ខេត្តបាត់ដំបង ៖ រដ្ឋបាលក្រុងបាត់ដំបង ព្រមានចាត់វិធានការតាមផ្លូវច្បាប់ ហើយថែមទាំងប្រើប្រាស់កម្លាំងចុះរុះរើរឹបអូសយកសម្ភារនានានៅលើទីតាំងចំណតទូក ប្រសិនបើម្ចាស់អាជីវកម្មនេះ មិនព្រមអនុវត្តតាមសេចក្ដីជូនដំណឹងរបស់រដ្ឋបាលក្រុង ដែលប្រកាសជូនដំណឹងជាលើកទី៣ ដោយទុកឱសាននុវាទឲ្យរយះពេល០៧ថ្ងៃ ដើម្បីឲ្យម្ចាស់ទីតាំងធ្វើការរុះរើដោយខ្លួនឯង។
តាមរយៈសេចក្ដីជូនដំណឹងចុះពីថ្ងៃទី១៧ សីហា ឆ្នាំ២០២២ អភិបាលក្រុងបាត់ដំបង លោក ផេង សិទ្ធី បានថ្លែងថា នេះជាការជូនដំណឹងលើកទី៣ដល់ម្ចាស់អាជីវកម្ម «ចំណតទូក» ដែលមានទីតាំងនៅក្បែរផ្សាររាត្រី នាគបាញ់ទឹក តាមបណ្ដោយច្រាំងស្ទឹងសង្កែ ផ្លូវលេខ១ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ត្រូវរុះរើទីតាំងអាជីវកម្មរបស់ខ្លួនឲ្យអស់ចាប់ពីថ្ងៃជូនដំណឹងនេះ រហូតដល់ត្រឹមថ្ងៃទី២៤ សីហា ឆ្នាំ២០២២ ជាកំហិត។
បានន័យថា សម្រាប់សេចក្ដីជូនដំណឹងលើកទី៣ នេះ លោកអភិបាលក្រុងបាត់ដំបង ទុកពេលឲ្យម្ចាស់ចំណតទូក បើកលក់គ្រឿងស្រវឹងនេះ ត្រឹមរយៈពេល០៧ថ្ងៃប៉ុណ្ណោះ ឲ្យរុះរើចេញពីច្រាំងស្ទឹងឲ្យអស់។ នៅក្នុងសេចក្ដីជូនដំណឹងលើកទី៣ នេះ លោក ផេង សិទ្ធី បានព្រមានយ៉ាងដូច្នេះថា «ក្នុងករណីម្ចាស់អាជីវកម្ម មិនអនុវត្តតាមសេចក្ដីជូនដំណឹងខាងលើនេះ រដ្ឋបាលក្រុងនឹងធ្វើការរុះរើយកមករក្សាទុក ដើម្បីដោះស្រាយតាមផ្លូវច្បាប់ ជាធរមាន»។
មិនតែប៉ុណ្ណោះ លោកអភិបាលក្រុងបានបញ្ជាក់ថា «រាល់ការរុះរើជាបន្ទុករបស់សាមីម្ចាស់អាជីវកម្ម ហើយរាល់ការខូចខាតបាត់បង់ រដ្ឋបាលក្រុងមិនទទួលខុសត្រូវឡើយ»។ កំពង់ទូកឬចំណតទូក ដែលមានទីតាំងនៅចំណុចខាងលើនេះ ត្រូវគេចាំបានថា បានសាងសង់ឡើង នៅក្នុងអំឡុងរាជកាលរបស់ លោក ច័ន្ទ សុផល នៅកាន់តំណែងអភិបាលខេត្តបាត់ដំបង ក្រោមគំនិតផ្ដូចផ្ដើមរបស់មន្ទីរទេសចរណ៍ខេត្ត សាងសង់ធ្វើជាចំណតទូក ដើម្បីស្វាគមន៍ភ្ញៀវទេសចរ។
ប៉ុន្តែក្រោយចំណតទូកនេះ កើតចេញជារូបរាង បែរជាក្លាយទៅជាកន្លែងលក់ដូរគ្រឿងក្លែម និង គ្រឿងស្រវឹងទៅវិញ។ ហើយគេក៏មិនដែលប្រទះឃើញមានទូក ឬ កាណូត ដឹកភ្ញៀវទេសចរចូលចតចំណតទូកមួយនេះមួយគ្រឿងណាឡើយ។ ផ្ទុយទៅវិញ គេឃើញតែភ្ញៀវទេសចរចូលផឹកស៊ី ក្រោមពន្លឺភ្លឺពណ៌ចម្រុះ។ បើតាមប្រវត្តិដែលគេបានដឹង ក្រោយបើកអាជីវកម្មលក់គ្រឿងស្រវឹងបានមួយដង្ហើមចង្រិត ដែលទំនងខាងមន្ទីរទេសចរណ៍ រងនូវការរិះគន់ពីមហាជនខ្លាំងពេក មន្ទីរនេះក៏បានខ្សឹមខ្សៀវគ្នាប្ដូរការគ្រប់គ្រងទៅឲ្យឯកជនវិញជាបន្តបន្ទាប់។
បើគិតត្រឹមថ្ងៃនេះ ខែនេះ ឆ្នាំនេះ គេមិនដឹងថា តើម្ចាស់អាជីវកម្មចំណតទូកនេះជានរណាពិតប្រាកដទេ ដែលកំពុងធ្វើអាជីវកកម្មសព្វថ្ងៃ ? ពីព្រោះហាងផឹកស៊ីនៅចំណតទូកដែលគេអះអាងពីដំបូងថា ជា «ចំណតទូក សម្រាប់ស្វាគមន៍ភ្ញៀវទេសចរ» នេះ ត្រូវបានគេជួលបន្តគ្នាពីម្ចាស់មួយ ទៅម្ចាស់មួយជាហូរហែ ដើម្បីធ្វើអាជីវកម្មជាលក្ខណៈជន លក់គ្រឿងក្លែម និង គ្រឿងស្រវឹង ដោយរាប់ចាប់ពីម្ចាស់ដើម គឺមន្ទីរទេសចរណ៍ខេត្តរហូតមក។ រដ្ឋបាលខេត្ត និងរដ្ឋបាលក្រុងបាត់ដំបង បាននិងកំពុងមមារញឹកយ៉ាងខ្លាំង ក្នុងការរៀបចំសណ្ដាប់ធ្លាប់នៅក្នុងក្រុងបាត់ដំបង។
ជាពិសេស សណ្ដាប់ធ្នាប់នៅតាមបណ្ដាដងផ្លូវនានា ក្នុងសង្កាត់ស្វាយប៉ោ ដែលជាតំបន់សំបូរទៅដោយអគារ«បេតិកភ័ណ្ឌ» ដែលអាជ្ញារត្រូវរៀបចំទៅតាមផែនការរបស់ថ្នាក់ជាតិ។ ការរៀបចំសណ្ដាប់ធ្លាប់នេះ មានដូចជា ការរៀបចំតាមដងផ្លូវនានា កាត់ទម្លាក់ផ្ទាំងប៉ាណូនានានៅខាងមុខផ្ទះ រុះរើខ្សែភ្លើង ខ្សែកាប ឬ បណ្ដាញខ្សែអ៊ីធឺណិតនានា ដែលបំពាក់ធ្លាក់រយីករយៀកនៅតាមបង្គោលភ្លើង។ ជាមួយនឹងចំណាត់ការនេះ រដ្ឋបាលខេត្ត ក៏កំពុងពិភាក្សាអំពីការកំណត់ទីតាំងអគារ «បេតិកភណ្ឌ» ទាំងនេះ ក្នុងការប្រើប្រាសពណ៏ថ្នាំ ដើម្បីលាបលំអរទៀតផង ។
បើតាមរដ្ឋបាលខេត្តមន្ត្រីជំនាញក៏កំពុងរៀបចំឲ្យមានការលើកស្លាកយីហោ តាមលំនៅឋានដែលមានធ្វើអាជីវកម្មនានាឡើងវិញផងដែរ តែត្រូវធ្វើទៅតាមទំហុំ ខ្នាត ដែលកំណត់ដោយក្រុមការងារជំនាញ។ យ៉ាងណាក្ដី ពាក់ព័ន្ធនឹងសេចក្ដីជូនដំណឹងរបស់រដ្ឋបាលក្រុងបាត់ដំបង ដាក់កំហិតឲ្យម្ចាស់អាជីវកម្មចំណតទូក ធ្វើការរុះរើទីតាំងចេញពីមាត់ស្ទឹងសង្កែខាងលើ បើគិតត្រិមរសៀលថ្ងៃទី ១៩ សីហា នេះគេមិនទាន់ឃើញម្ចាស់ទីតាំង កំរើកដៃជើង ឬ ភ្ញាក់រលឹកនាំកម្លាំងចុះធ្វើការរុះរើតាមការជូនដំណឹងរបស់អាជ្ញាធរក្រុង នៅឡើយទេ ។ មហាជនក៏កំពុងរងចាំតាមដានមើលដែរថា តើនរណា ជាអ្នកចេញមុខរុះរើចំណតទូកនេះ ?
ព្រោះអ្នកផ្ដូចផ្ដើមសាងសង់ដំបូង គឺជាមន្ទីរទេសចរណ៏ខេត្ត។ ប៉ុន្តែយ៉ាងណា បើយោងលើខ្លិមសារ នៃលិខិតជូនដំណឹងរបស់លោក ផេង សិទ្ធី អភិបាលក្រុងបាត់ដំបង គិតត្រិមថ្ងៃទី ១៩ សីហា នេះម្ចាស់អាជីវកម្មចំណតទូកនេះ នៅសល់ពេលត្រឹមតែ០៥ថ្ងៃទៀតប៉ុណ្ណោះ ហើយបើមិនព្រមអនុវត្តទេ រដ្ឋបាលក្រុង នឹងចាត់វិធានការក្ដៅហើយ៕
ចែករំលែកព័តមាននេះ