អាជ្ញាធរខេត្តបង្ហាញពីការអនុវត្តគោល នយោបាយសម្តេចតេជោលើកោះរ៉ុង
ខេត្តព្រះសីហនុ ៖ លោក យន្ត មីន អភិបាលខេត្ត បានមានប្រសាសន៍នៅក្នុងសន្និសីទសារព័ត៌មានកាលពីព្រឹកថ្ងៃទី១៦ ខែកុម្ភៈ ថា ដោយមានការចូលរួមពីលោកនាយ
ខេត្តព្រះសីហនុ ៖ លោក យន្ត មីន អភិបាលខេត្ត បានមានប្រសាសន៍នៅក្នុងសន្និសីទសារព័ត៌មានកាលពីព្រឹកថ្ងៃទី១៦ ខែកុម្ភៈ ថា ដោយមានការចូលរួមពីលោកនាយ
ខេត្តព្រះសីហនុ ៖ លោក យន្ត មីន អភិបាលខេត្ត បានមានប្រសាសន៍នៅក្នុងសន្និសីទសារព័ត៌មានកាលពីព្រឹកថ្ងៃទី១៦ ខែកុម្ភៈ ថា ដោយមានការចូលរួមពីលោកនាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការទប់ស្កាត់និងបង្ក្រាបបទល្មើសព្រៃឈើនិងធនធានធម្មជាតិ ដោយមានការចូលរួមពីអាជ្ញាធរក្រុង-សង្កាត់ មន្ទីរពាក់ព័ន្ធ និងកងកម្លាំងប្រដាប់អាវុធ បានចុះទៅពិនិត្យមើលស្ថានភាពកាប់ព្រៃឈើធម្មជាតិនៅលើកោះរ៉ុង។ កោះរ៉ុងគឺជាតំបន់ទាក់ទាញខាងវិស័យសេដ្ឋកិច្ច និងទេសចរណ៍ ហើយរាជរដ្ឋាភិបាលកម្ពុជា បាននិងកំពុងគិតគូរពីការអភិវឌ្ឍតំបន់នេះ ឱ្យក្លាយជាតំបន់សេដ្ឋកិច្ច និងតំបន់ទេសចរណ៍ដ៏សំខាន់ និងមានសក្តានុពលក្នុងដែនសមុទ្រខ្មែរ។
លោកអភិបាលខេត្តបន្តថា នៅឆ្នាំ២០០៨ រាជរដ្ឋាភិបាលបានអនុញ្ញាតឱ្យក្រុមហ៊ុនធ្វើការវិនិយោគនៅកោះរ៉ុង ដើម្បីទាញយកភ្ញៀវទេសចរ បង្កើនចំណូលសេដ្ឋកិច្ច ពិសេសបង្កើនជីវភាពរស់នៅរបស់ប្រជាពលរដ្ឋនៅតំបន់ដីកោះ។ នៅឆ្នាំ២០១៤ សម្តេចតេជោនាយករដ្ឋមន្ត្រី ហ៊ុន សែន សម្រេចឱ្យរដ្ឋបាលខេត្ត-ក្រុង កាត់វៀល
ដីជាលក្ខណៈស្បែកខ្លាប្រមាណជា២.០០០ហិកតា ជូនប្រជាពលរដ្ឋរស់នៅពិតប្រាកដលើកោះរ៉ុង ។ ចំណែកកាលពីថ្ងៃទី១២ ខែធ្នូ ឆ្នាំ២០១៥កន្លងមក សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញមកលើកទឹកចិត្តប្រជាពលរដ្ឋ និងក្រុមហ៊ុនវិនិយោគអភិវឌ្ឍន៍កោះឱ្យដំណើរការទៅមុខ និងជំរុញឱ្យកាត់វៀលដីជាលក្ខណៈស្បែកខ្លាជូនដល់ប្រជាពលរដ្ឋ ស្របតាមគោលនយោបាយរបស់សម្តេចតេជោ ហ៊ុន សែន គឺធ្វើអ្វីៗសំដៅបម្រើផលប្រយោជន៍របស់ប្រជាពលរដ្ឋ ។
លោក យន្ត មីន បន្តថា នៅឆ្នាំ២០១៦ រដ្ឋបាលខេត្ត បានចុះទៅកាត់វៀលដីបានជិត២០០ក្បាលដី ដោយមានកិច្ចសហការពីលោក ជា សុផារ៉ា ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានបញ្ជូនមន្ត្រីជំនាញប្រមាណ៣០០នាក់ ចុះកាត់វៀលដីជាលក្ខណៈស្បែកខ្លាជូនប្រជាពលរដ្ឋនៅលើកោះរ៉ុង ។
លុះនៅថ្ងៃទី១៣ ខែធ្នូ ឆ្នាំ២០១៦ មន្ត្រីជំនាញចាប់ផ្តើមចុះវាស់វែងជូនប្រជាពលរដ្ឋ ហើយការងារចុះវាស់វែងបន្តរហូតដល់ថ្ងៃទី២១-២២ ខែធ្នូ ឆ្នាំ២០១៦ ទើបបានបញ្ចប់ ជូនប្រជាពលរដ្ឋនៅតំបន់កោះរ៉ុង ។ ជាលទ្ធផលក្រុមការងារធ្វើការវាស់វែងសម្រេចបានចំនួន៩៨០ក្បាលដី មានទំហំប្រមាណជា២.០០០ហិកតា ។
ក្រោយពេលវាស់វែងហើយ ប្រជាពលរដ្ឋមានគំនិតកែច្នៃចាប់ផ្តើមអភិវឌ្ឍន៍ដីរបស់ពួកគាត់ដោយចង់ធ្វើជាសណ្ឋាគារ ផ្ទះសំណាក់ជាដើម ដោយបោះបង្គោល កាប់ឆ្ការព្រំដី ។ ទន្ទឹមនោះ រដ្ឋបាលខេត្តក៏បានធ្វើការទប់ស្កាត់ការកាប់ទន្ទ្រានព្រៃឈើជាថ្មី នៅលើតំបន់កោះ ។ ម្យ៉ាង តំបន់កោះរ៉ុងហ៊ុមព័ទ្ធទៅដោយឆ្នេរសមុទ្រដែលមានខ្សាច់សស្អាត ទឹកថ្លាខៀវ និងមានព្រៃឈើពណ៌បៃតងស្រស់ សម្រាប់បម្រើឱ្យវិស័យសេដ្ឋ កិច្ច ទេសចរណ៍ ក្នុងខេត្តព្រះសីហនុ។
លោកអភិបាលខេត្តបញ្ជាក់ថា លទ្ធផលនៃការចុះពិនិត្យការកាប់ទន្ទ្រានព្រៃឈើនៅតំបន់កោះរ៉ុង ដឹកនាំដោយលោកនាយឧត្តមសេនីយ៍ សៅ សុខា ក៏ដូចជារូបលោកផ្ទាល់ពិនិត្យឃើញថា មិនមានការកាប់បំផ្លាញព្រៃឈើធម្មជាតិមានលក្ខណៈទ្រង់ទ្រាយធំដូចប្រព័ន្ធផ្សព្វផ្សាយក្នុងស្រុកមួយចំនួនបានផ្សព្វផ្សាយនៅពេលកន្លងមកនោះទេ ។
លោកបញ្ជាក់ថា ជាការកាប់ឆ្ការព្រៃនៅក្នុងរង្វង់ដីដែលមន្ត្រីសុរិយោដីបានចុះទៅកាត់វៀលចែកជូនប្រជាពលរដ្ឋរួចហើយ ក៏ប៉ុន្តែមិនទាន់បានចេញប័ណ្ណកម្មសិទ្ធិស្របច្បាប់ជូនពួកគាត់តែប៉ុណ្ណោះ ហើយក៏មិនប៉ះពាល់ដល់ការអភិវឌ្ឍ អភិរក្សឧទ្យានជាតិរបស់ក្រសួងបរិស្ថាន ដែលមានផ្ទៃដីចំនួន២.៦៥៥ហិកតានោះដែរ ។
លោកអភិបាលខេត្ត ក៏បានសំណូមពរឱ្យប្រជាពលរដ្ឋដែលមានដីនៅតំបន់កោះ ក៏ដូចជាតំបន់ផ្សេងទៀត សូមកុំបន្តកាប់រានដីព្រៃដែលមន្ត្រីវាស់វែងរួចទៀត ត្រូវចូលរួមថែរក្សា ស្រឡាញ់ព្រៃឈើធម្មជាតិ ការអភិវឌ្ឍត្រូវតែមានការប៉ះពាល់តិចតួចប៉ុណ្ណោះ ដើម្បីរក្សាសោភ័ណភាពតំបន់កោះ ។ បើធ្វើការអភិវឌ្ឍត្រូវសហការជាមួយអាជ្ញាធរភូមិ ឃុំ សង្កាត់ ក្រុង ខេត្ត ដោយសុំច្បាប់និងមានលិខិតបទដ្ឋាននានាឱ្យបានត្រឹមត្រូវតាមផ្លូវច្បាប់ជាមុនសិន ជៀសវាងការខាតបង់ថវិកា និងពេលវេលា ៕
ចែករំលែកព័តមាននេះ