឡើងពីការប្រើភាសាប៉ុណ្ណោះទេ គឺរួមទាំងនិមិត្ដរូបនៅផ្នែកខាងក្រៅ ដូចជាទឹកមុខនិងឥរិយាបទ ក្រោយពីរដ្ឋបាលក្នុងមូលដ្ឋាន មានមតិយល់ស្របលើសេចក្ដីព្រៀងច្បាប់ហាមបុគ្គលិករដ្ឋជាមូស្ល៊ីមពាក់ក្រណាត់ឃ្លុំមុខ រួមទាំងហាមប្រើក្រណាត់រុំនៅទីសាធារណៈ ។ នេះជាការមានសម្ព័ន្ធភាពជាមួយអ្នកដទៃ និងជាមូលដ្ឋានគ្រឹះក្នុងសង្គមប្រជាធិបតេយ្យសេរីភាព ខណៈពេលការបិទមុខរមែងមិនស្របតាមគន្លងវប្បធម៌នៃទាក់ទងទេ» ។
លក្ខខណ្ឌនោះបានកើតឡើងពីភាពភ័យខ្លាចចំពោះជនភៀសខ្លួនជាង១លាននាក់ ដែលហូរចូលអាល្លឺម៉ង់ក្នុងអំឡុង២ឆ្នាំកន្លងមក ។ ម្យ៉ាងទៀតពលរដ្ឋអាល្លឺម៉ង់ភ័យខ្លាចពីការវាយប្រហាររបស់សកម្មជនមូស្ល៊ីម ដែលកើតឡើងជាច្រើនលើកកាលពីឆ្នាំមុខ ។
នៅប្រទេសបារាំង និងបែលហ្ស៊ិក មានច្បាប់ហាមស្ដ្រីមូស្ល៊ីមពាក់ក្រណាត់បិទមុខ ឬហៅថា«Burqa» រួមមកហើយ ចំណែកនៅតំបន់ឡុមបាទី ភាគខាងជើងប្រទេសអុីតាលី ហាមប្រើក្រណាត់រុំក្បាលបែបនេះនៅមន្ទីរពេទ្យ និងទីតាំងរបស់រដ្ឋ ។
រដ្ឋមន្ដ្រីដដែលបញ្ជាក់ទៀតថា លោកសង្ឃឹមថា សភានៅក្នុងរដ្ឋបាវ៉ារីយ៉ា ដែលគណបក្សCSU មានសំឡេងភាគច្រើន និងអនុម័តលើសេចក្ដីព្រាងច្បាប់នៅក្នុងថ្ងៃឈប់សម្រាកនៃរដូវក្ដៅនេះ ៕
ចែករំលែកព័តមាននេះ