រាជធានីភ្នំពេញ ៖ លោកចាន់ រដ្ឋា ជាតារាសម្តែងដែលមានប្រភពចេញពីការប្រឡងហ្វ្រេសស៊ីប៊យ ទោះបីជាលោកមិនបានចេញមុខក្នុងពិភពសម្តែងច្រើន ក៏ភាពក្តាប់បានទំនាក់ទំនងក្នុងជួរសិល្បៈ នៅតែមានការរាក់ទាក់ពីតារាល្បីលំដាប់ប្រទេសយ៉ាងច្រើនផងដែរ ។
ជាក់ស្តែង កាលពីរាត្រីថ្ងៃទី២៥ មករា នាភោជនីយដ្ឋានវីហ្រេ្វន លោកបានរៀបចំពិធីខួបកំណើតគម្រប់វ័យ២៩ឆ្នាំ ដោយមានវត្តមានសុទ្ធតែតារាប្រុស-ស្រីល្បីឈ្មោះ ចូលរួមយ៉ាងច្រើន លើពីការរំពឹងទុក ធ្វើឲ្យសាមីខ្លួនជាតួឯកដាច់គេ មានអារម្មណ៍កក់ក្តៅចំពោះការស្រឡាញ់រាប់អានពីមិត្តរួមអាជីព និងភ្ញៀវកិត្តិយស ។
បញ្ជាក់ប្រាប់អ្នកយកព័ត៌មាននោះ លោកចាន់ រដ្ឋា ដែលរីកមុខមានអ្នកចូលរួមយ៉ាងច្រើន បានប្រាប់ថា លោកបានរៀបចំពិធីខួបកំណើតខ្នាតធំនេះ រយៈពេល៤លើកមកហើយ ដើម្បីលើករាសី និងរឹតចំណងមិត្តភាពជាមួយសិល្បករទាំងថ្មីទាំងចាស់ និងភ្ញៀវជាច្រើនទៀត ក៏ដូចជាលើកហុងស៊ុយឲ្យល្អព្រោះឆ្នាំនេះកៀក និងបុណ្យចូលឆ្នាំចិនគឺគិតថាជារឿងចៃដន្យល្អ ។
ការផ្តល់វត្តមានពីមិត្តរួមអាជីពកាន់តែធ្វើឲ្យលោកសប្បាយចិត្ត ដែលពួកគាត់នៅតែផ្តល់ការចូលរួមពេលមានរវល់ ។ ចំពោះសិល្បៈវិញ លោកនៅតែស្រឡាញ់ហើយក្រោយប្រឡងហ្វ្រេសស៊ីមកលោកបានប្រឡូកមួយរយៈបាត់មុខព្រោះតែងាកទៅរៀនសូត្រយកចំណេះខណៈដែលប៉ាម៉ាក់ចង់ឲ្យគិតរឿងរកស៊ីជាសំខាន់មិនចង់ឲ្យគិតរឿងសិល្បៈខ្លាំងទើបលោកងាកទៅរៀននិងបង្កើតមុខរបររកស៊ី ។
លោកថា បើទោះជាលោករវល់រៀន និងរកស៊ីលោកនៅតែឆ្លៀតពេលប្រឡូកការងារសិល្បៈ ព្រោះតែស្រឡាញ់ ដោយមិនឲ្យប៉ាម៉ាក់ដឹងនោះទេ ធ្វើម៉េចនេះជានិស្ស័យពីតូចមក តែយើងមិនចោលការរៀនសូត្រដែរ ។ ប្រឡូកសិល្បៈបានមួយរយៈលោកបានសម្តែងរឿងថតខារ៉ាអូខេ និងថតស្ប៉តមួយចំនួន ហើយពេលនេះ បើមានពេលលោកនឹងសម្តែងបន្តទៀតដោយមិនបោះបង់
ឡើយ។
វត្តមានចូលរួមនារាត្រីនោះ មានកញ្ញាទឹម រដ្ឋា, ទឹម វត្តី, ពេជ្រ អាវីហ្សា, កញ្ញាសាន សុម៉ាលី, កញ្ញាគង់ វង្សយ៉ាទី, កញ្ញាប៉ុប ពី, កញ្ញាលី អ៊ីវ៉ាធីណា, កញ្ញាសូដានីតា, លោកសាយ សៀរ៉ា, លោកញែម សុគន្ធ, លោកកុយ ស៊ីឌឿន, លោកអ៊ឹម ជីវ៉ា, លោកចាន់ណារូណាន់, លោកទ្រី តារាវុទ្ធ, លោកបញ្ញាសិទ្ធិ, លោកអិន សុភិន, អ្នកនាងភិន សុដាលីស, អ្នកនាងគីង សុរីយា, កញ្ញាយេរ យេរ, កញ្ញាផេងខេកកំប្លែង ព្រមទាំងតារាល្បីចាស់ថ្មីមួយចំនួនទៀងផងដែរ។
ចែករំលែកព័តមាននេះ