តុលាការផ្តន្ទាទោសអតីតមន្ត្រី និងសកម្មជនគណបក្សសង្គ្រោះជាតិ៧នាក់
- ភ្នំពេញ
សាលាដំបូងរាជធានីភ្នំពេញ នារសៀលថ្ងៃទី១០ ខែសីហា ឆ្នាំ២០២២ បានប្រកាសសាលក្រមផ្តន្ទាទោសលើអតីតមន្ត្រី និងសកម្មជនគណបក្សសង្គ្រោះជាតិចំនួន៧នាក់ ដាក់ពន្ធនាគារ
រាជធានីភ្នំពេញ ៖ សាលាដំបូងរាជធានីភ្នំពេញ នារសៀលថ្ងៃទី១០ ខែសីហា ឆ្នាំ២០២២ បានប្រកាសសាលក្រមផ្តន្ទាទោសលើអតីតមន្ត្រី និងសកម្មជនគណបក្សសង្គ្រោះជាតិចំនួន៧នាក់ ដាក់ពន្ធនាគារកំណត់ពី១៨ខែទៅ៣ឆ្នាំ ពីបទ «ប្រមាថព្រះមហាក្សត្រ និង ញុះញង់បង្កឲ្យមានភាពវឹកវរដល់សន្តិសុខសង្គម ក្នុងចេតនា ដើម្បីផ្តួលរលំរាជរដ្ឋាភិបាលកម្ពុជា តាមរយៈហ្វេសប៊ុក (Facebook )» ដែលប្រព្រឹត្តនៅក្នុងប្រទេសកម្ពុជា កាលពីឆ្នាំ ២០១៩ ដល់ឆ្នាំ ២០២១ ។
សាលក្រមផ្តន្ទាទោសកំបាំងមុខលើជនជាប់ចោទ៥ នាក់ ៖ ១-ឈ្មោះ ឡុង រី, ២- ឈ្មោះ ម៉ែន សុថាវរិន្ទ, ៣- ឈ្មោះ ម៉ន ផល្លា, ៤-ឈ្មោះ ម៉ោញ សារ៉ាត់ និង៥-ឈ្មោះ មោះ គឹម តុលា ។ ដាក់ពន្ធនាគារក្នុងម្នាក់ៗចំនួន៣ឆ្នាំ និងចេញដីកាឲ្យចាប់ខ្លួន ។ សាលក្រមប្រកាសផ្តន្ទាទោសចំពោះមុខជនជាប់ចោទចំនួន២នាក់ ដោយម្នាក់ឈ្មោះ ម៉ិច ហ៊ាង ដាក់ពន្ធនាគារ៣ឆ្នាំ និងម្នាក់ទៀតឈ្មោះ ឡាញ់ ថាវរី ភេទស្រី ដាក់ពន្ធនាគារ១៨ខែ ដែលជាប់ចោទកំពុងជាប់ឃុំក្នុងពន្ធនាគារ ។
តុលាការបានចោទប្រកាន់ចំណោមជនជាប់ចោទទាំង៧នាក់ រួមមាន ៖ ១- ឈ្មោះ ឡុង រី ឈ្មោះម៉ែន សុថាវរិន្ទ, ២- ឈ្មោះ ម៉ន ផល្លា, ៣- ឈ្មោះម៉ោញ សារ៉ាត់ គឹម តុលា និង៤-ឈ្មោះ ឡាញ់ ថាវរី ពីបទ ៖ «ញុះញង់បង្កឲ្យមានភាពវឹកវរដល់សន្តិសុខសង្គម» តាមមាត្រា ៤៣៧ និង ៤៩៤ មាត្រា ៤៩៥ នៃក្រមព្រហ្មទណ្ឌ។ ចំណែកជនជាប់ចោទ ឈ្មោះ ម៉ិច ហ៊ាង ត្រូវបានចោទប្រកាន់ចំនួន២បទល្មើស គឺ ៖ «ប្រមាថចំពោះអង្គព្រះមហាក្សត្រ និង ញុះញង់បង្កឲ្យមានភាពវឹកវរដល់សន្តិសុខសង្គម» តាមមាត្រា ៤៣៧ និង ៤៩៤ និង មាត្រា ៤៩៥ នៃក្រមព្រហ្មទណ្ឌ។
នៅក្នុងចំណោមពួកគេទាំង៧នាក់, ជនជាប់ចោទឈ្មោះ ម៉ិច ហ៊ាង ភេទប្រុស រស់នៅភូមិទួលខ្សាច់ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ និង ឈ្មោះ ឡាញ់ ថាវរី ភេទស្រី រស់នៅភូមិប្រឡាយហ្លួងលើ ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ ត្រូវបានចាប់ឃាត់ និង ត្រូវបានឃុំខ្លួននៅក្នុងពន្ធនាគារ។ ចំណែក ឯជនជាប់ចោទ៥នាក់ទៀត ដូចមានខាងលើ ត្រូវបានរត់គេចខ្លួន។
នាពេលសវនាការនេះ ជនជាប់ចោទ ឈ្មោះ ឡាញ់ ថាវរី ដែលជាអតីតមេឃុំឬស្សីក្រោក មកពីកូតា អតីតគណបក្សសង្គ្រោះជាតិ ( CNRP ) បានឆ្លើយសារភាពកំហុស ក៏ប៉ុន្តែនាងបានអះអាងថា សារ និងខ្លឹមសារ ដែលខ្លួនបានសរសេរផុស និងផ្សាយនៅលើហ្វេសប៊ុកនោះ គឺគ្រាន់តែជាការបញ្ចេញមតិ យោបល់ និងការរិះគន់ ដើម្បីស្ថាបនាតែប៉ុណ្ណោះ។ មិនមានចេតនា ដើម្បីប្រឆាំង ឬញ៉ុះញ៉ង់មហាជន ផ្តួលរំលំរដ្ឋាភិបាលដូចការចោទប្រកាន់នោះទេ ។
ចំណែកឈ្មោះ ថាវរី សុំឱ្យលោកចៅក្រមជំនុំជម្រះ សម្រេចលើកការចោទប្រកាន់ និងដោះលែងខ្លួន ឲ្យមានសេរីភាពវិញ។ រីឯ ឈ្មោះ ម៉ិច ហ៊ាង ក៏បានទទួលស្គាល់នូវ ខ្លឹមសារដែលខ្លួនបានសរសេរ និងផុសផ្សាយនៅលើគណនីហ្វេសប៊ុករបស់ខ្លួនផងដែរ ក៏ប៉ុន្តែគាត់បានអះអាងថា នោះគឺជាយោបល់ផ្ទាល់ខ្លួន ក្នុងការរិះគន់ ព្រះមហាក្សត្រខ្មែរ ហើយក៏ជាសិទ្ធិសេរីភាពនៃការបញ្ចេញមតិ របស់ប្រជាពលរដ្ឋខ្មែរម្នាក់ៗ ដែលត្រូវបានធានាដោយរដ្ឋធម្មនុញ្ញរបស់កម្ពុជា ។ ចំណែកឯឈ្មោះម៉ិច ហ៊ាង វិញ បានស្នើសុំឱ្យលោកចៅក្រមជំនុំជម្រះ សម្រេចលើកការចោទប្រកាន់ និងដោះលែងអោយមានសេរីភាពវិញ។
ប៉ុន្តែនៅពេលបិទបញ្ចប់សវនាការ លោកមុត ដារ៉ា ព្រះរាជាអាជ្ញារង និងជាតំណាងអយ្យការអមសាលាដំបូងរាជធានីភ្នំពេញ បានតម្កល់បទចោទប្រកាន់ ចំពោះជនជាប់ចោទទាំង៧នាក់ ខាងលើ ដោយរក្សាទុកជាបានការដដែល និងសំណូមពរដល់លោកលោក ឃុន សូណា ចៅក្រមជំនុំជម្រះ លោកផ្តន្ទាទោសជនជាប់ចោទទាំងអស់ នៅក្នុងសំណុំរឿងក្តីព្រហ្មទណ្ឌនេះ តាមច្បាប់ជាធរមាន ៕
ចែករំលែកព័តមាននេះ