រាជធានីភ្នំពេញ ៖ ភ្ញៀវទេសចរជាតិ និងអន្តរជាតិដែលទៅទស្សនានៅតំបន់ឆ្នេរ និងខេត្តសៀមរាបមានកំណើនខ្ពស់នៅក្នុងពិធីបុណ្យចូលឆ្នាំប្រពៃណីចិន-វៀតណាម កាលពីចុងសប្តាហ៍មុននេះ ។
លោក សយ ស៊ីណុល ប្រធានមន្ទីរទេសចរណ៍ខេត្តកំពត បានមានប្រសាសន៍នាព្រឹកថ្ងៃទី៣០ មករាថា ភ្ញៀវទេសចរជាតិ និងអន្តរជាតិទៅទស្សនានៅរមណីយដ្ឋាននានាក្នុងខេត្តកំពតមានការកើនឡើង បើធៀបនឹងរយៈពេលដូចគ្នាកាលពីឆ្នាំមុន ប៉ុន្តែលោកមិនទាន់បញ្ជាក់ពីតួលេខនៅឡើយទេ ដោយរង់ចាំបូកសរុបលទ្ធផលសិន ។ ក្នុងរយៈពេល៣ថ្ងៃកន្លងមក ភ្ញៀវទេសចរជាតិ អន្តរជាតិទៅទស្សនាខេត្តកំពត មានជាង៦ម៉ឺននាក់ ដោយគ្រាន់តែក្នុងថ្ងៃទី២៩ មករា មានរថយន្តជាង៥ពាន់គ្រឿងបានមកកាន់ខេត្តកំពត ។
លោកបន្តថា ៖ « ខេត្តកំពតបច្ចុប្បន្នមានរមណីយដ្ឋានទេសចរណ៍ចំនួន២៣កន្លែង ក្នុងនោះមានរមណីយដ្ឋានបែបអេកូទេសចរណ៍៤កន្លែង រមណីយដ្ឋានឡើងភ្នំ កន្លែងជិះខ្សែរ៉តឆ្លងព្រែកកំពត និងរមណីយដ្ឋានទេសចរណ៍វប្បធម៌ធម្មជាតិ និងប្រវត្តិសាស្ត្រមួយចំនួនទៀត។ បច្ចុប្បន្ន ខេត្តកំពតមានផ្ទះសំណាក់ និងសណ្ឋាគារសរុបចំនួន២.៥០០បន្ទប់ » ។
លោក សយ ស៊ីណុល បន្តទៀតថា ៖ «ដោយសារចំនួនបន្ទប់មានកម្រិត បានធ្វើឲ្យភ្ញៀវទេសចរស្នាក់នៅតាមដងព្រែកកំពត ខ្លះបោះតង់ ខ្លះចងមុង និងសម្រាកក្នុងរថយន្តផងដែរ។ ហេតុនេះ លោកសូមស្នើឲ្យវិស័យឯកជនចូលមកវិនិយោគលើសេវាបដិសណ្ឋារកិច្ចដូចជា ផ្ទះសំណាក់ និងសណ្ឋាគារក្នុងខេត្តបន្ថែមទៀត » ។
ប្រធានមន្ទីរទេសចរណ៍ខេត្តព្រះសីហនុ លោក តាំង សុចិត្រគ្រឹះស្នា ថ្លែងថា ខេត្តព្រះសីហនុ ក្នុងរយៈពេល៣ថ្ងៃកន្លងមកនេះ ទទួលបានភ្ញៀវទេសចរសរុប៨ម៉ឺន៣ពាន់នាក់ កើនឡើង១២,១៦% បើធៀបនឹងរយៈពេលដូចគ្នាកាលពីឆ្នាំមុន ។ ខេត្តនេះមានសណ្ឋាគារចំនួន៧៧ ផ្ទះសំណាក់៣០៣ ដែលមានបន្ទប់សរុបចំនួនជាង៨ពាន់បន្ទប់ ។
លោកបន្តថា សេវាបន្ទប់ និងចំណីអាហារបានកើនឡើងក្នុងរយៈពេលនេះ ប៉ុន្តែស្ថិតក្នុងតម្លៃអាចទទួលយកបាន ។
លោក ព្រុំ គន្ឋិ នាយករដ្ឋបាលសាលាខេត្តកែប បានថ្លែងឲ្យដឹងដែរថា ក្នុងរយៈពេល៣ថ្ងៃកន្លងមក ចំនួនភ្ញៀវទេសចរទៅទស្សនាខេត្តកែប មានចំនួន៥៧.៨៨២នាក់ កើនឡើងតិចតួច បើធៀបនឹងរយៈពេលដូចគ្នាកាលពីឆ្នាំមុន ក្នុងនោះមានភ្ញៀវទេសចរបរទេស១.៩៥៥នាក់។ ខេត្តនេះមានសណ្ឋាគារចំនួន១០ សរុប២៥៤បន្ទប់ និងមានផ្ទះសំណាក់៥៦ ស្មើនឹង៦២០បន្ទប់ ។
ខេត្តកែបមានរមណីយដ្ឋានដែលភ្ញៀវអាចទៅកម្សាន្តបានចំនួន៦កន្លែង រួមមាន កោះទន្សាយ ឆ្នេរលេងទឹក ឆ្នេរអង្កោល ភ្នំវល្លរ៍ ស្រែអំបិល និងរមណីយដ្ឋានវប្បធម៌ភ្នំសរសៀរ។
លោក ហូ វណ្ឌី អគ្គលេខាធិការសម្ព័ន្ធសមាគមទេសចរណ៍ជាតិកម្ពុជា បានថ្លែងថា តំបន់ឆ្នេរ និងតំបន់តាមរមណីយដ្ឋាននានាបានទទួលភ្ញៀវទេសចរកើនឡើងក្នុងប៉ុន្មានឆ្នាំកន្លងមកនេះ ។
ដោយឡែក ក្នុងរយៈពេលប៉ុន្មានថ្ងៃ ដែលជាពេលពិធីបុណ្យចូលឆ្នាំប្រពៃណីជាតិចិន និងវៀតណាម ចំនួនភ្ញៀវទេសចរបានបន្តកើនឡើងផងដែរ ជាពិសេស បណ្តាខេត្តតាមតំបន់ឆ្នេរ ដែលក្រសួងទេសចរណ៍បានដាក់ចេញនូវយុទ្ធនាការឆ្នេរស្អាត ទីក្រុងល្អ ។
លោកបន្តថា ៖ « ជាមួយនឹងកំណើនកើនឡើងនេះ នៅតាមបណ្តាឆ្នេរ និងកោះនានាក៏ប្រឈមមុខនឹងការបំពុលបរិស្ថានផងដែរ ។ ហេតុនេះ សូមអាជ្ញាធរពាក់ព័ន្ធ និងប្រជាពលរដ្ឋចូលរួមសម្អាតអនាម័យ រក្សាសន្តិសុខ សុវត្ថិភាពដល់ភ្ញៀវទាំងផ្លូវកាយ និងផ្លូវចិត្ត ជាពិសេស ផ្តោតលើបញ្ហាបរិស្ថាន និងអនាម័យឲ្យបានល្អប្រសើរ » ៕
ចែករំលែកព័តមាននេះ