រាជធានីភ្នំពេញ ៖ បើនិយាយពីវិស័យអចលនទ្រព្យ ភាគច្រើនគឺផ្តោតទៅលើតែក្នុងតំបន់រាជធានីភ្នំពេញ ដោយឡែក នៅតាមបណ្ដាខេត្តនានាក្នុងព្រះរាជាណាចក្រកម្ពុជា ហាក់ពុំសូវមានអ្នកចាប់អារម្មណ៍ច្រើនឡើយ
រាជធានីភ្នំពេញ ៖ បើនិយាយពីវិស័យអចលនទ្រព្យ ភាគច្រើនគឺផ្តោតទៅលើតែក្នុងតំបន់រាជធានីភ្នំពេញ ដោយឡែក នៅតាមបណ្ដាខេត្តនានាក្នុងព្រះរាជាណាចក្រកម្ពុជា ហាក់ពុំសូវមានអ្នកចាប់អារម្មណ៍ច្រើនឡើយ ប៉ុន្តែបើសិនជាមានការអារម្មណ៍នោះ គឺវិនិយោគិនសម្លឹងមើលតែខេត្តណាដែលសម្បូរទៅដោយរមណីយដ្ឋានច្រើនដូចជា ខេត្តព្រះសីហនុ កំពត និងសៀមរាបជាដើម ។ ពេលនេះ កោះសន្តិភាពសូមលើកយកខេត្តមួយនៅជាប់តំបន់សមុទ្រ មកនិយាយទាក់ទងនឹងវិស័យអចលនទ្រព្យ ដែលផ្តោតទៅលើដីធ្លីតែម្ដង ។
លោក សុខ គែន អ្នកគ្រប់គ្រងក្រុមហ៊ុនវាយតម្លៃ និងភ្នាក់ងារអចលនទ្រព្យ Kampot Property បានឲ្យដឹងថា នៅឆ្នាំ២០១៧នេះ បើនិយាយពីវិស័យដីធ្លីនៅខេត្តកំពត ហាក់មានសញ្ញាល្អ ព្រោះវិនិយោគិនមួយចំនួនស្វែងរកដីសម្រាប់វិនិយោគ ទាំងដីនៅមាត់សមុទ្រ ដីនៅជិតគម្រោងអភិវឌ្ឍន៍ និងដីកសិកម្មផងដែរ ។ លោកនិយាយថា ៖ «បន្ទាប់ពីមានគម្រោងមួយចំនួនវិនិយោគនៅក្នុងទឹកដីខេត្តកំពត សកម្មភាពពុះដីឡូត៍សម្រាប់លក់បន្តមានច្រើន ។ ដូចនេះហើយទើបធ្វើឲ្យការស្វែងរកដីសម្រាប់ពុះលក់នោះ ក៏ច្រើនដែរ » ។
លោកបន្តថា ដីធ្លីនៅក្បែរតំបន់គម្រោងអភិវឌ្ឍន៍នៅខេត្តកំពតនោះ បានទាក់ទាញវិនិយោគិនជាច្រើនមករកទិញដីដើម្បីធ្វើអាជីវកម្មផ្សេងៗ ជាពិសេស សម្រាប់ពុះជាឡូត៍លក់បន្ត ដែលធ្វើឲ្យដីធ្លីនៅតំបន់ក្បែរៗនោះ ឡើងថ្លៃគួរឲ្យកត់សម្គាល់ ។ កាលពីមុន តម្លៃនៅតំបន់ក្បែរគម្រោងនោះមិនជាថ្លៃប៉ុន្មានទេ តែក្រោយពីមានគម្រោងមក ធ្វើឲ្យតម្លៃដីធ្លីកើនរហូតដល់ចន្លោះពី៨០ ទៅ២០០ដុល្លារអាមេរិកក្នុង១ម៉ែត្រការ៉េ ហើយសឹងតែរកទិញមិនបានផង ។
លោក គែន បន្ថែមថា ៖ « ក្នុងឆ្នាំ២០១៧នេះ ខ្ញុំគិតថា កំណើនអ្នកវិនិយោគស្វែងរកទិញដីធ្លីនៅក្នុងទឹកដីខេត្តកំពតមានច្រើន ហើយសកម្មភាពទិញលក់ដីធ្លី វាមមាញឹកតាំងពីចុងឆ្នាំ២០១៦ ពោលគឺចាប់ពីខែ១០ ខែ១១ និងខែ១២មកម្ល៉េះ ។ ចំពោះការទិញដីធ្លីនាពេលកន្លងមកនេះ ភាគច្រើនអ្នកទិញស្វែងរកនៅតំបន់ជិតឆ្នេរសមុទ្រ ហើយអភិវឌ្ឍន៍ជាផ្ទះលំហែកាយ ដែលធ្វើឲ្យមានតម្រូវការខ្ពស់សម្រាប់ដីធ្លីនៅជិតៗមាត់ឆ្នេរកាលពីពេលកន្លងមក ហើយរហូតមកដល់ពេលនេះ ក៏នៅតែមានតម្រូវការខ្ពស់ផងដែរ»។
លោកបន្ថែមទៀតថា ក្រៅពីដីធ្លីនៅតំបន់មាត់សមុទ្រ ដីប្រភេទកសិកម្មក៏មានអ្នករកទិញច្រើនណាស់ដែរ ប៉ុន្តែមិនមែនទិញសម្រាប់អភិវឌ្ឍន៍ខ្លួនឯងផ្ទាល់ទេ ភាគច្រើនអ្នកដែលទិញគឺទិញរក្សាទុកមួយរយៈរង់ចាំឲ្យដីឡើងថ្លៃ នឹងលក់ចេញវិញទៅឲ្យអ្នកដែលត្រូវការអភិវឌ្ឍន៍ ឬសម្រាប់ដាំម្រេច ឬក៏ដំណាំផ្សេងៗ ។
គួរបញ្ជាក់ថា នៅក្នុងខេត្តកំពត កាលពីពេលកន្លងមកក៏មានលេចឮនូវគម្រោងអភិវឌ្ឍន៍កំពង់ផែទឹកជ្រៅសម្រាប់នាំចេញ និងនាំចូលផងដែរ ហើយកាលពីពេលថ្មីៗនេះ ក៏មានវិនិយោគិនមួយក្រុមបានបង្ហាញពីចំណាប់អារម្មណ៍លើការវិនិយោគក្នុងខេត្តនេះ ដោយគ្រោងនឹងចំណាយទឹកប្រាក់ខ្ទង់ពាន់លានដុល្លារអាមេរិក ។ ទោះជាយ៉ាងណា នៅមិនទាន់ច្បាស់ពីគម្រោងនឹងចាប់ផ្ដើមពេលណានោះទេ ៕
ចែករំលែកព័តមាននេះ