រាជធានីភ្នំពេញ ៖ ក្រុមហ៊ុនជប៉ុនដែលកំពុងវិនិយោគនៅកម្ពុជា បានកើនឡើងខ្ពស់គួរឲ្យកត់សម្គាល់ ដោយគិតត្រឹមដំណាច់ឆ្នាំ២០១៦កន្លងមក ក្រុមហ៊ុនជប៉ុនទាំងតូចទាំងធំដែលបានវិនិយោគនៅកម្ពុជា មានចំនួន
រាជធានីភ្នំពេញ ៖ ក្រុមហ៊ុនជប៉ុនដែលកំពុងវិនិយោគនៅកម្ពុជា បានកើនឡើងខ្ពស់គួរឲ្យកត់សម្គាល់ ដោយគិតត្រឹមដំណាច់ឆ្នាំ២០១៦កន្លងមក ក្រុមហ៊ុនជប៉ុនទាំងតូចទាំងធំដែលបានវិនិយោគនៅកម្ពុជា មានចំនួនរហូតដល់៩៦៧ក្រុមហ៊ុន ។
លោក អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី ជាធនាគារដើរតួនាទីជាអ្នកផ្តល់សេវាកម្មទូទាត់សាច់ប្រាក់ ជាមួយក្រុមហ៊ុនជប៉ុនវិនិយោគនៅកម្ពុជា បានឲ្យដឹងនៅព្រឹកថ្ងៃទី១១ មករា ម្សិលមិញថា គិតត្រឹមដំណាច់ឆ្នាំមុន មានក្រុមហ៊ុនសាជីវកម្មជប៉ុនធំៗចំនួន២៨៩ក្រុមហ៊ុន កើនឡើង១៧% ធៀបនឹងរយៈពេលដូចគ្នាកាលពីឆ្នាំ២០១៥ ដែលមានក្រុមហ៊ុនសាជីវកម្មជប៉ុនធំៗវិនិយោគនៅកម្ពុជាចំនួន២៤៧ក្រុមហ៊ុនប៉ុណ្ណោះ ។ ចំណែកក្រុមហ៊ុនតូចៗជាលក្ខណៈឯកត្តជន បានកើនពី៣៦៩ក្រុមហ៊ុនកាលពីឆ្នាំ២០១៥ ដល់ចំនួន៦៧៨ក្រុមហ៊ុននៅដំណាច់ឆ្នាំមុន ស្មើនឹងកំណើន៨៣,៧៣% ។
លោកបន្តថា ៖ « នៅឆ្នាំ២០១៧នេះ ខ្ញុំរំពឹងថា អ្នកវិនិយោគជប៉ុននឹងចូលមកកាន់កម្ពុជាកាន់តែច្រើនជាងមុន ដោយសារកម្ពុជារក្សាបាននូវកំណើនសេដ្ឋកិច្ចរឹងមាំក្នុងកំណើន៧%ប្រចាំឆ្នាំ និងរក្សាបាននូវស្ថិរភាពនយោបាយ និងស្ថិរភាពសង្គម ហើយការភ្ជាប់ជើងហោះហើរត្រង់របស់ជប៉ុនមកកម្ពុជា ក៏ជាការជំរុញកំណើនពាណិជ្ជកម្ម ទេសចរណ៍ និងវិនិយោគជប៉ុនកាន់តែច្រើនមកកម្ពុជាផងដែរ » ។
ក្រុមហ៊ុនជប៉ុន ដែលមកវិនិយោគនៅកម្ពុជាបានផ្តោតលើសេវាកម្មចម្រុះដូចជា អចលនទ្រព្យ សណ្ឋាគារ ភោជនីយកដ្ឋាន សេវាកម្ម គ្រឿងបន្លាស់ គ្រឿងសម្អាង និងផលិតផលជាច្រើនទៀត ។ នេះបើតាមការបញ្ជាក់របស់លោកអិុន ចាន់នី ។
លោកបន្តថា ការមកដល់របស់ក្រុមហ៊ុនផ្សារទំនើប AEON Mall បានទាក់ទាញក្រុមហ៊ុនវិនិយោគជប៉ុនតូចៗជាច្រើនទៀតចូលមកកាន់កម្ពុជា ព្រោះក្រុមហ៊ុនផ្សារទំនើបនេះជាក្រុមហ៊ុនធំមួយ និងមានដៃគូជាច្រើនដែលបានប្រើប្រាស់សេវាកម្មរបស់ពួកគេ ។
សេដ្ឋវិទូកម្ពុជាបានសម្តែងការស្វាគមន៍ផងដែរ ចំពោះការវិនិយោគរបស់វិនិយោគិនជប៉ុននៅកម្ពុជា ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានថ្លែងថា តាមព័ត៌មានលោកទទួលបាន វិនិយោគិនជប៉ុនមកវិនិយោគនៅកម្ពុជា មិនសូវមានចំនួនច្រើននោះទេកាលពីឆ្នាំមុន ប៉ុន្តែពួកគេនៅតែចូលមក ដោយសារការមកដល់នៃអាកាសចរណ៍ជប៉ុន ព្រោះការភ្ជាប់ជើងហោះហើររបស់ក្រុមហ៊ុន ANA របស់ជប៉ុន ជាការផ្លាស់ប្តូរប្រវត្តិសាស្ត្រ ក្នុងទំនាក់ទំនងជាមួយជប៉ុន លើវិស័យពាណិជ្ជកម្ម ។
លោកបន្តថា ៖ « អ្នកវិនិយោគជប៉ុនមុននឹងមកវិនិយោគនៅប្រទេសណាមួយ ពួកគេសិក្សាច្បាស់លាស់ណាស់ មុនពួកគេសម្រេចចិត្តចូលមក ហើយពេលពួកគេចូលមក គឺពួកគេផ្តោតលើការវិនិយោគរយៈពេលវែងនៅកម្ពុជា។ បច្ចុប្បន្ន ជប៉ុនមានមូលដ្ឋានគ្រប់គ្រាន់ហើយ សម្រាប់ផ្តល់ឲ្យពួកគេរស់នៅ និងវិនិយោគរយៈពេលវែងនៅទីនេះ » ៕
ចែករំលែកព័តមាននេះ