រាជធានីភ្នំពេញ ៖ ក្រុមអ្នកជំនាញអចលនទ្រព្យបាននិយាយថា ទីផ្សារការិយាល័យនៅកម្ពុជានៅតែមានសក្តានុពល និងជោគជ័យក្នុងការវិនិយោគ ស្របពេលការចូលមកដល់របស់ក្រុមហ៊ុនអន្តរជាតិ និង
រាជធានីភ្នំពេញ ៖ ក្រុមអ្នកជំនាញអចលនទ្រព្យបាននិយាយថា ទីផ្សារការិយាល័យនៅកម្ពុជានៅតែមានសក្តានុពល និងជោគជ័យក្នុងការវិនិយោគ ស្របពេលការចូលមកដល់របស់ក្រុមហ៊ុនអន្តរជាតិ និងក្រុមហ៊ុនក្នុងស្រុកបានងាកមកប្រើប្រាស់អគារការិយាល័យកាន់តែច្រើនឡើង ។
លោក គុយ វ៉ាត អគ្គនាយកក្រុមហ៊ុនVITRUST GROUP បានថ្លែងឲ្យដឹងក្រោយពេលបញ្ចប់ពិធីដាក់សម្ពោធអគារការិយាល័យVTRUST TOWER នាព្រឹកថ្ងៃទី១៧ កុម្ភៈ ថា នេះជាអគារការិយាល័យទី៣របស់VTRUSTនៅទីក្រុងភ្នំពេញ ។ ជាអគារការិយាល័យមួយដែលបានរៀបចំឡើងដោយមានបទដ្ឋានត្រឹមត្រូវ មានប្រព័ន្ធការពារសុវត្ថិភាពល្អ បំពាក់ដោយប្រព័ន្ធបច្ចេកវិទ្យា ចំណតយានយន្តធំទូលាយ និងមានទីតាំងល្អ នៅកណ្តាលក្រុង និងទីប្រជុំដោយមជ្ឈមណ្ឌលពាណិជ្ជកម្ម ដែលមានសភាពអ៊ូអរយ៉ាងរស់រវើក។
អគារ VTRUST TOWER មានកម្ពស់១៥ជាន់ និងមានផ្ទៃក្រឡាសរុប១,៨ម៉ឺនម៉ែត្រការ៉េ ស្ថិតនៅតាមបណ្ដោយមហាវិថីសាធារណៈឆេក ក្នុងសង្កាត់វាលវង់ ខណ្ឌ៧មករា ។
លោក គុយ វ៉ាត បានបន្តថា ៖ « ទីផ្សារការិយាល័យនៅតែមានសក្តានុពលសម្រាប់វិនិយោគ ដោយសារមិនសូវមានអ្នកវិនិយោគចាប់អារម្មណ៍ច្រើនលើវិស័យនេះ ហើយពួកគេវិនិយោគលើខុនដូ ឬអគារលំនៅឋានច្រើន »។
លោកបន្តថា៖ « តាមធម្មតា ពេលអ្នកវិនិយោគចូលមករកស៊ីនៅកម្ពុជា គឺមានត្រូវការអគារការិយាល័យមុនគេ ហើយក្រុមហ៊ុនក្នុងស្រុកក៏បានងាកមកប្រើប្រាស់អគារការិយាល័យ ជាជាងបើកការិយាល័យនៅតាមផ្ទះល្វែង ឬផ្ទះវីឡាដែរ » ។
បច្ចុប្បន្ន អគារVTRUST TOWER មានក្រុមហ៊ុនជាច្រើនបានជួលរួចហើយ ដូចជា ធនាគារCIMB ក្រុមហ៊ុនធានារ៉ាប់រងPrudential ក្រុមហ៊ុនភ្នំពេញSecurities ក្រុមហ៊ុនRobert Bosch ក្រុមហ៊ុនVTRUST KAIAI និងវិទ្យាស្ថានគណនេយ្យករជំនាញ និងសវនករកម្ពុជា ជាដើម ។
លោក ហុន ម៉េងហៀង ប្រធានគ្រប់គ្រងអចលនទ្រព្យនៃក្រុមហ៊ុនVTRSUT TOWERបានថ្លែងថា រហូតមកទល់ពេលនេះ អគារនេះទទួលបានការជួលគ្របដណ្តប់បាន៦៥ភាគរយហើយ ក្នុងចំណោមផ្ទៃក្រឡា១,៨ម៉ឺនម៉ែត្រការ៉េ។ អគារនេះបាននិងកំពុងដាក់ជួលក្នុងតម្លៃចន្លោះពី១៦ដល់២០ដុល្លារ បូកសេវាគ្រប់គ្រងចំនួន៤ដុល្លារក្នុងមួយម៉ែត្រការ៉េ ។ លោកបន្តថា មានក្រុមហ៊ុនជាច្រើនកំពុងចាប់អារម្មណ៍អគារនេះ ហើយក្រុមហ៊ុនកំពុងស្ថិតក្នុងដំណាក់កាល ចរចាជាមួយក្រុមហ៊ុនទាំងនោះ ដែលគ្រោងជួលរហូតដល់១ជាន់នៃអគារនេះ ។
លោកបន្តថា ៖ « ទីផ្សារការិយាល័យនៅកម្ពុជាកំពុងមានការកក្រើកឡើងកាន់តែខ្លាំងពីក្រុមហ៊ុនក្នុងស្រុក និងក្រុមហ៊ុនអន្តរជាតិ ដោយសារការបើកការិយាល័យនៅអគារការិយាល័យធ្វើឲ្យមានភាពងាយស្រួល មិនបាច់បារម្ភពីការដាច់ភ្លើង និងមានប្រព័ន្ធគ្រប់គ្រងច្បាស់លាស់ គួរឲ្យមានទំនុកចិត្តខ្ពស់ » ៕
ចែករំលែកព័តមាននេះ