រាជធានីភ្នំពេញ ៖ បុរសម្នាក់បន្ទាប់ពីព្យាយាមសម្រុះសម្រួលជាច្រើនលើកច្រើនសារ តែអតីតប្រពន្ធដែលទើបលែងលះគ្នាជាង២ខែនៅតែមិនព្រម ក៏ស្ទុះចូលទៅចាប់ឱប …
រាជធានីភ្នំពេញ ៖ បុរសម្នាក់បន្ទាប់ពីព្យាយាមសម្រុះសម្រួលជាច្រើនលើកច្រើនសារ តែអតីតប្រពន្ធដែលទើបលែងលះគ្នាជាង២ខែនៅតែមិនព្រម ក៏ស្ទុះចូលទៅចាប់ឱបហើយយកឡាមបម្រុងអារកសម្លាប់នាងចោល តែត្រូវនាងរើបម្រះ និងស្រែកឆោឡោបង្កឲ្យមានការភ្ញាក់ផ្អើលកាលពីវេលាម៉ោង១១ និង៣០នាទីព្រឹក ថ្ងៃទី១៧ ខែមករា ឆ្នាំ២០១៧ នៅចំណុចផ្ទះលេខ៤១A ផ្លូវលេខ៤១០ ស្ថិតក្នុងភូមិ១ សង្កាត់បឹងត្របែក ខណ្ឌចំការមន ។
ប្រភពពីសមត្ថកិច្ចនគរបាលបានឱ្យដឹងថា ជនដៃដល់ឈ្មោះ បូ សម្បត្តិ អាយុ៤២ឆ្នាំ មុខរបរកម្មករសំណង់ មានស្រុកកំណើតនៅភូមិ ការកូន ឃុំបឹងដោល ស្រុកព្រះស្តេច ខេត្តព្រៃវែង ចំណែកស្ត្រីរងគ្រោះឈ្មោះ ស៊ូ សោភា អាយុ៤០ឆ្នាំ មុខរបរបម្រើការតាមផ្ទះ សព្វថ្ងៃសា្នក់នៅផ្ទះកើតហេតុខាងលើ មានកូនប្រុស២នាក់នៅក្នុងបន្ទុក ។
ប្រភពដដែលបានឲ្យដឹងទៀតថា មុនពេលកើតហេតុ ខណៈពេលដែលកូនម្ចាស់ផ្ទះចេញមកពីសាលារៀនវិញ ស្ត្រីរងគ្រោះក៏បានចេញមកចាក់សោទ្វាររបងខាងក្រៅឲ្យចូលផ្ទះ ឆ្លៀតពេលនោះស្រាប់តែបុរសជាអតីតប្តីស្ទុះរត់ចូលមកចាប់ឱបនាងជាប់ ហើយយកផ្លែឡាមបម្រុងអារ.កសម្លាប់នាងចោល តែត្រូវនាងរើបម្រះ និងស្រែកឆោឡោធ្វើឲ្យមានការភ្ញាក់ផ្អើលដល់អ្នកជិតខាងនាំគ្នារត់មកជួយ និងចាប់ខ្លួនបុរសនោះបានភ្លាមៗផងដែរ ។
សមត្ថកិច្ចបានឲ្យដឹងទៀតថា មុនពេលកើតហេតុទំនងជាបុរសជាអតីតប្តីបានជិះម៉ូតូមកអង្គុយសំកុកចាំមើលអស់រយៈពេលជាច្រើនថ្ងៃមកហើយ តែមិនមានឱកាស ព្រោះទ្វាររបងចេញបិទចូលបិទ ធ្វើសកម្មភាពអ្វីមិនបាន ទើបតែពេលនេះមានឱកាសក៏ស្ទុះរត់ចូល ហើយយកផ្លែឡាមធ្វើសកម្មធ្វើអារកស្ត្រីជាអតីតប្រពន្ធបណ្តាលឲ្យរងរបួសត្រង់ដៃ និងត្រចៀកយ៉ាងធ្ងន់ធ្ងរ ។
ប្រភពព័ត៌មានបានឲ្យដឹងថា ២នាក់ប្តីប្រពន្ធនេះបានលែងលះគ្នាអស់រយៈពេលជាង២ខែមកហើយក្រោយពីរស់នៅជាមួយគ្នាអស់រយៈពេលជាច្រើនឆ្នាំមិនចុះសម្រុងនឹងគ្នា ដោយបុរសជាអតីតប្តីបានព្យាយាមសុំសម្រុះសម្រួលដើម្បីរួមរស់ជាមួយស្ត្រីរងគ្រោះជាច្រើនលើកច្រើនសារមកហើយ តែនាងមិនព្រម ទើបបុរសរូបនេះដាច់ចិត្តធ្វើបែបនេះ ។
ក្រោយពេលកើតហេតុ ស្ត្រីរងគ្រោះត្រូវបានបញ្ជូនទៅព្យាបាលនៅមណ្ឌលសុខភាពផ្សារដើមថ្កូវ ចំណែកបុរសដៃដល់ត្រូវបានកម្លាំងនគរបាលប៉ុស្តិ៍បឹងត្របែកវាយខ្នោះយកទៅធ្វើការសាកសួរ និងធ្វើកំណត់ហេតុ បញ្ជូនទៅកាន់អធិការដ្ឋាននគរបាលខណ្ឌចំការមន ដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ