រាជធានីភ្នំពេញ ៖ ក្រុមហ៊ុនអចលនទ្រព្យមកពីបណ្តាប្រទេសនានាបានចូលមកកាន់ទីផ្សារកម្ពុជាកាន់តែច្រើន ស្របពេលវិស័យសំណង់ និងអចលនទ្រព្យកម្ពុជាមានការរីកចម្រើនខ្លាំងក្នុងមួយទសវត្សរ៍ចុងក្រោយនេះ ។
លោក គុយ វ៉ាត អគ្គនាយកក្រុមហ៊ុនVTRUST GROUP ដែលបានទិញ Franchise ឬកម្មសិទ្ធិបញ្ញាក្រុមហ៊ុន Century21 Cambodia ពីសហរដ្ឋអាមេរិកចូលមកកាន់ទីផ្សារកម្ពុជា បានថ្លែងនៅព្រឹកថ្ងៃទី២ មករា កន្លងមកថា ក្រុមហ៊ុនបរទេសបានចូលមកកម្ពុជាកាន់តែច្រើន ហើយស្របពេលនិន្នាការបែបនេះកើតឡើង លោកបាននិងកំពុងធ្វើការពង្រឹងសមត្ថភាពភ្នាក់ងារអចលនទ្រព្យនៅកម្ពុជា ដើម្បីឲ្យពួកគេទទួលបានចំណេះដឹង និងបទពិសោធន៍អាចឈរជើងនៅក្នុងទីផ្សារដែលកាន់តែមានភាពប្រកួតប្រជែងនេះ។
លោកបន្តថា ៖ « ការចូលមករបស់ក្រុមហ៊ុនបរទេសទាំងតូច ទាំងធំ គឺជាការល្អ ព្រោះពួកគេអាចជួយគ្នាដើម្បីជំរុញឲ្យទីផ្សារនេះកាន់តែមានភាពរីកចម្រើនបន្ថែមទៀត ។
នៅពេលក្រុមហ៊ុនធំៗចូលមកច្រើន មានន័យថា ពួកគេកាន់តែមានទំនុកចិត្ត និងធ្វើឲ្យទីផ្សារអចលនទ្រព្យនៅកម្ពុជាកាន់តែមានទំនុកចិត្តថែមទៀត » ។
លោក គុយ វ៉ាត បន្ថែមថា ក្នុងស្ថានភាពបែបនេះ ការស្វែងរកចាប់ដៃគូជាមួយក្រុមហ៊ុនបរទេសមានសារសំខាន់ដើម្បីអាចឈរជើងនៅក្នុងទីផ្សារនេះបាន និងអាចប្រកួតប្រជែងជាមួយគេផងដែរ ។
លោក លី សែនលាភ អគ្គនាយកក្រុមហ៊ុនFURI Real Estate បានមានប្រសាសន៍ផងដែរថា ក្រុមហ៊ុនអចលនទ្រព្យមកពីក្រៅប្រទេសបានចូលមកកាន់ទីផ្សារកម្ពុជាច្រើននៅឆ្នាំនេះ ដោយសារទីផ្សាររបស់កម្ពុជាកាន់តែមានភាពទាក់ទាញ និងជាទីផ្សារមួយស្ថិតក្នុងក្រសែភ្នែកវិនិយោគិន។ ទោះបីកម្ពុជាស្ថិតនៅក្នុងឆ្នាំរៀបចំការបោះឆ្នោតជាបន្តបន្ទាប់ក្តី ប៉ុន្តែវិនិយោគិនថ្មីៗនៅតែចូលមកកម្ពុជា ដោយសារគេឃើញសក្តានុពលនៃទីផ្សារនេះ និងស្ថិរភាពនយោបាយដែលកម្ពុជានឹងរក្សាបាន ។
លោកបន្តថា ៖ « នៅពេលក្រុមហ៊ុនបរទេសចូលមកកម្ពុជាកាន់តែច្រើន ការប្រកួតប្រជែងនឹងកើនឡើង ។ ហេតុនេះ ទាមទារឲ្យក្រុមហ៊ុនតូចៗពង្រឹងសមត្ថភាព ជាពិសេស ធ្វើការតាមឯកទេសរបស់ខ្លួន កុំស្រវាចាប់គ្រប់ផ្នែក ប្រសិនជាមិនដូច្នេះទេ ពួកគេអាចប្រឈមមុខនឹងការបាត់បង់ទីផ្សារ ។ ខ្ញុំមិនមានការព្រួយបារម្ភទេ ដោយសារក្រុមហ៊ុនរបស់ខ្ញុំបានទទួលជោគជ័យ និងមានធនធានមនុស្សគ្រប់គ្រាន់ដើម្បីឈរជើងនៅលើទីផ្សារនេះ » ។
ក្រុមហ៊ុនដែលហូរចូលមកកម្ពុជាភាគ ច្រើន មកពីប្រទេសចិន កោះតៃវ៉ាន់ ហុងកុង កូរ៉េ ជប៉ុន និងបណ្តាប្រទេសក្នុងតំបន់អាស៊ាន ។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក គីម ហ៊ាង ថ្លែងថា ពិតណាស់ ក្រុមហ៊ុនមកពីក្រៅប្រទេសបានហូរចូលមកកម្ពុជាកាន់តែច្រើន ដែលមួយផ្នែកបណ្តាលមកពីសមាហរណកម្មអាស៊ាន និងមួយផ្នែកមកពីទីផ្សារកម្ពុជាកាន់តែមានភាពទាក់ទាញ។ ហេតុនេះ ទាមទារឲ្យក្រុមហ៊ុនតូចៗក្នុងស្រុកពង្រឹងសមត្ថភាពរបស់ខ្លួន ធ្វើការសហការគ្នា ឬច្របាច់បញ្ចូលគ្នាដើម្បីអាចឈរជើងនៅក្នុងទីផ្សារនេះបាន ។
លោកបន្តថា ៖ « ពីមុន គេនិយាយពីត្រីធំស៊ីត្រីតូច តែពេលនេះត្រីតូចៗរួមបញ្ចូលគ្នាអាចស៊ីត្រីធំវិញបាន ។ ប្រសិនជាក្រុមហ៊ុនតូចៗធ្វើតាមជំនាញឯកទេសរបស់ខ្លួន ហើយសហការគ្នា ឬច្របាច់បញ្ចូលគ្នានឹងទទួលជោគជ័យ ប៉ុន្តែប្រសិនជាពួកគេមិនច្របាច់បញ្ចូលគ្នា មិនសហការគ្នា ពួកគេអាចប្រឈមមុខនឹងការក្ស័យទុន ឬបិទទ្វារ » ។
សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានក្រុមហ៊ុនជាតិ-អន្តរជាតិប្រមាណ១០០ក្រុមហ៊ុន រួមទាំងភ្នាក់ងារធ្វើការងារក្នុងវិស័យនេះជាង១.២០០នាក់ ៕
ចែករំលែកព័តមាននេះ