ពាក្យថា «អ្នកវិនិយោគអចលនទ្រព្យ» គឺជាអ្វីដែលអ្នកណាៗក៏ចង់ធ្វើ ចង់មានខុនដូឬផ្ទះសម្រាប់ជួល និងចង់មានដីទុកកេងចំណេញ ប៉ុន្តែមិនមានន័យថា អាចធ្វើទៅបានគ្រប់គ្នានោះទេ ។ ការវិនិយោគ ត្រូវមានប្រាក់គង់វង្ស ហើយចំណុចសំខាន់ គឺមានទម្លាប់សមជាអ្នកវិនិយោគអចលនទ្រព្យដ៏ល្អ ដើម្បីជួយកាត់បន្ថយហានិភ័យក្នុងការវិនិយោគឱ្យបានតិចបំផុត ។
ការវិនិយោគអចលនទ្រព្យ គឺត្រូវប្រើប្រាស់ប្រាក់ក្នុងចំនួនច្រើនលានឡើងទៅ ។ ដូច្នេះ បើសិនជាមិនគិតឱ្យល្អ ឬវិនិយោគដោយល្អិតល្អន់ទេ វាអាចនឹងបាត់បង់ច្រើនជាងទទួលបាន ។
នេះជាទម្លាប់ល្អ៦យ៉ាងរបស់អ្នកវិនិយោគអចលនទ្រព្យ ។ សាកល្បងពិនិត្យមើលថា ខ្លួនអ្នកមានទម្លាប់ទាំងនេះឬទេ បើសិនជាចំណុចណាដែលអ្នកគ្មាន ចូរធ្វើវាឱ្យក្លាយជាទម្លាប់ ។
១-ស្គាល់ពីការធ្វើផែនការ ៖
អ្នកវិនិយោគល្អត្រូវស្គាល់ពីការធ្វើផែនការទាំងរយៈពេលខ្លី និងរយៈពេលវែង ឬរហូតដល់ផែនការបន្ទាន់ដែលកើតឡើងដោយមិនបានគិតទុក ព្រោះការវិនិយោគអចលនទ្រព្យមានហានិភ័យខ្ពស់ និងអាចមានផលប៉ះពាល់យ៉ាងងាយពីកត្តាផ្សេងៗ មិនថាសេដ្ឋកិច្ចក្នុងប្រទេស និងនយោបាយ គឺសុទ្ធតែប៉ះពាល់ដល់អចលនទ្រព្យទាំងអស់ ។ ដូច្នេះ កត្តាខាងក្រៅទាំងនេះជារឿងដែលយើងគ្រប់គ្រងមិនបានឡើយ ។ វិធីល្អបំផុត គឺការដាក់ផែនការសម្រាប់ពេលមានហេតុការណ៍ទាំងនេះកើតឡើង ។
២-ស្ទង់មើលទីផ្សារ និងគូប្រជែងជារឿយៗ ៖
ក្រៅពីការធ្វើផែនការរួចហើយ ការស្ទង់មើលទីផ្សារ និងគូប្រជែង គឺជារឿងដែលចាំបាច់មិនចាញ់គ្នាឡើយ ព្រោះបើសិនជាយើងស្គាល់ពីការបត់បែនរបស់ទីផ្សារ និងគូប្រជែង នឹងធ្វើឱ្យយើងកែតម្រូវខ្លួនទាន់ ។ ជំនួញអចលនទ្រព្យត្រូវអាស្រ័យលើទីផ្សារជានិច្ច ហើយការស្ទង់មើលទីផ្សារ នឹងធ្វើឱ្យយើងដឹងថា ពេលនេះទីផ្សារកំពុងឡើងឬចុះ ពេលណាគួរលក់ ឬពេលណាគួរជួល និងក្នុងតម្លៃប៉ុន្មាន ។
៣-ស្មោះត្រង់ ៖
មនុស្សមួយចំនួន នៅពេលមានទិន្នន័យ និងចំណេះដឹងលើសអ្នកដទៃ គឺរមែងយកប្រៀប និងរកប្រយោជន៍ពីអ្នកដែលគ្មានព័ត៌មាន ។ អចលនទ្រព្យ ជាមុខជំនួញដែលពិបាកស្វែងរកព័ត៌មាន និងភាន់ច្រឡំជាងជំនួញផ្សេងៗ ។ ដូច្នេះ អ្នកវិនិយោគគ្រប់រូបត្រូវមានគុណធម៌ និងមិនយកប្រៀប ។ ភាពស្មោះត្រង់ ជាអ្វីដែលអ្នកវិនិយោគគ្រប់រូបគួរតែមានជាប់ខ្លួន មិនសំដៅតែអ្នកវិនិយោគអចលនទ្រព្យនោះទេ ។
៤-រៀនសូត្រជានិច្ច ៖
ការរៀនសូត្រមិនមានចុងបញ្ចប់ទេ មិនថាអ្នកជាបុគ្គលវិនិយោគដែលឆ្លាត និងទទួលបានជោគជ័យច្រើនប៉ុនណាក្តី ចូរកុំបញ្ឈប់ការរៀនសូត្រ និងរកចំណេះដឹងថ្មីៗជានិច្ច ដូចជាច្បាប់ ឬនិន្នាការសេដ្ឋកិច្ច ដែលនឹងជួយឱ្យយើងស្គាល់ និងយកមកប្រើប្រាស់កែតម្រូវវា ។
៥-ស្គាល់ពីហានិភ័យ និងរកផ្លូវចៀសវាង ៖
គ្រប់ការវិនិយោគតែងមានហានិភ័យ ការវិនិយោគក្នុងផ្នែកអចលនទ្រព្យក៏ដូចគ្នា គឺហានិភ័យអាចកើតឡើងគ្រប់ពេលវេលា ។ ហានិភ័យ ជាអ្វីដែលត្រូវនឹកដល់ដំបូងក្នុងការប្រកបមុខជំនួញ ប៉ុន្តែវាមិនត្រូវបានគេចាប់អារម្មណ៍ឡើយ ខណៈមនុស្សភាគច្រើនតែងសម្លឹងតែផ្លូវល្អនៃមុខជំនួញថា នឹងទទួលបានផលតបស្នងតាមចិត្តត្រូវការ ហើយអ្នកខ្លះមើលថា ហានិភ័យជារឿងនៅឆ្ងាយពីខ្លួន និងមិនកើតឡើងចំពោះគេ ។ អ្នកដែលគិតបែបនេះ នឹងបញ្ចប់មិនល្អប៉ុន្មានទេ ។ បើជ្រើសរើសវិនិយោគក្នុងផ្នែកអចលនទ្រព្យហើយ អ្នកត្រូវសិក្សា និងយល់ពីហានិភ័យដែលនឹងអាចកើតឡើង ព្រមទាំងរកវិធីកែប្រែ ។
៦-បង្កើត Connection ៖
អ្វីដែលអ្នកវិនិយោគគ្រប់រូបគួរមាន គឺ Connection ដ៏ច្រើន ព្រោះអចលនទ្រព្យជាជំនួញពាក់ព័ន្ធនឹងអាជីព មិនថាផ្នែកសាងសង់, ច្បាប់, ទីផ្សារ និងអាជីពផ្សេងទៀត ។ ការស្គាល់មនុស្សមានអាជីពទាំងនេះ នឹងជាការល្អដល់អ្នកសម្រាប់ពេលត្រូវការជំនួយ ឬសមត្ថភាពខ្លះ គឺត្រូវការអ្នកមានជំនាញទាំងនេះ ដូចជា បើត្រូវការពង្រីកថែមថយផ្ទះ គឺត្រូវទៅរកអ្នកទទួលសាងសង់ម៉ៅការល្អៗដែលអាចទុកចិត្តបាន ។ នៅពេលចុះកិច្ចសន្យាជួល គឺត្រូវប្រឹក្សាជាមួយអ្នកច្បាប់ដែលឈ្លាសវៃ ។ ដូច្នេះ វានឹងល្អបំផុត បើអ្នកស្គាល់មនុស្សមកពីច្រើនអាជីព ដែលអាចជួយគ្នាទៅវិញទៅមកបាន ៕
ចែករំលែកព័តមាននេះ