រាជធានីភ្នំពេញ ៖ ការបើកច្រកទ្វារអន្តរជាតិកម្ពុជា-ឡាវ គឺជាការតភ្ជាប់ប្រព័ន្ធដឹកជញ្ជូនដ៏មានសក្ដានុពល និងជាការតភ្ជាប់នៃប្រទេសទាំងពីរ ក៏ដូចជាបណ្ដាញគមនាគមន៍
តភ្ជាប់ប្រទេសកម្ពុជា ឡាវ និងវៀតណាម ព្រមទាំង
រាជធានីភ្នំពេញ ៖ ការបើកច្រកទ្វារអន្តរជាតិកម្ពុជា-ឡាវ គឺជាការតភ្ជាប់ប្រព័ន្ធដឹកជញ្ជូនដ៏មានសក្ដានុពល និងជាការតភ្ជាប់នៃប្រទេសទាំងពីរ ក៏ដូចជាបណ្ដាញគមនាគមន៍
តភ្ជាប់ប្រទេសកម្ពុជា ឡាវ និងវៀតណាម ព្រមទាំងបណ្ដាប្រទេសនៅក្នុងតំបន់មេគង្គផងដែរ។ នេះបើតាមការថ្លែងរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងឱកាសអញ្ជើញចូលរួមសម្ពោធអគារទីស្នាក់ការត្រួតពិនិត្យច្រកទ្វារអន្តរជាតិ ត្រពាំងក្រៀល-ណងណុកខៀន ព្រំដែន កម្ពុជា-ឡាវ កាលពីថ្ងៃទី១០ មករា ម្សិលមិញ ។
សម្ដេចតេជោនាយករដ្ឋមន្ត្រីថ្លែងបន្ដថា ការអភិវឌ្ឍបណ្ដាញតភ្ជាប់រវាងប្រទេសទាំងពីរ ព្រមជាមួយនឹងការអភិវឌ្ឍហេដ្ឋារចនាសម្ព័ន្ធ ត្រួតពិនិត្យការចេញចូលឆ្លងកាត់ព្រំដែនប្រកបដោយភាពងាយស្រួល គឺពិតជាបានចូលរួមបង្កើនទំហំពាណិជ្ជកម្ម ការវិនិយោគ និងការដឹកជញ្ជូនឆ្លងកាត់ព្រំដែន ការបង្កើនលំហូរភ្ញៀវទេសចររវាងប្រទេសទាំងពីរ ក៏ដូចជាប្រទេសទី៣ឆ្លងកាត់ព្រំដែន ព្រមទាំងជួយសម្រួលក្នុងការផ្លាស់ប្ដូរទំនិញ កសិផល ការបង្កើនទំនាក់ទំនងផ្សារភ្ជាប់គ្នាទៅវិញទៅមករវាងប្រជាពលរដ្ឋនៅតំបន់ព្រំដែននៃប្រទេសទាំងពីរ ស្របតាមឆន្ទៈ និងការប្ដេជ្ញាចិត្តរបស់ថ្នាក់ដឹកនាំ និងប្រជាជននៃប្រទេសទាំងពីរកម្ពុជា-ឡាវ ។
នៅក្នុងឱកាសនោះសម្ដេចតេជោនាយករដ្ឋមន្ត្រីក៏បានប្រកាសថា ចាប់ពីខែមករា ឆ្នាំ២០១៧នេះតទៅ រដ្ឋាភិបាលនៃប្រទេសទាំងពីរ កម្ពុជា-ឡាវ បានអនុញ្ញាតឲ្យប្រជាពលរដ្ឋដែលរស់នៅតាមតំបន់ព្រំដែនប្រើប្រាស់ប័ណ្ណព្រំដែនសម្រាប់ជាឯកសារផ្លូវការ ក្នុងការចេញចូលឆ្លងកាត់ព្រំដែនតាមច្រកទ្វារអន្តរជាតិជាផ្លូវការនូវតំបន់ព្រំដែនដែលបានកំណត់ ដើម្បីជួយសម្រួល និងផ្សារភ្ជាប់គ្នារវាងប្រជាជន និងប្រជាជនតាមតំបន់ព្រំដែននៃប្រទេសទាំងពីរផងដែរ។ ជាមួយគ្នានេះ សម្ដេចតេជោក៏សូមឲ្យអាជ្ញាធរខេត្ត និងអាជ្ញាធរមូលដ្ឋាន ព្រមទាំងកងកម្លាំងមានសមត្ថកិច្ចតាមបណ្ដោយព្រំដែននៃប្រទេសទាំងពីរធ្វើការអប់រំផ្សព្វផ្សាយដល់ប្រជាជននៅតាមមូលដ្ឋានរៀងៗខ្លួនអំពីការប្រើប្រាស់ប័ណ្ណព្រំដែននេះ ។
ដើម្បីជួយជំរុញ និងលើកកម្ពស់កិច្ចសហប្រតិបត្តិការរវាងកម្ពុជា-ឡាវ ដែលជាប្រទេសមានភូមិផងរបងតែមួយ ប្រទេសទាំងពីរបានចុះកិច្ចព្រមព្រៀងលើអនុស្សរណៈ និងកំណត់ហេតុនៃកិច្ចប្រជុំនានាជាច្រើនលើគ្រប់វិស័យ ព្រមជាមួយនឹងការសហការរៀបចំយន្ដការសហប្រតិបត្តិការគ្នាតាំងពីថ្នាក់ជាតិរហូតដល់ថ្នាក់មូលដ្ឋាន ។
សម្ដេចថ្លែងថា ៖ « ខ្ញុំសូមជំរុញ និងលើកទឹកចិត្តដល់ក្រសួង ស្ថាប័ន ក៏ដូចជាយន្ដការសហប្រតិបត្តិការនានាដែលបានបង្កើតឡើង ព្រមទាំងអាជ្ញាធរខេត្ត អាជ្ញាធរមូលដ្ឋាន កងកម្លាំងមានសមត្ថកិច្ចតាមបណ្ដោយព្រំដែននៃប្រទេសទាំងពីរ បន្ដសហការគ្នាអនុវត្តឲ្យសម្រេចបាននូវលទ្ធផលស្របតាមការព្រមព្រៀងគ្នា ។ ក្នុងនោះ ខ្ញុំសូមជំរុញ និងលើកទឹកចិត្តដល់កម្លាំង មានសមត្ថកិច្ច និងអាជ្ញាធរមូលដ្ឋាននៅតាមបណ្ដោយព្រំដែននៃប្រទេសទាំងពីរបន្ដសហការគ្នាឲ្យកាន់តែប្រសើរក្នុងការគ្រប់គ្រង ការចេញចូលឆ្លងកាត់ព្រំដែន ដើម្បីរួមគ្នាបង្ការទប់ស្កាត់ការពារបទល្មើស និងឧក្រិដ្ឋកម្មឆ្លងកាត់ព្រំដែនគ្រប់ប្រភេទ ព្រមទាំងខិតខំសម្របសម្រួលរួមគ្នាដោះស្រាយបញ្ហានានាដែលកើតឡើងតាមព្រំដែនឲ្យបានទាន់ពេលវេលា និងដោយសន្ដិវិធី ឈរលើស្មារតីមិត្តភាពជាប្រពៃណី ភាពជាបងប្អូនភូមិផងរបងតែមួយ សំដៅរួមគ្នាពង្រឹង ពង្រីកទំនាក់ទំនងសហប្រតិបត្តិការរវាងប្រជាជាតិ និងប្រជាជននៃប្រទេសទាំងពីរឲ្យបានស្ថិតស្ថេរ រឹងមាំ និងមានការរីកចម្រើនឥតឈប់ឈរជានិច្ចនិរន្ដរ៍តទៅ » ៕
ចែករំលែកព័តមាននេះ