ឧត្តមសេនីយ៍ឯក ឯក មនោសែន ចុះសួរសុខទុក្ខសិស្សនាយ និងនាយនគរបាលរង សាលានគរបាលជាតិភូមិភាគ៦
ខេត្តកំពង់ឆ្នាំង ៖ ឯកឧត្តម ឧត្តមសេនីយ៍ឯក ឯក មនោសែន អនុប្រធានបណ្ឌិតសភានគរបាលកម្ពុជា បានលើកឡើងថា រដ្ឋបានជ្រើសរើសប្អូនៗមកទីនេះ
ខេត្តកំពង់ឆ្នាំង ៖ ឯកឧត្តម ឧត្តមសេនីយ៍ឯក ឯក មនោសែន អនុប្រធានបណ្ឌិតសភានគរបាលកម្ពុជា បានលើកឡើងថា រដ្ឋបានជ្រើសរើសប្អូនៗមកទីនេះ ដើម្បីបម្រើប្រទេសជាតិ សូមចូលរួមអបអរសាទរ ដែលប្អូនៗបានប្រឡងជាប់ឈ្នះមនុស្សរាប់ម៉ឺននាក់ តែប្អូនៗ មិនប្រាកដថា អាចយកឈ្នះនៅទីនេះបានទេ។ ឯកឧត្តម ថ្លែងបែបនេះ ក្នុងពិធីសំណេះ សំណាល និងសាកសួរសុខទុក្ខ សិស្សនាយនគរបាល និងនាយនគរបាលរង “វគ្គបណ្តុះបណ្តាលកម្រិតបឋមវិជ្ជាជីវៈនគរបាល” ចំនួន២៥០នាក់ (នារី៧៤នាក់) នៅសាលានគរបាលជាតិ ភូមិភាគ៦ មានទីតាំងស្ថិតក្នុងឃុំជ្រៃបាក់ ស្រុករលាប្អៀរ កាលពីព្រឹកថ្ងៃទី២០ ខែកុម្ភៈ ឆ្នាំ២០១៧នេះ។
ឯកឧត្តម ឧត្តមសេនីយ៍ឯក ឯក មនោសែន បានបន្តថា នៅសាលានេះ មានកាតព្វកិច្ចមួយគឺត្រូវកែប្រែប្អូនៗ ពីស៊ីវិល មកជាកងកម្លាំងនគរបាលជាតិ ដែលមានវិន័យល្អ សីលធម៌ល្អ និងម៉ឺងម៉ាត់ចំពោះការងារ ពេលត្រលប់ចេញពីសាលានេះទៅ។ ថ្ងៃនេះដោយទទួលបានការអនុញ្ញាត្តិពី ឯកឧត្តម នាយឧត្តមសេនីយ៍ សេង ផល្លី ប្រធានបណ្ឌិតសភានគរបាលកម្ពុជា និងជាប្រធាននាយកដ្ឋានបណ្តុះបណ្តាល ដើម្បីស្វែងយល់ និងសាកសួរសុខទុក្ខ និងទទួលនូវសំណូមពរលើកទឹកចិត្តឲ្យបងប្អូនប្រឹងប្រែងរៀនសូត្រក្នុងន័យជម្រុញឲ្យការបណ្តុះបណ្តាលទទួលបានលទ្ធផលល្អ ទទួលបានមន្ត្រីនគរបាលជាតិ ដែលមានលក្ខណៈសម្បត្តិគ្រប់គ្រាន់ មានចំណេះដឹង អំពីចំណេះវិជ្ជានគរបាលកម្រិតបឋម មានការយល់ដឹងអំពីតួនាទីភារកិច្ច និងកាតព្វកិច្ច របស់កងកម្លាំងមានស្មារតី ទទួលខុសត្រូវលើការងារ គោរពប្រតិបត្តិច្បាប់ គោរពវិន័យ ក្រមសីលធម៌ វិជ្ជាជីវៈ និងគោរពសិទ្ធិមនុស្ស មុនត្រូវបានតែងតាំងស៊ុបក្នុងក្របខណ្ឌមន្ត្រីនគរបាលជាតិកម្ពុជា។
ក្រោមកិច្ចដឹកនាំបញ្ជាផ្ទាល់ពីសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បណ្ឌិតសភាកម្ពុជា បានដាក់ចេញនូវផែនការយុទ្ធសាស្ត្ររយៈពេល៥ឆ្នាំ (២០១៥-២០១៩) និងកម្មវិធីកំណែទម្រង់លើការងារសំខាន់ៗរួមមាន ការងារដឹកនាំគ្រប់គ្រងការអភិវឌ្ឍន៍កម្មវិធីអប់រំ ការអភិវឌ្ឍន៍សមត្ថភាពគ្រូបង្រៀន ការពង្រឹងវិន័យ និស្សិតសិក្ខាកាម សិស្សនាយនគរបាល និងសិស្សនាយនគរបាលរង ការអភិវឌ្ឍន៍ធនធានមនុស្ស ការបង្កើតឲ្យមានយន្តការធានាគុណភាពអប់រំផ្ទៃក្នុង ការបង្កើតឲ្យមានវប្បធម៌គុណភាពការអភិវឌ្ឍន៍ ហេដ្ឋារចនាសម្ព័ន្ធ និងសម្ភារសិក្សា ការពង្រឹងសមត្ថភាព ស្រាវជ្រាវ វេជ្ជសាស្ត្រនគរបាល សំដៅលើកកម្ពស់ គុណភាពនគរបាលជាតិស្របតាមទិសដៅ របស់ក្រសួងមហាផ្ទៃ និងគោលនយោបាយកំណែទម្រង់ កងកម្លាំងប្រដាប់អាវុធ របស់រាជរដ្ឋាភិបាល ដែលមានសម្តេច អគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី។
ក្នុងពីធីសំណេះ សំណាលសាកសួរសុខទុក្ខនោះដែរ ឯកឧត្តម ឧត្តមសេនីយ៍ឯក អនុប្រធានបណ្ឌិតសភានគរបាលកម្ពុជា ក៏បាននាំយកអំណោយ មានកុំព្យូទ័រ និងគ្រឿងឧឃោសនៈសព្ទ័ប្រគល់ជូនដល់សាលា និងចុះត្រួតពិនិត្យ កន្លែងស្នាក់នៅ និងអាហារដ្ឋានរបស់សាលានគរបាលជាតិ ភូមិភាគ៦ផងដែរ៕ .
ចែករំលែកព័តមាននេះ