ស្ត្រីដែលឆ្លងកាត់ជំងឺមហារីកសុដន់ និងភាគច្រើនបានកាត់សុដន់ទាំងសងខាងចោល បានប្រមូលផ្តុំគ្នាបង្ហាញម៉ូដលើវេទិកានៅក្រុងញូវយ៉ក សហរដ្ឋអាមេរិក ។ ស្ត្រីទាំងនោះបង្ហាញឈុត«The Ana Ono Intimates»ដែលច្នៃម៉ូដដោយនាងDana Donofreeជនជាតិអាមេរិកជានារីរួចផុតពីការស្លាប់ដោយមហារីកសុដន់ ។
បណ្តាតារាបង្ហាញម៉ូដ នៅលើវេទិកានោះមានជិតពាក់កណ្តាលបានវះកាត់សុដន់ចោល ។ ពួកនាងនាំគ្នាបង្ហាញឈុតក្នុងស្ត្រីគួរឱ្យគយគន់ ។
ចំណែកនាងDonofreeអ្នកច្នៃម៉ូដដែលបានវះកាត់សុដន់ទាំងសងខាង ឱ្យដឹងថានាងចាប់ផ្តើមចេញម៉ូដឈុតក្នុងស្ត្រីដែលធ្លាប់ឆ្លងកាត់ការវះកាត់សុដន់ ព្រោះនាងប្រទះឃើញថាឈុតក្នុងស្ត្រីធម្មតាមិនសក្តិសមទៅលើអ្នកកើតមហារីកសុដន់ទេ ។
ចំពោះប្រាក់ចំណូលដែលទទួលបានពីការបង្ហាញម៉ូដនោះនឹងប្រគល់ជូនមូលនិធិសប្បុរសធម៌«Cancer Land»សហរដ្ឋអាមេរិក ៕
ចែករំលែកព័តមាននេះ