រាជធានីភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុព្យាករថា នៅឆ្នាំ២០១៧នេះ ស្ថានភាពម៉ាក្រូសេដ្ឋកិច្ច និងហិរញ្ញវត្ថុកម្ពុជានៅមានស្ថិរភាពល្អ ហើយកំណើនផលិតផលសរុបក្នុងស្រុក (ផ.ស.ស) នឹងអាចសម្រេចបានក្នុងរង្វង់៧%
រាជធានីភ្នំពេញ ៖ ក្រសួងសេដ្ឋកិច្ច និងហិរញ្ញវត្ថុព្យាករថា នៅឆ្នាំ២០១៧នេះ ស្ថានភាពម៉ាក្រូសេដ្ឋកិច្ច និងហិរញ្ញវត្ថុកម្ពុជានៅមានស្ថិរភាពល្អ ហើយកំណើនផលិតផលសរុបក្នុងស្រុក (ផ.ស.ស) នឹងអាចសម្រេចបានក្នុងរង្វង់៧% និងអតិផរណាស្ថិតក្នុងកម្រិតក្រោម៥% ។
ការរក្សាបាននូវកំណើន៧%ដូចឆ្នាំ២០១៦ ត្រូវការពឹងផ្អែកទៅលើការសម្រេចបាននូវវិស័យសំខាន់ៗមួយចំនួន ។
លោក ឈាង វណ្ណារិទ្ធ ប្រធាននាយកដ្ឋានគោលនយោបាយម៉ាក្រូសេដ្ឋកិច្ច និងសារពើពន្ធនៃអគ្គនាយកដ្ឋានគោលនយោបាយសេដ្ឋកិច្ច និងហិរញ្ញវត្ថុសាធារណៈរបស់ក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ក្នុងវេទិកាសាធារណៈ ស្តីពី «ការគ្រប់គ្រងម៉ាក្រូសេដ្ឋកិច្ច និងថវិកាឆ្នាំ២០១៧» កាលពីថ្ងៃទី២៣ មករា ថា វិស័យកសិកម្មអាចនឹងសម្រេចបានកំណើន១,៩៦% ដោយសារកត្តាអាកាសធាតុអំណោយផល និងការបង្កើនចំណាយរបស់រាជរដ្ឋាភិបាលដើម្បីគាំទ្រវិស័យនេះ ។ កំណើននេះអាចសម្រេចបានលុះត្រាតែមានការបង្កើនប្រសិទ្ធភាពក្នុងការអនុវត្តគោលនយោបាយ និងការចំណាយ។ វិស័យឧស្សាហកម្មអាចនឹងមានកំណើនថមថយបន្តិចបន្តួចប្រមាណ១០,៦៦% ដោយសារកំណើនយឺតនៃវិស័យសំណង់ ប៉ុន្តែនឹងត្រូវជួយបំពេញបន្ថែមដោយផលិតកម្មក្នុងស្រុក ។
ដើម្បីសម្រេចបានកំណើននៃផលិតផលក្នុងស្រុកនេះ ទាមទារឱ្យមានការជំរុញការអនុវត្តគោលនយោបាយអភិវឌ្ឍន៍វិស័យឧស្សាហកម្មប្រកបដោយប្រសិទ្ធភាព និងទាន់ពេលវេលា។ វិស័យសេវាកម្មអាចនឹងមានកំណើនប្រមាណ៦,២៩% ដោយសារការបន្តថមថយនៃវិស័យអចលនទ្រព្យ ប៉ុន្តែអាចនឹងជួយបំពេញបន្ថែមបានខ្លះដោយការងើបឡើងបន្តិចនៃវិស័យទេសចរណ៍ ស្របជាមួយការដាក់ចេញនូវគោលនយោបាយទាក់ទាញភ្ញៀវទេសចរ និងការបង្កើនជើងហោះហើរ ។
ទន្ទឹមនឹងក្រសួងព្យាករថា សេដ្ឋកិច្ចកម្ពុជាអាចរក្សាបានកំណើន៧% ប៉ុន្តែកម្ពុជាអាចនឹងជួបបញ្ហាប្រឈម ។ លោក ឈាង វណ្ណារិទ្ធ គូសបញ្ជាក់ថា ៖ « ភាពមិនប្រាកដប្រជានៃសេដ្ឋកិច្ចពិភពលោក ខណៈដែលភូមិសាស្ត្រនយោបាយមានភាពតឹងតែង, ភាពមិនប្រាកដប្រជានៃទំនាក់ទំនងពាណិជ្ជកម្មរវាងចិន និងអាមេរិក, ការថមថយនៃសេដ្ឋកិច្ចចិន, ការរឹតបន្តឹងគោលនយោបាយរូបិយវត្ថុរបស់សហរដ្ឋអាមេរិក ដែលធ្វើឱ្យអត្រាការប្រាក់ និងប្រាក់ដុល្លារឡើងថ្លៃ ជាហេតុធ្វើឱ្យប៉ះពាល់ភាពប្រកួតប្រជែងរបស់កម្ពុជា, ការថមថយសេដ្ឋកិច្ចប្រទេសក្នុងតំបន់អឺរ៉ុប និងកត្តាភូមិសាស្ត្រនយោបាយ » ។
លោកលើកឡើងថា ដើម្បីរក្សាបានអត្រាកំណើនសេដ្ឋកិច្ចឱ្យស្ថិតនៅ៧% គឺត្រូវរក្សាស្ថានភាពម៉ាក្រូសេដ្ឋកិច្ច ដោយបន្តលើកកម្ពស់ការវិនិយោគក្រៅប្រទេស និងក្នុងស្រុក ជាពិសេស ជំរុញការវិនិយោគឱ្យចំទិសដៅ, បន្តអនុវត្តគោលនយោបាយអភិវឌ្ឍន៍វិស័យឧស្សាហកម្ម ២០១៥-២០២៥ ឱ្យមានប្រសិទ្ធភាព បង្កើនសង្វាក់ផលិតកម្មមានតម្លៃបន្ថែមខ្ពស់ក្នុងវិស័យកាត់ដេរ ម្ហូបអាហារ ភេសជ្ជៈ គ្រឿងម៉ាស៊ីន គ្រឿងអេឡិចត្រូនិក និងឧស្សាហកម្មថ្មីៗទៀតជាមួយការបន្ត និងពង្រីកការអភិវឌ្ឍសហគ្រាសធុនតូច និងមធ្យម, បន្តពង្រីក និងពង្រឹងគុណភាពនៃការអប់រំ ជំនាញរឹង និងទន់ និងបច្ចេកវិទ្យាដើម្បីលើកកម្ពស់សមត្ថភាព និងចំណេះដឹង, រៀបចំផែនការមេក្នុងការអភិវឌ្ឍរចនាសម្ព័ន្ធ ឡូជីស្ទីក រួមទាំងការកាត់បន្ថយនូវតម្លៃអគ្គិសនី ក្នុងគោលដៅលើកកម្ពស់សមត្ថភាពប្រកួតប្រជែងរបស់កម្ពុជាចូលក្នុងទីផ្សារតំបន់និងអន្តរជាតិ និងបន្តអភិវឌ្ឍន៍ប្រព័ន្ធធារាសាស្ត្រដើម្បីបង្កើនទិន្នផល និងផលិតភាពក្នុងវិស័យកសិកម្ម ជាពិសេស បន្តពង្រឹងការអភិវឌ្ឍសេដ្ឋកិច្ចជនបទ ។
លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ថ្លែងថា ៖ «កំណើន៧%នេះសម្រាប់ស្តង់ដាពិភពលោក នាពេលសព្វថ្ងៃគឺខ្ពស់មែនទែន មានប្រទេសតិចណាស់ដែលមានកំណើន៧% ។ យើងមានកំណើនសេដ្ឋកិច្ច៧%យូរមកហើយ តាំងពីគេនៅ១០% ឥឡូវប្រទេសដែលមានកំណើន១០% រហូតធ្លាក់មក៥%ឬ៦% ប៉ុន្តែកម្ពុជានៅរក្សាបាន៧% ស្របនឹងបរិការសព្វថ្ងៃនេះ គឺជាមោទនភាពមួយដែរ » ៕
ចែករំលែកព័តមាននេះ