រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានឲ្យដឹងថា វិនិយោគិនជប៉ុនជាច្រើននឹងមកទស្សនកិច្ចសិក្សាឈ្វេងយល់ពីលក្ខខណ្ឌ និងសក្តានុពលវិនិយោគនៅកម្ពុជាបន្ថែមទៀតនាពេលខាងមុខ ។ ការថ្លែងបែបនេះ បន្ទាប់ពីចូលរួមនៅក្នុងវេទិកាវិនិយោគកម្ពុជា-ជប៉ុន ស្តីពី «ស្ថានភាពសេដ្ឋកិច្ច និងគោលនយោបាយវិនិយោគកម្ពុជា» ដែលរៀបចំឡើងដោយសមាគមជប៉ុន-កម្ពុជា កាលពីសប្តាហ៍មុន ។
លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានអញ្ជើញចូលរួមថ្លែងថា ក្នុងវេទិកានោះមានក្រុមហ៊ុនជប៉ុនធំៗចំនួន១៣០បានចូលរួម ហើយក្រុមហ៊ុនទាំងនោះក៏បានបង្ហាញពីការចាប់អារម្មណ៍ របស់ពួកគេ លើការវិនិយោគនៅកម្ពុជាផងដែរ ក្នុងនោះក៏មានវិនិយោគិនជប៉ុនមួយចំនួនបានបង្ហាញពីបំណងក្នុងការមកពិនិត្យស្ថានភាព និងសក្តានុពលវិនិយោគជាក់ស្ដែងនៅកម្ពុជានាពេលដ៏ខ្លីខាងមុខ ដើម្បីឲ្យកាន់ឃើញច្បាស់ពីសក្ដានុពលរបស់កម្ពុជាសម្រាប់ការវិនិយោគរបស់គេផងដែរ ។
លោកទេសរដ្ឋមន្ត្រីបន្តថា ៖ « ភាគីមិត្តជប៉ុនសន្យាថា នឹងបន្តគាំទ្រ និងពង្រឹងកិច្ចសហប្រតិបត្តិការទ្វេភាគីកម្ពុជា-ជប៉ុន លើគ្រប់វិស័យនានាដើម្បីរួមចំណែកលើកកម្ពស់ការអភិវឌ្ឍប្រទេសកម្ពុជា ជាមិត្តភាពដៃគូអភិវឌ្ឍល្អក្នុងរយៈពេលវែង និងជាប្រទេសដៃគូយុទ្ធសាស្ត្រ»។
នៅក្នុងឱកាសនៃការបំពេញទស្សនកិច្ចជាផ្លូវការរបស់ខ្លួនរយៈពេល១សប្ដាហ៍នៅប្រទេសជប៉ុននោះដែរ ភាគីជប៉ុនក៏បានស្នើសុំឲ្យកម្ពុជាគាំទ្រដល់ការរៀបចំពិព័រណ៍ពាណិជ្ជកម្មនៅទីក្រុងអូសាកា ក្នុងឆ្នាំ២០២៥ ខាងមុខនេះផងដែរ ។
យោងតាមរបាយការណ៍របស់ធនាគារអេស៊ីលីដា ភីអិលស៊ី បានដើរតួនាទីជាអ្នកទូទាត់សាច់ប្រាក់ជាមួយក្រុមវិនិយោគិនជប៉ុននៅកម្ពុជាឲ្យដឹងថា គិតរហូតដល់ដំណាច់ឆ្នាំ២០១៦កន្លងមកនេះ មានសាជីវកម្ម និងក្រុមហ៊ុនជប៉ុនជាលក្ខណៈឯកត្តជនជប៉ុនវិនិយោគនៅកម្ពុជាចំនួនជាង៩៧០ក្រុមហ៊ុន ។
លោក អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី ថ្លែងថា កម្ពុជានៅតែជាទីកន្លែងទាក់ទាញវិនិយោគិនជប៉ុន ហើយលោករំពឹងថា វិនិយោគិនជប៉ុននឹងមកវិនិយោគនៅកម្ពុជាកាន់តែច្រើនថែមទៀត ដោយសារកម្ពុជារក្សាបាននូវកំណើនសេដ្ឋកិច្ចរឹងមាំ ការរក្សាបាននូវស្ថិរភាពនយោបាយ ស្ថិរភាពសង្គម និងស្ថិរភាពម៉ាក្រូសេដ្ឋកិច្ច ជាពិសេស ច្បាប់កម្ពុជាបានអនុញ្ញាតឲ្យជនបរទេសកាន់កាប់ភាគហ៊ុន១០០%របស់ខ្លួន ។
លោកបន្តថា ៖ « អ្នកវិនិយោគជប៉ុន មុននឹងមកវិនិយោគនៅប្រទេសណា ពួកគេបានសិក្សាច្បាស់លាស់ណាស់មុនសម្រេចចិត្តវិនិយោគ ហើយនៅពេលពួកគេមកវិនិយោគ ពួកគេមានឆន្ទៈក្នុងការវិនិយោគរយៈពេលវែងនៅប្រទេសដែលពួកគេទៅដល់ » ។
យោងតាមតួលេខដែលកត់ត្រាដោយក្រុមប្រឹក្សាអភិវឌ្ឍន៍កម្ពុជា ការវិនិយោគរបស់ជប៉ុននៅកម្ពុជាក្នុងឆ្នាំ២០១៦ មានទុនវិនិយោគសរុបប្រមាណ៨២២លានដុល្លារអាមេរិក ស្មើនឹង២២,៧៨%នៃទុនវិនិយោគសរុប ដែលធ្វើឱ្យជប៉ុនជាប់ចំណាត់ថ្នាក់លេខ៣ ក្នុងចំណោមប្រទេសវិនិយោគនៅកម្ពុជា ៕
ចែករំលែកព័តមាននេះ