រាជធានីភ្នំពេញ ៖ អគ្គនាយកនៃអគ្គនាយកដ្ឋានពន្ធដារគ្រោងប្រមូលពន្ធឲ្យបាន១.៧០០លានដុល្លារនៅឆ្នាំនេះ កើនឡើងពី១.៤៥០លានដុល្លារកាលពីឆ្នាំមុន ។
លោក អេង រតនា ប្រធាននាយកដ្ឋានអ្នកជាប់ពន្
រាជធានីភ្នំពេញ ៖ អគ្គនាយកនៃអគ្គនាយកដ្ឋានពន្ធដារគ្រោងប្រមូលពន្ធឲ្យបាន១.៧០០លានដុល្លារនៅឆ្នាំនេះ កើនឡើងពី១.៤៥០លានដុល្លារកាលពីឆ្នាំមុន ។
លោក អេង រតនា ប្រធាននាយកដ្ឋានអ្នកជាប់ពន្ធធំនៃអគ្គនាយកដ្ឋានពន្ធដារ ក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងសិក្ខាសាលាស្តីពី កាតព្វកិច្ចពន្ធចំពោះសហគ្រាសក្នុងវិស័យទេសចរណ៍ នាព្រឹកថ្ងៃទី៨ កុម្ភៈ ថា គោលនយោបាយកំណែទម្រង់របស់អគ្គនាយកដ្ឋានពន្ធដារ និងរាជរដ្ឋាភិបាល គឺធ្វើយ៉ាងណា ជំរុញឲ្យមានវប្បធម៌បង់ពន្ធកាន់តែច្រើន និងធ្វើឲ្យអ្នកជាប់កាតព្វកិច្ចពន្ធធ្វើការបង់ពន្ធ និងគោរពច្បាប់ ហើយអ្វីដែលសំខាន់នោះ គឺរាជរដ្ឋាភិបាលមិនដំឡើងពន្ធទេ គឺធ្វើយ៉ាងណាប្រមូលពន្ធឲ្យអស់ ។
លោកបន្តថា ៖ « យើងមិនមែនជាអ្នកគ្រប់គ្រងទេ តែយើងធ្វើជាដៃគូជាមួយវិស័យឯកជន ព្រោះពេលវិស័យឯកជនបង់ពន្ធត្រឹមត្រូវ យើងប្រមូលពន្ធបានតាមផែនការកំណត់របស់រាជរដ្ឋាភិបាល ។ ការកែទម្រង់របស់អគ្គនាយកដ្ឋានទទួលបានជោគជ័យក្នុងស្ថាប័នរដ្ឋ ដោយមានការកោតសរសើរ និងទទួលស្គាល់ពីសម្តេចតេជោនាយករដ្ឋមន្ត្រី » ។
លោក អេង រតនា បន្ថែមថា គ្មានអ្នកណាចង់បង់ពន្ធទេ តែវាជាកាតព្វកិច្ចត្រូវតែបង់ ហើយការផ្លាស់ប្តូរពីការបង់ពន្ធតាមរបបម៉ៅការ មកកាន់របបស្វ័យប្រកាស គឺដើម្បីឲ្យអ្នកជាប់ពន្ធប្រកាសពន្ធដោយខ្លួនឯង និងត្រូវបង់ពន្ធដោយខ្លួនឯង ហើយអគ្គនាយកដ្ឋានពន្ធដារ ក៏មានមន្ត្រីចុះធ្វើការងារដើម្បីធ្វើឲ្យប្រាកដថា តើអ្នកជាប់កាតព្វកិច្ចបង់ពន្ធ បានបង់ពន្ធត្រឹមត្រូវឬទេ ។ បើពួកគេមិនបង់ពន្ធ និងមិនធ្វើតាមនីតិវិធីរបស់អគ្គនាយកដ្ឋានពន្ធដារ ពួកគេនឹងត្រូវរងការពិន័យតាមសភាពជាក់ស្តែង ។
ជាមួយគ្នានេះ រាជរដ្ឋាភិបាលក៏បានលើកលែងពន្ធសម្រាប់ក្រុមហ៊ុនដែលមានប្រាក់ចំណូលចាប់ពី២៥០លានរៀលចុះផងដែរ ។
សេដ្ឋវិទូកម្ពុជាបានអបអរសាទរ និងលើកឡើងហាក់ប្រុងប្រយ័ត្នពីកំណើននៃការប្រមូលពន្ធនេះ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា យើងពិបាកយល់ពេលនិយាយពីការប្រមូលពន្ធ និងពន្ធប្រមូលបាន ប៉ុន្តែអ្វីដែលលោកកត់សម្គាល់ឃើញ គឺថាទំហំនៃពន្ធប្រមូលបាន មិនសមស្របនឹងទំហំពាណិជ្ជកម្ម និងសេដ្ឋកិច្ចកម្ពុជានៅឡើយ ។ កម្ពុជាត្រូវការប្រាក់ច្រើនដើម្បីមានលទ្ធភាពវិនិយោគដោយខ្លួនឯង ព្រោះកន្លងមកយើងតែងសុំគេ និងខ្ចីទុនពីគេ ។ ដូច្នេះយើងត្រូវពង្រឹងការប្រមូលពន្ធដើម្បីកាត់បន្ថយការពឹងផ្អែកលើគេច្រើនពេក និងគួររៀនរស់ដោយខ្លួនឯង ។
លោកបន្តថា ការបង្កើនការប្រមូលពន្ធ ក៏ត្រូវពិនិត្យមើលលើទិដ្ឋភាពបីគឺ ១-តើវាសមស្របនឹងតម្រូវការរបស់សេដ្ឋកិច្ចឬអត់ ព្រោះជួនកាល ការពង្រឹងការប្រមូលពន្ធ វាជាការសម្លាប់សេដ្ឋកិច្ច ។ ២-យើងត្រូវធ្វើអ្វីតាមតម្រូវការរបស់ជាតិ និងត្រូវគិតពីការយកប្រាក់មកធ្វើ និងជំរុញគោលនយោបាយសេដ្ឋកិច្ចជាតិ និង៣-ធ្វើយ៉ាងណា ឲ្យការយកពន្ធមានភាពសមធម៌ អ្នកមានយកប៉ុណ្ណា ហើយអ្នកក្រីក្រយកកម្រិតណា ។
លោកបន្តថា ៖ « ការងារប្រមូលពន្ធកន្លងមកមានការខិតខំ និងធ្វើការងារបានច្រើនពីអគ្គនាយកដ្ឋានពន្ធដារ ដែលគប្បីគួរឲ្យលើកទឹកចិត្ត ។ ការងារនេះ គឺមានការយកចិត្តទុកដាក់ និងការប្តេជ្ញាចិត្តខ្ពស់ណាស់ពីប្រធានស្ថាប័ន មានធនធានមនុស្ស និងសម្ភារបរិក្ខារគ្រប់គ្រាន់ » ៕
ចែករំលែកព័តមាននេះ