ខេត្តបន្ទាយមានជ័យ ៖ ពលករជាច្រើននាក់ត្រូវបានគេលាក់ទុកក្នុងដីថៃ ដើម្បីរង់ចាំរថយន្តបន្តដំណើរទៅតាមបណ្តាខេត្តនានាក្នុងប្រទេសថៃ បន្ទាប់ពីឆ្លងព្រំដែនដោយរលូនតាមស្ពានដែលគេធ្វើពីឈើកាត់អូរព្រំដែន។
ខេត្តបន្ទាយមានជ័យ ៖ ពលករជាច្រើននាក់ត្រូវបានគេលាក់ទុកក្នុងដីថៃ ដើម្បីរង់ចាំរថយន្តបន្តដំណើរទៅតាមបណ្តាខេត្តនានាក្នុងប្រទេសថៃ បន្ទាប់ពីឆ្លងព្រំដែនដោយរលូនតាមស្ពានដែលគេធ្វើពីឈើកាត់អូរព្រំដែន។ គេមិនស្គាល់ភូមិសាស្ត្រខាងទឹកដីថៃទេ ចំណែកខាងទឹកដីខ្មែរ គឺភូមិបឹងរាំង ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ ដែលនៅទីនោះគ្រប់គ្រងដោយយោធា (ខ2) សឹករងម៉ាឡៃ។
ពលករទាំងនេះមានប្រហែលជា40ទៅ50នាក់ អង្គុយព្រោងព្រៀតតាមមាត់អូរ (ខាងដីថៃ) ប៉ុន្តែមួយចំនួនទៀត ត្រូវបានគេលាក់ទុកក្នុងចំការអំពៅ ដោយមានសម្លេងរញៀវ ហើយនៅទីនោះមានទាំងអ្នកលក់នំចំណីទៀតផង។
ឆ្លើយនៅសំណួររបស់អ្នកយកព័ត៌មាន ក្រុមពលករទាំងនោះខ្លះនិយាយថា ទៅក្រុងបាងកក ខ្លះថាទៅខេត្តផ្សេងៗ ដើម្បីរកការងារធ្វើ។ ពលករម្នាក់ ភេទប្រុស មិនប្រាប់ឈ្មោះនិយាយថា ខ្លួនមកពីភូមិអូរម៉ាល់ ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ ឆ្លងព្រំដែនតាមរយៈមេខ្យល់ក្នុងគោលបំណងទៅខេត្តឈុនបូរី ដើម្បីធ្វើការជាកម្មករសំណង់។ ដោយឡែកស្ត្រីម្នាក់មានកូនតូចទៅជាមួយនិយាយថា ដោយសារគ្រួសារនាងជួបបញ្ហាជីវភាព ទើបបង្ខំចិត្តចាកចេញពីស្រុកនាំកូនទៅរកការងារធ្វើលើទឹកដីថៃ។ ក្រុមពលករបាននិយាយចេញពីមាត់ស្ទើរតែគ្រប់គ្នាយ៉ាងខ្លាំងៗថា ការងារនៅស្រុកខ្មែរមិនអត់ទេ ប៉ុន្តែបានតម្លៃថោក ទើបពួកខ្លួនទៅធ្វើការលើទឹកដីថៃវិញ។
នៅកន្លែងដែលពលករលាក់ខ្លួនគេឃើញបុរសម្នាក់សង្ស័យជាសមត្ថកិច្ច ប៉ុន្តែស្លៀកពាក់ស៊ីវិលដេកក្នុងអង្រឹងនៅទីនោះ លុះអ្នកយកព័ត៌មានផ្តិតយករូបភាពបែរជាប្រតិកម្ម ដោយឡូឡាថា គេនិងប្រមូលពលករទាំងនោះ ត្រឡប់មកខ្មែរវិញទាំងអស់។
ជុំវិញករណីខាងលើ មន្ត្រីយោធាប្រចាំភូមិសាស្ត្រនៅទីនោះមិនអាចទាក់ទងសុំការបំភ្លឺបានទេដោយទូរស័ព្ទចុចចូលគ្មានអ្នកទទួល៕
ចែករំលែកព័តមាននេះ