រាជធានីភ្នំពេញ ៖ ម្ចាស់អភិវឌ្ឍន៍គម្រោងមជ្ឈមណ្ឌលពិព័រណ៍ និងសន្និបាតកោះពេជ្រ បានឲ្យដឹងថា អគាររៀបចំមង្គលការនៅកោះពេជ្រទាំងអស់ នឹងត្រូវផ្លាស់ប្ដូរទៅទីតាំងថ្មីនៅចុងឆ្នាំនេះ ដើម្បីសម្រួលការកកស្ទះនៅទីក្រុង
រាជធានីភ្នំពេញ ៖ ម្ចាស់អភិវឌ្ឍន៍គម្រោងមជ្ឈមណ្ឌលពិព័រណ៍ និងសន្និបាតកោះពេជ្រ បានឲ្យដឹងថា អគាររៀបចំមង្គលការនៅកោះពេជ្រទាំងអស់ នឹងត្រូវផ្លាស់ប្ដូរទៅទីតាំងថ្មីនៅចុងឆ្នាំនេះ ដើម្បីសម្រួលការកកស្ទះនៅទីក្រុងកោះពេជ្រ នៅពេលមានពិធីមង្គលការច្រើននៅទីនោះ។ ការផ្លាស់ប្ដូរទីតាំងថ្មីនេះ ក៏ដើម្បីលើកកម្ពស់សក្ដានុពលនៃតំបន់ថ្មីនោះឱ្យមានសកម្មភាពខ្លាំងឡើងផងដែរ ។
អ្នកឧកញ៉ា ពុង ឃាវសែ អគ្គនាយកក្រុមហ៊ុនវិនិយោគទុនអាណិកជនកម្ពុជា បានឱ្យដឹងថា អគារមង្គលការនៅកោះពេជ្រ នឹងត្រូវលើកទៅដាក់នៅគម្រោងទីក្រុងរណបជ្រោយចង្វារ គឺដាក់នៅក្នុងបុរីរុងរឿងតែម្ដង ដើម្បីឱ្យប្រជាជននៅក្នុងតំបន់មានការងារធ្វើច្រើន និងដើម្បីកែប្រែតំបន់នោះឱ្យកាន់តែមមាញឹកក្នុងអាជីវកម្មថែមទៀត។ លោកថ្លែងថា ៖ « យើងនឹងផ្ទេរមជ្ឈមណ្ឌលពិព័រណ៍កោះពេជ្រ មកកន្លែងតំបន់អភិវឌ្ឍន៍ជ្រោយចង្វារ ជាពិសេសនៅក្នុងគម្រោងបុរីរុងរឿងនេះ ពីព្រោះនៅកោះពេជ្រ ឱ្យតែមានពិធីមង្គលការច្រើនម្ដងៗ ឃើញថាចរាចរណ៍មានការកកស្ទះខ្លាំង ដូចនេះយើងចង់ផ្ទេរឱ្យអ្នករៀបការមកជួលអគារនៅកន្លែងថ្មីដែលយើងត្រៀមធ្វើសម្រាប់ជួលឱ្យពួកគាត់ » ។
អ្នកឧកញ៉ាបន្តថា នៅពេលដែលគម្រោងអគារមជ្ឈមណ្ឌលសម្រាប់ជួលជាអគារធ្វើរួចរាល់ ប្រាកដជាមានអ្នកជួលច្រើន ហើយនៅពេលនោះ តំបន់នោះនឹងក្លាយជាតំបន់អ៊ូអរ ហើយពេលនោះ ប្រជាពលរដ្ឋនៅក្នុងបុរីរុងរឿង និងប្រជាពលរដ្ឋនៅក្នុងតំបន់អភិវឌ្ឍន៍ទាំងមូល នឹងកាន់តែមានឱកាសក្នុងការរកទទួលទាន ។ លោកបន្ត ៖ « ពេលនេះយើងត្រៀមបញ្ជូនកម្មករពីកោះពេជ្រប្រមាណ១.០០០នាក់នៅក្នុងឆ្នាំនេះ ទៅតំបន់តំបន់អភិវឌ្ឍន៍ជ្រោយចង្វារ ដើម្បីធ្វើការងារអភិវឌ្ឍន៍គម្រោងជាបណ្ដើរៗ ហើយនៅពេលអនាគត នឹងផ្ទេរពីកោះពេជ្រទៅតំបន់នោះទាំងអស់ គឺធ្វើយ៉ាងណាឱ្យគម្រោងទីក្រុងរណបជ្រោយចង្វារមានការអភិវឌ្ឍន៍ដូចទីក្រុងកោះពេជ្រដែរ » ។
លោកបន្ថែមថា ៖« យើងកំពុងមានគម្រោងធំមួយនៅក្នុងតំបន់អភិវឌ្ឍន៍ជ្រោយចង្វារ គឺគម្រោងផ្សារធំមួយ ដូចនឹងផ្សារទំនើបអុីអនអីចឹងដែរ ហើយនៅពេលដែលគម្រោងផ្សារនោះចេញជារូបរាង នោះតម្លៃដីធ្លីផ្ទះសម្បែង នឹងបន្តឡើងថ្លៃទៀត ដូចនេះអ្នកមានផ្ទះនៅក្នុងតំបន់អភិវឌ្ឍន៍នេះស្រាប់ នឹងអាចទទួលបានអត្ថប្រយោជន៍ច្រើនថែមទៀត គឺផ្ទះនឹងឡើងថ្លៃទ្វេជាពីរជាបី» ។
លោក ទូច សំណាង អគ្គនាយករងក្រុមហ៊ុនវិនិយោគទុនអាណិកជនកម្ពុជា( OCIC ) បានឱ្យដឹងដែរថា ការផ្ទេរអគាររៀបចំពិធីមង្គលការពីកោះពេជ្រទៅតំបន់អភិវឌ្ឍន៍ជ្រោយចង្វារ នឹងចាប់ផ្ដើមនៅចុងឆ្នាំនេះហើយ ដូចនេះអាចនិយាយថា រយៈពេលពីរឆ្នាំទៀត ពោលគឺនៅឆ្នាំ២០១៩ ប្រជាពលរដ្ឋ អាចជួលអគាររៀបចំពិធីមង្គលការទទួលភ្ញៀវបាន ។ លោកនិយាយថា ៖ « ការរុះរើចេញពីកោះពេជ្រទៅជ្រោយចង្វារដូចអ្នកឧកញ៉ាមានប្រសាសន៍អីចឹង ដើម្បីកុំឱ្យមានការកកស្ទះខ្លាំងពេកនៅកោះពេជ្រ នៅមានការជួលការម្ដងៗ ហើយការរុះរើចេញនេះ ក៏យើងមិនទាន់មានគម្រោងអភិវឌ្ឍន៍អ្វីនៅឡើយ » ។
លោកបន្តថា ពេលនេះប្រជាពលរដ្ឋនៅតែអាចជួលអគារកោះពេជ្រសម្រាប់ធ្វើពិធីមង្គលការបាន ព្រោះក្រុមហ៊ុនមិនទាន់មានគម្រោងបិទការជួលទាំងស្រុងនោះទេ ។
បើតាមអ្នកវាយតម្លៃអចលនវត្ថុនៅកម្ពុជាជាច្រើនបានបញ្ចេញមតិស្រដៀងគ្នាថា តម្លៃដីធ្លីនៅតំបន់ជ្រោយចង្វារនោះបានឡើងថ្លៃជាបន្តបន្ទាប់ ហើយនៅពេលនេះនៅតំបន់ជ្រោយចង្វារមានគម្រោងជាច្រើនកំពុងសាងសង់ និង កំពុងដំណើរការសាងសង់នៅពេលខាងមុខទៀត ។
គួរបញ្ជាក់ថា តំបន់អភិវឌ្ឍន៍ជ្រោយចង្វារ ទទួលបានអាជ្ញាប័ណ្ណពីរាជរដ្ឋាភិបាល អភិវឌ្ឍន៍ជាទីក្រុងរណប ដោយក្រុមហ៊ុនOCICលើទំហំផ្ទៃដីប្រមាណ៣០០ហិកតា និងបានបោះទុនសាងសង់ហេដ្ឋារចនាសម្ព័ន្ធ ដើម្បីប្រែក្លាយតំបន់នោះ ឱ្យទៅជាទីក្រុងថ្មីមួយនៅជាយរាជធានីភ្នំពេញ ៕
ចែករំលែកព័តមាននេះ