ខេត្តព្រះសីហនុ ៖ ប្រជាពលរដ្ឋដែលជាអ្នកនេសាទសមុទ្រ និងខ្លះទៀតជាកម្មករ កម្មការិនីរោងចក្រធ្យូងថ្មរស់នៅចំណុចព្រែក២ ស្ថិតក្នុងភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ ស្នើសុំដល់សម្ដេចតេជោ…
ខេត្តព្រះសីហនុ ៖ ប្រជាពលរដ្ឋដែលជាអ្នកនេសាទសមុទ្រ និងខ្លះទៀតជាកម្មករ កម្មការិនីរោងចក្រធ្យូងថ្មរស់នៅចំណុចព្រែក២ ស្ថិតក្នុងភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ ស្នើសុំដល់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ជួយអន្តរាគមន៍ដល់ពួកគាត់ដែលកំពុងរងគ្រោះនៅក្នុងជម្លោះដណ្តើមកាន់កាប់ដីធ្លីនៅក្នុងដែនសហគមន៍នេសាទទំនប់រលក ស្រុកស្ទឹងហាវ ខេត្តព្រះសីហនុ ដែលបង្កឡើងដោយការឃុបឃិតពីសំណាក់អ្នកមានប្រាក់ និងអំណាចមកពីរាជធានីភ្នំពេញឈ្មោះលោកស្រី ហៀង គឹមហួយ ។
នៅព្រឹកថ្ងៃទី២៤ សីហា ឆ្នាំ២០២២ កន្លងមកនេះ ប្រជាពលរដ្ឋដែលមានមុខរបរជាអ្នកនេសាទសមុទ្រនិងជាកម្មករ បម្រើការងារនៅរោងចក្រដើរដោយថាមពលធ្យូងថ្មស្រុកស្ទឹងហាវ ខេត្តព្រះសីហនុ ដែលមានលំនៅឋាន ស្ថិតនៅចំណុចព្រែក២ ឃុំទំនប់រលក ស្រុកស្ទឹងហាវ ខេត្តព្រះសីហនុ បានមកប្រមូលផ្តុំគ្នានៅលើទីតាំងដីលំនៅឋាន ដែលជនមិនស្គាល់អត្តសញ្ញាណបានប្រើប្រាស់កម្លាំងមកគំរាមកំហែងបង្កភាពភយ័ខ្លាច និងបានរុះរើផ្ទះសម្បែងបង្ខំឲ្យចាកចេញពីទីតាំងដីដែលពួកគាត់បានរស់នៅអាស្រយ័ផលជាច្រើនឆ្នាំកន្លងមក ។
ប្រភពផ្តល់ព័ត័មានពីប្រជាពលរដ្ឋដែលជាប្រជានេសាទ និងជាកម្មករ កសិករនៅទីនោះ បានប្រាប់អ្នកសារព័ត៌មានយើងថា ប្រជាពលរដ្ឋដែលមានដីលំនៅឋានលើទីតាំងដីដែលកំពុងមានវិវាទជាង១០០គ្រួសារលើផ្ទៃដីជាង២៥ហិកតា និងមានផ្ទះជាង៦០ខ្នងផ្ទះ និងរស់នៅជាក់ស្ដែងជាង៦០គ្រួសារ។ ប្រជាពលរដ្ឋទាំងនោះលើកឡើងថា គាត់រស់នៅទីនេះអាស្រ័យផលមានដាំដំណាំវិលជុំមានដូចជាដំឡូងមីដំឡូងជ្វា ននោង ត្រឡាច ចេក ។ល។
ដើម្បីដោះដូរជីវភាពប្រចាំថ្ងៃ និងដាំដំណាំយុទ្ធសាស្ត្រមួយចំនួនមានដូចជាស្វាយ ខ្នុរ ស្វាយចន្ទី ។ ក្រៅពីដាំដំណាំអាស្រ័យផលលើដីនេះ ពួកគាត់បានប្រកបរបរនេសាទសមុទ្រខ្នាតតូចយកត្រីសាច់ទាំងនោះទៅដោះដូរនៅទីផ្សារយកប្រាក់ទិញអង្ករផ្គត់ផ្គង់ជីវភាព និងអ្នកខ្លះទៀបានទៅធ្វើជាកម្មកររោងចក្រធ្យូងថ្មយកប្រាក់ខែផ្គត់ផ្គង់ក្នុងគ្រួសារ ។ ប្រជានេសាទបានលើកឡើងថា ទើបតែមួយរយៈចុងក្រោយនេះ ស្រាប់តែមានបុគ្គលមិនស្គាល់អត្តសញ្ញាណបានមកបំផិតបំភ័យពួកគាត់ដោយចោទថា ពួកគាត់មករស់នៅលើដីរបស់គេទៅវិញ ។
ស្ត្រីវ័យចំណាស់ម្នាក់បានរៀបរាប់ទាំងអួលដើម.កថា កាលពីរសៀលថ្ងៃទី២១ ខែសីហា ឆ្នាំ២០២២ កន្លងមកនេះ កូនស្រីបង្កើតរបស់គាត់ឈ្មោះ សំ អោយ អាយុ៥១ឆ្នាំ និងឈ្មោះផែង ចន្ទ្រា អាយុ៣៦ឆ្នាំ ភេទស្រី.ប្រកបរបនេសាទ ត្រូវបានជនមិនស្គាល់អត្តសញ្ញាណបញ្ឆោតឲ្យដឹកត្រីយកទៅឲ្យបុរស០៤នាក់នៅរង់ចាំឯឆ្នេរកំសាន្តថ្មយក្សក្នុងស្រុកស្ទឹងហាវ ខេត្តព្រះសីហនុ ពេលកូនគាត់ដឹកត្រី និងមាន់មកដល់ចំណុចរង្វង់មូល ក្នុងឃុំអូរត្រេះ ត្រូវបានបុរសមិនស្គាល់អត្តសញ្ញាណទាំង០៤នាក់នោះឃាត់ខ្លួនចាប់ដាក់ក្នុងរថយន្តដឹកមកឃុំខ្លួននៅស្នងការដ្ឋាននគរបាលខេត្តព្រះសីហនុតែម្តង។
ក្រោយមក ពេលឃុំខ្លួនកូនស្រីរបស់គាត់អស់រយៈពេលពីរយប់ និងបីថ្ងៃបង្ខិតបង្ខំឲ្យកូនស្រីតបស់គាត់ព្រមព្រៀងផ្តិតមេដៃលើឯសារ ដើម្បីរុះរើផ្ទះចេញពីទីតាំងដីដែលធ្លាប់រស់នៅនោះទៅទើបគេដោះលែងកូន។ ស្ត្រីវ័យចំណាស់រូបនោះបានបន្តឲ្យដឹងទៀតថា ដោយឮថា គេចាប់ខ្លួនកូនស្រីហើយបង្ខំឲ្យរុះរើផ្ទះចេញទើបគេដោះលែងកូនគាត់ រូបគាត់ឮដូច្នេះ ក៏ភ័យពេកហើយក៏ធ្វើការរុះរើផ្ទះដែលធ្លាប់រស់នៅរាល់ថ្ងៃថ្នូរនឹងការដោះលែងកូនស្រីគាត់តែម្តង។
ស្ត្រីរូបនេះ បានបញ្ជាក់ថា ក្រោយរុះរើផ្ទះរួចរាល់គេឱ្យថតផ្ទះនោះផ្ញើទៅគេ ទើបគេដោះលែងកូនស្រីឲ្យមានសេរីភាពឡើងវិញ បើមិនធ្វើតាមគេនោះទេគេមិនលែងកូនគាត់ឡើយ ។ ស្ត្រីរូបនោះបានបន្តទៀតថា ដោយមានការភ័យខ្លាំងពេក ក៏សម្រេចចិត្តធ្វើតាមគេរុះរើផ្ទះនោះ ដើម្បីឱ្យកូនបានវិលត្រឡប់មកជួបជុំគ្រួសារវិញ ហើយក្រោយគាត់បានរុះរើផ្ទះសម្បែងនិងថតរូបភាពផ្ញើឲ្យជនមិនស្គាល់អត្តសញ្ញាណកូនស្រីគាត់ក៏បានដោះលែងឲ្យមានសេរីភាពវិញហើយ ។
ទាក់ទិនជុំវិញបញ្ហាទំនាស់ដីធ្លីខាងលើនេះ លោកស្រី ធិន ចន្ថា និងលោកស្រី តូច សុខសាវឿន ប្រជាពលរដ្ឋដែលមានលំនៅឋាននៅទីនោះបានរៀបរាប់ស្រដៀងគ្នាថា រូបគាត់បានមករស់នៅទីនេះជាយូរឆ្នាំកន្លងមកហើយ ពុំដែលមានពាក់ព័ន្ធបញ្ហាដីធ្លីនេះ ជាមួយបុគ្គលណានោះឡើយ ហើយគាត់រស់នៅលើដីនេះគឺជាដីសហគមន៍មានផែនទីគ្រប់គ្រងដោយសហគមន៍នេសាទការពារព្រៃលិចទឹក ទំនប់រលក ស្រុកស្ទឹងហាវ ខេត្តព្រះសីហនុ ។
ដោយមានការទទួលស្គាល់នឹងចុះហត្ថលេខាដោយលោក គីម ហាក់ ប្រធានសហគមន៍នេសាទទំនប់រលកកាលពីថ្ងៃទី១២ ខែកញ្ញា ឆ្នាំ២០០៦ នឹងឯកភាពចុះហត្ថលេខាបោះត្រាដោយចៅសង្កាត់ទំនប់រលកលោក ហ៊ីង សុវណ្ណ កាលពីថ្ងៃទី១២ខែកញ្ញាឆ្នាំ២០០៦ បានឯកភាពនឹងចុះហត្ថលេខាបោះត្រាដោយលោក ម៉ី គាំង អភិបាលស្រុកស្ទឹងហាវនៅថ្ងៃទី១២ ខែកញ្ញា ឆ្នាំ២០០៦ បានឯកភាពចុះហត្ថលេខាពីប្រធានការិយាល័យជលផលក្រុងព្រះសីហនុលោក ដួង សំអាត នៅថ្ងៃទី២៧ខែកញ្ញាឆ្នាំ២០០៦ បានឯកភាពចុះហត្ថលេខាបោះត្រាដោយលោកប្រធានមន្ទីរកសិកម្មក្រុងព្រះសីហនុលោក កែ ផា នៅថ្ងៃទី០៤ ខែតុលា ឆ្នាំ២០០៦និងចុងក្រោយឯកភាពចុះហត្ថលេខាដោយអភិបាលក្រុងព្រះសីហនុនៅថ្ងៃទី១៧ ខែមករាឆ្នាំ ២០០៧ដែលជាភស្តុតាងបង្ហាញថាដីដែលពួកគាត់កំពុងកាន់កាប់រស់នៅអាស្រ័យផលគឺជាដីសហគមន៍ពិតប្រាកដមិនមែនរស់នៅលើដីបុគ្គលណានោះឡើយ។
ជាចុងក្រោយ ប្រជានេសាទដែលជាប្រជាពលរដ្ឋមានទីលំនៅទីតាំងខាងលើ ស្នើសុំឲ្យអាជ្ញាធរគ្រប់ជាន់ថ្នាក់ ពិសេសសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន មេត្តាជួយរកយុត្តិធម៌ និងផ្ដល់យុត្តិធម៌ដល់ពួកគាត់ដែលជាប្រជាពលរដ្ឋក្រីក្រប្រកបមុខរបរនេសាទសមុទ្រខ្នាតតូច និងអ្នកខ្លះទៀតជាកម្មកររោងចក្រដូចបានរៀបរាប់ខាងលើដោយក្តីគោរពពីកូនចៅ ។ ជុំវិញបញ្ហាខាងលើនេះ លោក ឆាយ សុគន្ធដា អភិបាលស្រុកស្ទឹងហាវ នាព្រឹកថ្ងៃទី២៣ ខែសីហាឆ្នាំ ២០២២កន្លងទៅ លោកបានមានប្រសាសន៍ប្រាប់អ្នកសារព័ត៌មានយើងថា ដីទីតាំងនោះគឺជាដីរបស់គេ ហើយគេមានលិខិតកាន់កាប់។ លោកបញ្ជាក់ថា ប្រជាពលរដ្ឋទាំងនោះ បានទៅរស់នៅលើដីកម្មសិទ្ធិរបស់គេ ។
តែទោះជាយ៉ាងណា ប្រជានេសាទទាំងនោះស្នើសុំឲ្យបុគ្គលដែលអះអាងថា ដីរបស់ខ្លួនហើយមានលិខិតកាន់កាប់សូមចេញមុខមកតតាំងគ្នានៅសាលាស្រុកជាមួយប្រជាពលរដ្ឋដោយយកលិខិតកាន់កាប់មកបង្ហាញទល់មុខគ្នានៅមុខអាជ្ញាធម៌ស្រុក ទើបពួកគាត់អស់ចិត្តនិងដោះស្រាយគ្នាដោយសន្តិវិធីកុំប្រើល្បិចចាប់បង្ខំប្រជាពលរដ្ឋឲ្យផ្តិតមេដៃរុះរើផ្ទះចេញពីទីតាំងដីដែលពួកគាត់បានកាន់កាប់អាស្រ័យផលកន្លងមកជាយូរឆ្នាំឲ្យចាកចេញដោយគ្មានមូលហេតុច្បាស់លាស់ដូច្នេះ។
ហើយនៅរសៀលថ្ងៃដដែល ប្រជាពលរដ្ឋជាច្រើននាក់បាននាំគ្នាមកប្រមូលផ្តុំនៅខាងមុខសាលាស្រុកស្ទឹងហាវ តាមការណាត់របស់អ្នកដែលអះអាងថា ជាតំណាងម្ចាស់ដី តែគួរឱ្យសោកស្ដាយពេលប្រជាពលរដ្ឋមកដល់សាលាស្រុកស្ទឹងហាវបែរជាតំណាងម្ចាស់ដីមិនបានមកជួបជាមួយប្រជាពលរដ្ឋតាមការណាត់ទៅវិញ ធ្វើឲ្យពួកគាត់មានការខកចិត្ត និងសោកស្តាយយ៉ាងខ្លាំង ដោយពួកគាត់លើកឡើងថា ការណាត់របស់ភាគីដែលអះអាងថា ដីរបស់ខ្លួនបែរជាមិនចូលខ្លួនមកជួបទៅវិញ ។
ដោយឡែក លោកស្រី ហៀង គឹមហួយ មានទីលំនៅឯរាជធានីភ្នំពេញ ដែលប្រជាពលរដ្ឋថាតាំងខ្លួនជាម្ចាស់ដីទំនាស់ជាមួយប្រជាពលរដ្ឋខាងលើ អ្នកសារព័ត៌មានយើងមិនអាចទំនាក់ទំនងសុំការបំភ្លឺពីលោកស្រីបានទេជុំវិញបញ្ហាខាងលើនេះ។ ដោយឡែក លោក គិម ហាក់ ប្រធានសហគមន៍នេសាទទំនប់រលក ឃុំទំនប់រលក ស្រុកស្ទឹងហាវ ខេត្តព្រះសីហនុ មិនអាចសុំការបំភ្លឺបានទេដោយសារលោកមិនលើកទូរសព្ទ័។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ