រាជធានីភ្នំពេញ ៖ នៅទីបំផុត កម្ពុជានឹងមានផ្សារបណ្តែតទឹកជាលើកដំបូង ដែលគ្រោងបើកឲ្យដំណើរការនៅអំឡុងត្រីមាសទី២ឆ្នាំនេះ ប្រសិនជាគ្មានអ្វីប្រែប្រួលទេនោះ ។
លោកឧកញ៉ា ស្រី ចាន់ថន អគ្គនាយកក្រុមហ៊ុន SKYLAND ដែលបាននិងកំពុងរៀបចំសហការជាមួយអ្នកជំនាញ និងក្រុមហ៊ុនមកពីប្រទេសថៃ ដើម្បីវិនិយោគលើផ្សារបណ្តែតទឹកជាលើកដំបូងនៅកម្ពុជា បានថ្លែងឲ្យដឹងកាលពីពេលថ្មីៗថា ការឌីសាញប្លង់ផ្សារបណ្តែតទឹកនេះបានចាប់ផ្តើមហើយ និងគ្រោងបញ្ចប់នៅពេលឆាប់ៗខាងមុខ ។
លោកបន្តថា ៖ « ដីក្នុងគម្រោងនេះមានទំហំ២០ហិកតា ដោយ១០ហិកតានឹងរៀបចំជាភ្នំសិប្បនិម្មិត ថ្ម កន្លែងដើរកម្សាន្ត និងចំណតយានយន្ត ។ ចំណែក១០ហិកតាទៀតបែកចែកជា២ជំហានបន្ថែម ហើយបច្ចុប្បន្ន ការរៀបចំដីបាននិងកំពុងចាប់ផ្តើមហើយ » ។
អ្នកជំនាញមកពីប្រទេសថៃចំនួន៩នាក់ នឹងមករៀបចំប្លង់មេ និងបែបបទនីតិវិធីដើម្បីរៀបចំផ្សារបណ្តែតទឹកនេះ ដែលនៅទីបញ្ចប់គម្រោងនេះអាចគ្របដណ្តប់លើផ្ទៃដីរហូតដល់៣០ហិកតា ។
លោកឧកញ៉ា ស្រី ចាន់ថន បន្ថែមថា ផ្សារបណ្តែតទឹកនេះនឹងរៀបចំឲ្យមានទូកលក់ទំនិញ និងផ្ទះដែលរៀបចំ និងរចនាឡើងតាមរចនាបថខ្មែរសុទ្ធ និងទូកធំៗមានប្រវែងរហូតដល់៤០ម៉ែត្រផងដែរ ។ ក្រុមហ៊ុនរៀបចំគម្រោងនេះ ដោយអាចទទួលមនុស្សទៅកម្សាន្តនៅតំបន់នោះពេលសាងសង់រួច ចន្លោះពី១ ទៅ២ម៉ឺននាក់ ដោយសារស្រុកខ្មែរមិនទាន់មានផ្សារបណ្តែតទឹកបែបនេះនៅឡើយទេ ហើយអ្វីដែលលោករៀបចំ គឺធ្វើឡើងដោយច្នៃប្រឌិត និងមានចំណែកខ្លះ ក្រុមហ៊ុនយកលំនាំមកពីប្រទេសថៃ ។
លោក ធួន ស៊ីណាន ប្រធានសហព័ន្ធទេសចរណ៍កម្ពុជា ថ្លែងថា ការរៀបចំទម្រង់ផ្សារបែបនេះទាមទារឲ្យមានអ្នកជំនាញចូលរួមកាន់តែច្រើនដើម្បីធ្វើឲ្យគម្រោង និងយុទ្ធសាស្ត្រទីផ្សារច្បាស់លាស់ និងទទួលបានជោគជ័យប្រកបដោយនិរន្តរភាព ។ លោកបន្តថា នេះជាផលិតផលទេសចរណ៍ថ្មីមួយទៀត ដែលកម្ពុជាគួរមានការវិនិយោគបន្ថែម ព្រោះកម្ពុជាមានកន្លែងកម្សាន្តតិចនៅឡើយ ។
លោក ហូ វណ្ឌី អគ្គលេខាធិការសម្ព័ន្ធសមាគមទេសចរណ៍ជាតិកម្ពុជា ដែលធ្លាប់បានដឹកនាំប្រធានក្រុមហ៊ុនទេសចរណ៍ធំៗមួយចំនួនទៅទស្សនកិច្ចនៅតំបន់ SKYLAND កន្លងមកថ្លែងថា ភាពជោគជ័យរបស់គម្រោងនេះគឺអាស្រ័យលើការរៀបចំហេដ្ឋារចនាសម្ព័ន្ធ ភាពទាក់ទាញ សន្តិសុខ និងសណ្តាប់ធ្នាប់នៅតំបន់នោះ ដែលក្រុមហ៊ុនបាននិងកំពុងរៀបចំបណ្តើរៗហើយ ។ បច្ចុប្បន្ន ក្រុមហ៊ុនបានផ្គត់ផ្គង់សម្ភារបរិក្ខារមានភាពទាក់ទាញជាច្រើន គួបផ្សំនឹងបរិស្ថានអំណោយផល ពិតជាទាក់ទាញទាំងភ្ញៀវទេសចរជាតិ និងអន្តរជាតិកាន់តែច្រើនទៅទស្សនានៅតំបន់នោះនាពេលអនាគត ។
លោកបន្តថា ៖ « តំបន់នោះមានភាពទាក់ទាញ ឬមានសក្តានុពលសម្រាប់ទាក់ទាញ ដោយសារតំបន់នោះមានព្រែកជីក និងស្ទឹងធម្មជាតិ ដែលមានភាពអំណោយផលលើបរិស្ថាន។ ប្រសិនជាស្ពានឆ្លងកាត់ពីតំបន់ជ្រោយចង្វា ទៅកាន់តំបន់ស្វាយជ្រុំបានសាងសង់រួចរាល់ នឹងធ្វើឲ្យតំបន់នោះនៅជិតទីក្រុងភ្នំពេញ និងធ្វើឲ្យគម្រោងនោះទាក់ទាញបាននូវភ្ញៀវទេសចរជាតិ និងអន្តរជាតិ » ៕
ចែករំលែកព័តមាននេះ