រាជធានីភ្នំពេញ ៖ កម្ពុជានឹងធ្វើជាប្រធានសម្របសម្រួលក្រុមប្រទេសអភិវឌ្ឍន៍តិចតួច ចាប់ពីខែកុម្ភៈខាងមុខនេះហើយ ក្នុងនោះរដ្ឋមន្ត្រីក្រសួងពាណិជ្ជកម្ម និងសេដ្ឋវិទូនានាបានសម្តែងនូវសុទិដ្ឋិនិយមចំពោះតួនាទីដ៏មាន
រាជធានីភ្នំពេញ ៖ កម្ពុជានឹងធ្វើជាប្រធានសម្របសម្រួលក្រុមប្រទេសអភិវឌ្ឍន៍តិចតួច ចាប់ពីខែកុម្ភៈខាងមុខនេះហើយ ក្នុងនោះរដ្ឋមន្ត្រីក្រសួងពាណិជ្ជកម្ម និងសេដ្ឋវិទូនានាបានសម្តែងនូវសុទិដ្ឋិនិយមចំពោះតួនាទីដ៏មានសារសំខាន់មួយនេះ និងរំពឹងថា អាចទទួលបានប្រយោជន៍យ៉ាងច្រើន ។
លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា បានថ្លែងកាលពីព្រឹកថ្ងៃទី១៦ មករា កន្លងមកថា បន្ទាប់ពីកម្ពុជាត្រូវបានជ្រើសរើសឲ្យធ្វើជាប្រធានសម្របសម្រួលនៃក្រុមប្រទេសអភិវឌ្ឍន៍តិចតួច (LDCs) របស់អង្គការពាណិជ្ជកម្មពិភពលោក (WTO) ឲ្យកាន់តំណែងនេះនៅក្នុងខែមករា ឆ្នាំ២០១៧ នៅទីក្រុងហ្សឺណែវ ប្រទេសស្វ៊ីស ក្នុងនាមជាម្ចាស់ផ្ទះ កម្ពុជាបានប្តេជ្ញាប្រើប្រាស់តួនាទីរបស់ខ្លួនជំរុញការនាំចេញនូវវិស័យមួយចំនួនដូចជា វិស័យកសិកម្ម ទេសចរណ៍ ឧស្សាហកម្ម និងការនាំចេញរបស់កម្ពុជាទៅទីផ្សារអន្តរជាតិ ។
លោកបញ្ជាក់ថា ៖ « វិស័យពាណិជ្ជកម្មកម្ពុជា នឹងដើរតួនាទីដ៏សំខាន់មួយនេះក្នុងការជំរុញទៅក្នុងក្របខ័ណ្ឌប្រទេសអភិវឌ្ឍន៍តិចតួច ដើម្បីធ្វើយ៉ាងណា ឲ្យការនាំចេញរបស់សហគ្រាសក្នុងស្រុកទៅទីផ្សារអន្តរជាតិ ពិសេស ការធ្វើពាណិជ្ជកម្មក្រៅប្រទេស ។ លើសពីនេះ ក្នុងនាមជាប្រធានសម្របសម្រួល នឹងទំនាក់ទំនងជាមួយបណ្តាប្រទេសទាំងអស់ដើម្បីជំរុញផលិតផលរបស់កម្ពុជា មានអង្ករ និងផលិតផលជាច្រើនទៀតចូលទីផ្សារអន្តរជាតិ » ។
ក្នុងតួនាទីនេះ កម្ពុជាមានកាតព្វកិច្ចដឹកនាំ និងសម្របសម្រួលក្រុមប្រទេស (LDCs) ដើម្បីធ្វើការចរចាយ៉ាងស្វិតស្វាញជាមួយបណ្តារដ្ឋជាសមាជិកអង្គការពាណិជ្ជកម្មពិភពលោក (WTO) ទាំង៣៦ប្រទេស និងប្រទេសអភិវឌ្ឍន៍តិចតួច (LDCs) ជាអ្នកសង្កេតការណ៍ចំនួន៨ប្រទេស ដើម្បីឆ្ពោះទៅរកការទទួលបានជោគជ័យរួមនៃការចរចាថ្នាក់រដ្ឋមន្ត្រី ក្នុងសន្និសីទលើកទី១១ ដែលនឹងប្រព្រឹត្តទៅនៅថ្ងៃទី១១ ដល់១៤ ធ្នូ ឆ្នាំ២០១៧ នៅទីក្រុងប៊ូអេណូស អែរេស (Buenos Aires) ប្រទេសអាហ្សង់ទីន ។
សេដ្ឋវិទូនានាសុទ្ធតែសម្តែងនូវសុទិដ្ឋិនិយម ចំពោះភាពជាអ្នកដឹកនាំរបស់កម្ពុជា លើប្រទេសអភិវឌ្ឍន៍តិចតួច ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា កាលពីអតីតកាល ដោយសារកម្ពុជាបានចូលជាសមាជិកអង្គការពាណិជ្ជកម្មពិភពលោក យើងបានប្រឹងប្រែងធ្វើការកែទម្រង់តាមលក្ខខណ្ឌរបស់អង្គការនេះ ។ ជាលទ្ធផល កម្ពុជាទទួលបានជោគជ័យក្នុងការអភិវឌ្ឍប្រទេសជាតិ។ ហេតុនេះ ការបានក្លាយជាប្រទេសសម្របសម្រួលលើបណ្តាប្រទេសមានការអភិវឌ្ឍតិចតួច ជារឿងល្អ តែវាមិនចំណេញលុយភ្លាមៗនោះទេ តែជាឥទ្ធិពលមួយដែលធ្វើឲ្យប្រទេសផ្សេងៗស្គាល់កម្ពុជា។
លោកបន្តថា ៖ « វាជារឿងពាណិជ្ជកម្មផង ការទូតផង និងទំនាក់ទំនងអន្តរជាតិផង។ ដូច្នេះ ពេលយើងនិយាយ គេស្តាប់យើងថា គួរធ្វើបែបណា ឬធ្វើបែបនោះ ។
ថ្នាក់ដឹកនាំរបស់យើងនិយាយមានឥទិ្ធពល គេស្តាប់យើង ដោយសារយើងធ្លាប់ជួបការលំបាក ហើយអភិវឌ្ឍន៍ប្រទេសបានកម្រិតនេះ » ។
លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ចប្រចាំរាជបណ្ឌិត្យសភាកម្ពុជា ថ្លែងថា ការដែលកម្ពុជាបានក្លាយជាប្រធានសម្របសម្រួបនៃបណ្តាប្រទេសអភិវឌ្ឍន៍តិចតួច ដោយសារកម្ពុជា ជាប្រទេសបានអភិវឌ្ឍន៍សេដ្ឋកិច្ចបានល្អប្រសើរក្នុងរយៈពេលវែង ហើយកម្ពុជាអាចទទួលបានផលចំណេញច្រើនដូចជា ៖
១-អាចផ្សព្វផ្សាយពីកម្ពុជាទៅកាន់ពិភពលោកថា កម្ពុជាមានកាលានុវត្តភាព និងសក្តានុពលអ្វីខ្លះ ។
២-កម្ពុជាមានឱកាសប្រមូលព័ត៌មាន និងយុទ្ធសាស្ត្រពីការអភិវឌ្ឍប្រទេសយកមកអនុវត្តបន្ថែមនៅកម្ពុជា ។
៣-កម្ពុជាអាចមើល ឬចាប់ឱកាសនៅតាមបណ្តាប្រទេសតិចតួចនានាដើម្បីស្វែងរកឱកាសវិនិយោគនៅតាមបណ្តាប្រទេសទាំងនោះ ។
៤-អ្នកវិនិយោគចូលមកប្រទេសរបស់យើងអាចស្វែងរកឱកាសវិនិយោគ និងចាប់ដៃគូជាមួយអ្នកធុរកិច្ចក្នុងស្រុកដើម្បីវិនិយោគនៅកម្ពុជា ៕
ចែករំលែកព័តមាននេះ