ខេត្តព្រះសីហនុ ៖ បន្ទាប់ពីមានប្រតិកម្មខ្លាំងៗពីប្រជាពលរដ្ឋនៅតំបន់ព្រែកបី ភូមិ១ ឃុំទំនប់រលក ស្រុកស្ទឹងហាវ នាព្រឹកថ្ងៃទី៩ ខែកុម្ភៈ តំណាងក្រសួងរ៉ែនិងថាមពល មន្ទីរបរិស្ថានខេត្ត អាជ្ញាធរស្រុកស្ទឹងហាវ និងមន្ត្រីជលផល បានចុះទៅពិនិត្យមើលទីតាំងបូមខ្សាច់ និងកន្លែងចិញ្ចឹមត្រីសមុទ្រចំនួន៣២គ្រួសារប្រតិភូក្រសួងរ៉ែនិងថាមពលត្រួតពិនិត្យតំបន់ព្រែក3ដែលពលរដ្ឋប្រឆាំងការបូមខ្សាច់ក្នុងតំបន់ខាងលើ ។
ប្រជាពលរដ្ឋបានលើកឡើងថា ការបូមខ្សាច់របស់ក្រុមហ៊ុនMSKl នឹងធ្វើឱ្យខូចបរិស្ថាន ទឹកល្អក់មានក្លិនស្អុយ បង្កឱ្យងាប់ត្រីចិញ្ចឹមរបស់ពួកគាត់ដែលមានរាប់រយបែ និងធ្វើឱ្យបាត់ជម្រកធនធានមច្ឆជាតិគ្រប់ប្រភេទមានដូចជា មឹក បង្គា ក្តាម គ្រែង ដែលជាឆ្នាំងបាយរបស់ប្រជានេសាទក្រីក្រ ផ្អែកលើការនេសាទក្នុងតំបន់ទឹករាក់ ។
អ្នកស្រី យុទ្ធ សុធា ជាពលរដ្ឋម្នាក់ក្នុងចំណោមពលរដ្ឋសហគមន៍ចិញ្ចឹមត្រីស្ពុងនៅតំបន់ព្រែកបី និយាយថា ពួកគាត់មានមុខរបរចិញ្ចឹមត្រីនិងនេសាទបន្តិចបន្តូច មិនមានដីស្រែចម្ការឬមុខរបរអ្វីផ្សេងទេ គឺសង្ឃឹមតែប៉ុណ្ណឹង។ ដូចនេះ សូមឱ្យមន្ត្រីជំនាញពាក់ព័ន្ធមេត្តាពិនិត្យ ហើយបញ្ឈប់សកម្មភាពបូមខ្សាច់ជាបន្ទាន់ បើពុំដូច្នោះទេត្រីចិញ្ចឹមរបស់ពួកគាត់ច្បាស់ជាងាប់អស់មិនខានឡើយ នៅពេលក្រុមហ៊ុន MSKl ចាប់ផ្តើមបូមខ្សាច់ ។ ចំណែកឯប្រជាពលរដ្ឋប្រកបមុខរបរដាក់លបក្តាម ត្រី បង្គា នៅតំបន់នេះក៏ត្រូវបញ្ចប់អាជីពដែរ ។
លោក ខន សុគុន្ធ ជាអ្នកចិញ្ចឹមត្រីដូចគ្នា ក៏បានលើកឡើងដែរថា គ្រាន់តែសាឡង់ ចាប់ផ្តើមចាប់ខ្សាច់ពីទឹកសមុទ្រដើម្បីបើកផ្លូវឱ្យម៉ាស៊ីនបូមខ្សាច់ចូលរយៈពេលប៉ុន្មានថ្ងៃមកនេះ ធ្វើឱ្យត្រីចិញ្ចឹមរបស់គាត់ក៏ដូចជាបងប្អូនផ្សេងៗទៀតងាប់ជាហូរហែ ដោយក្នុងមួយថ្ងៃងាប់ពី២០ទៅ៣០ក្បាល ចុះទម្រាំធ្វើការបូមខ្សាច់វិញ ត្រីរបស់ពួកគាត់មិនដឹងជាមានបញ្ហាយ៉ាងណានោះទេ ។
លោក យស់ មុនីរ៉ាត់ អគ្គនាយករ៉ែនិងថាមពល មានប្រសាសន៍ថា ជុំវិញបញ្ហាបូមខ្សាច់នេះ មុននឹងក្រសួងពាក់ព័ន្ធសម្រេចចេញអាជ្ញាប័ណ្ណ គឺមន្ត្រីជំនាញបានចុះធ្វើការសិក្សារួចហើយ វាមិនមានផលប៉ះពាល់អ្វីទេ ពីព្រោះការបូមខ្សាច់មិនមែនធ្វើនៅតាមបណ្តោយព្រែកដែលបងប្អូនកំពុងចិញ្ចឹមត្រីឡើយ គឺបួមនៅព្រែកខាងលើ ។
លោកសន្យាថា ទោះជាយ៉ាងណាក៏ដោយ បើសិនជាការចាប់ផ្តើមបូមខ្សាច់ហើយធ្វើឱ្យប៉ះពាល់ដល់ត្រីបងប្អូន ក្រុមការងារបស់លោកនឹងបញ្ឈប់សកម្មភាពបួមខ្សាច់នេះភ្លាម គឺមិនឱ្យបងប្អូនសហគមន៍ចិញ្ចឹមត្រីពិបាកនោះទេ។ ជាមួយគ្នានេះ លោកអគ្គនាយកក៏បានបញ្ជាក់ផងដែរថា ក្រុមហ៊ុនបូមខ្សាច់ខាងលើនេះមានអាជ្ញាប័ណ្ណត្រឹមត្រូវ ហើយការបូមខ្សាច់នេះមានរយៈពេលចាប់ពី៣ខែទៅ៥ខែសម្រាប់ផ្គត់ផ្គង់ឱ្យកំពង់ផែស្វយ័ត ក្រុងព្រះសីហនុ ក្នុងការពង្រីកផែតែប៉ុណ្ណោះ គឺមិនមែនអនុញ្ញាតឱ្យក្រុមហ៊ុនឯកជនបូមខ្សាច់យកទៅលក់នៅក្រៅប្រទេសឡើយ ។ ម្យ៉ាងទៀត នេះក៏ជាគម្រោងអភិវឌ្ឍន៍ដ៏ធំមួយផងដែររបស់រាជរដ្ឋាភិបាល ក្រោមជំនួយរបស់ប្រទេសជប៉ុន ។
ប៉ុន្តែការចរចាររកដំណោះស្រាយរវាងក្រុមការងារថ្នាក់ក្រសួងរ៉ែនិងថាមពល និងប្រជាពលរដ្ឋ ក្នុងសហគមន៍ចិញ្ចឹមត្រី អស់រយៈពេលជិតមួយថ្ងៃ ហាក់ដូចជាមិនទទួលបានលទ្ធផលអ្វីសោះ ។ មន្ត្រីជំនាញរបស់ក្រសួងរ៉ែនិងថាមពល បានលើកហេតុគ្រប់បែបយ៉ាង ក្នុងគោលដៅឈ្នះ-ឈ្នះទាំងអស់គ្នា គឺក្នុងគោលបំណងឱ្យសម្មភាព បូមខ្សាច់នៅតែបន្ត ហើយការចិញ្ចឹមត្រីចេះតែចិញ្ចឹមជាធម្មតា បើមានបញ្ហាភាគីក្រុមហ៊ុនជាអ្នកទទួលខុសត្រូវទាំងស្រុងរាល់ការខូចខាត ។
សម្រាប់ភាគីប្រជាពលរដ្ឋបានប្រកាន់ជំហរ២ជម្រើស គឺទី១-ត្រូវបញ្ចប់សកម្មភាពទាំងស្រុងនៃការបូមខ្សាច់ និងទី២-បើក្រុមហ៊ុនចង់បន្តការបូមខ្សាច់ត្រូវបង់សំណងឱ្យពួកគាត់ចំនួន១៤គ្រួសារ ក្នុងមួយគ្រួសារប្រាំម៉ឺនដុល្លារឱ្យហើយ ដែលកិច្ចការនេះត្រូវទូទាត់ឱ្យហើយរួចរាល់ ចាំក្រុមហ៊ុនចាប់ដំណើរការបូមខ្សាច់ ។ ពួកគាត់នៅតែយល់ថា បើមានការបូមខ្សាច់នោះត្រីដែលពួកគាត់ចិញ្ចឹមច្បាស់ជាងាប់មិនខាន ។
ចំណែកក្រុមការងារថ្នាក់ក្រសួងរ៉ែនិងថាមពល បានលើកឡើងថា ការស្នើសុំនេះក្រុមការងារមិនមានលទ្ធភាពធ្វើការសម្រេចបែបណានោះទេ គឺបានត្រឹមទទួលយកសំណូមពររបស់ប្រជាពលរដ្ឋជូនទៅថ្នាក់ក្រសួងដើម្បីដោះស្រាយនិងសម្រេចតែប៉ុណ្ណោះ៕
ចែករំលែកព័តមាននេះ