ប៉ូលិសចោទថារថយន្តបុក កំពុងសម្រាកព្យាបាលនៅថៃ អាចផ្លាស់ចេញពីប៉ោយប៉ែត
ខេត្តបន្ទាយមានជ័យ ៖ លោកស័ក្តិ៤ ឈាន ពិសិដ្ឋ មន្ត្រីប៉ូលិសអន្តោប្រវេសន៍ កំពុងសម្រាកព្យាបាលនៅប្រទេសថៃ ដែលកន្លងមកធ្វើឱ្យរំជើបរំជួលដោយគេចោទថា
ខេត្តបន្ទាយមានជ័យ ៖ លោកស័ក្តិ៤ ឈាន ពិសិដ្ឋ មន្ត្រីប៉ូលិសអន្តោប្រវេសន៍ កំពុងសម្រាកព្យាបាលនៅប្រទេសថៃ ដែលកន្លងមកធ្វើឱ្យរំជើបរំជួលដោយគេចោទថា
ខេត្តបន្ទាយមានជ័យ ៖ លោកស័ក្តិ៤ ឈាន ពិសិដ្ឋ មន្ត្រីប៉ូលិសអន្តោប្រវេសន៍ កំពុងសម្រាកព្យាបាលនៅប្រទេសថៃ ដែលកន្លងមកធ្វើឱ្យរំជើបរំជួលដោយគេចោទថា បានដួលមុខរថយន្តហើយចោទប្រកាន់លោក ឌិន ពុទ្ធី ថាបើករថយន្តបុកបង្ករបួស គ្រោងនឹងផ្លាស់ប្តូរចេញពីច្រកទ្វារប៉ោយប៉ែត ដើម្បីឱ្យប្រជាពលរដ្ឋស្ងប់អារម្មណ៍ ។ នេះជាការលើកឡើងរបស់លោកអភិបាលខេត្ត ក្នុងកិច្ចប្រជុំគណៈបញ្ជាការឯកភាព នៅរសៀលថ្ងៃទី៩ មករា នៅសាលប្រជុំសាលាខេត្ត ។
ក្នុងកិច្ចប្រជុំនេះ លោក សួន បវរ អភិបាលខេត្ត និងជាប្រធានគណៈបញ្ជាការឯកភាពខេត្ត បានលើកឡើងថា កាលពីថ្ងៃទី២២ ធ្នូ ឆ្នាំ២០១៦ នៅច្រកទ្វារអន្តរជាតិប៉ោយប៉ែត មានករណីលោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាលអន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត បានប្តឹងចោទប្រកាន់លោក ឌិន ពុទ្ធី ជាប្រធានសមាគមសេដ្ឋកិច្ចក្រៅប្រព័ន្ធ ថា បើករថយន្តបុកបណ្តាលឱ្យរបួសភ្លៅស្តាំ និងក រហូតដួលសន្លប់ ហើយត្រូវបានបញ្ជូនទៅមន្ទីរពេទ្យនៅប្រទេសថៃ ។ ភ្លាមៗនោះដែរ កម្លាំងនគរបាលអន្តោប្រវេសន៍បានឃាត់ខ្លួនលោក ឌិន ពុទ្ធី ប្រគល់ទៅកម្លាំងនគរបាលខេត្តបញ្ជូនខ្លួនទៅតុលាការ បានចោទប្រកាន់ពីបទហិង្សាដោយចេតនាមានស្ថានទម្ងន់ទោស ហើយត្រូវបានឃុំខ្លួននៅពន្ធនាគារ ។ រហូតដល់ថ្ងៃទី២៩ ធ្នូ សាច់ញាតិ និងប្រជាពលរដ្ឋបាននាំគ្នាតវ៉ានៅច្រកទ្វារអន្តរជាតិប៉ោយប៉ែត បង្កឱ្យប៉ះពាល់សណ្តាប់ធ្នាប់ និងសន្តិសុខនៅច្រកទ្វារអន្តរជាតិទៀតផង ។
លោក សួន បវរ បានលើកឡើងទៀតថា ដើម្បីឱ្យមានភាពស្ងប់ស្ងាត់ ថ្នាក់ដឹកនាំបានឱ្យលោកស័ក្តិ៤ ឈាន ពិសិដ្ឋ ដែលកំពុងសម្រាកព្យាបាលនៅប្រទេសថៃនៅឡើយនោះត្រូវមកធ្វើការដោះស្រាយ និងសម្របសម្រួលជាមួយលោក ឌិន ពុទ្ធី ដើម្បីបញ្ចប់រឿង ឱ្យប្រជាពលរដ្ឋមានភាពស្ងប់អារម្មណ៍ គឺលោកស័ក្តិ៤ ឈាន ពិសិដ្ឋ អនុប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត អាចប្រឈមការផ្លាស់ប្តូរចេញទៅធ្វើការកន្លែងផ្សេង ។
មុននេះលោក ឌិន ធីរិទ្ធ ប្អូនប្រុសបង្កើតរបស់លោក ឌិន ពុទ្ធី ដែលត្រូវបានជាប់ឃុំ ព្រោះតែរឿងក្តីរថយន្តបុកប៉ូលិសដ៏ចម្រូងចម្រាស បានព្រមានថា សាច់ញាតិ និងអ្នកគាំទ្រនឹងដាក់ពាក្យស្នើសុំទៅអាជ្ញាធរខេត្ត ដើម្បីធ្វើការតវ៉ាជាទ្រង់ទ្រាយធំរកយុត្តិធម៌ នៅច្រកទ្វារអន្តរជាតិប៉ោយប៉ែត យ៉ាងយូរនៅថ្ងៃទី១៧ មករាខាងមុខ ប្រសិនបើតុលាការមិនផ្ដល់យុត្តិធម៌ដើម្បីឲ្យបងប្រុសរបស់លោក មានសេរីភាពឡើងវិញទេនោះ ។
ការព្រមានតវ៉ាបែបនេះ បន្ទាប់ពីសាលាដំបូងខេត្តបន្ទាយមានជ័យ បានកោះហៅសាក្សីចំនួន៣នាក់ឲ្យចូលបំភ្លឺនៅព្រឹកថ្ងៃទី១០ មករា ក្រោយពីសាក្សីចំនួន៣នាក់បានដាក់ពាក្យស្នើទៅសាលាដំបូងខេត្ត កាលពីថ្ងៃទី២ មករាកន្លងទៅ ដើម្បីទៅបំភ្លឺដោះបន្ទុកពីការចោទប្រកាន់មកលើលោក ឌិន ពុទ្ធី ។
គួររំឭកថា ការតវ៉ាដំបូងកាលពីព្រឹកថ្ងៃទី២៩ ធ្នូ គេឃើញមានមនុស្សមិនដល់២០នាក់ទេ ហើយសមត្ថកិច្ចជំនាញពាក់ព័ន្ធបាននាំគ្នារុញច្រានឱ្យទៅធ្វើលើចិញ្ចើមផ្លូវ មុខអតីតខ្លោងទ្វារកាស៊ីណូ ហ្គោលដឹនក្រោន នៅខាងកើតខ្លោងទ្វារប្រាសាទកំពូល៣ ច្រកទ្វារព្រំដែនប្រហែល៧០ម៉ែត្រ ។ ក្រោយមកចំនួនអ្នកចូលរួមក៏កាន់តែមានចំនួនច្រើនឡើងៗ ដល់រាប់រយនាក់ និងស្រែកទាមទាររកយុត្តិធម៌យ៉ាងកងរំពង ។ មិនតែប៉ុណ្ណោះក្រុមអ្នកតវ៉ាបានព្យាយាមសំរុកទៅធ្វើការតវ៉ានៅលើស្ពានព្រំដែនម្តងហើយម្តងទៀត ទើបសមត្ថកិច្ចបន្ថែមកម្លាំងជាច្រើននាក់ មានទាំងនគរបាលការពារព្រំដែនគោកខាងជើង និងខាងត្បូងផ្លូវជាតិលេខ៥ (វរ៨៩១ និង៩១១) ដើម្បីទប់ស្កាត់រុញច្រានមិនឱ្យក្រុមអ្នកតវ៉ាបិទស្ពានព្រំដែន ព្រោះអាចធ្វើឱ្យប៉ះពាល់ដល់ទំនិញ សេដ្ឋកិច្ចពាណិជ្ជកម្ម និងភ្ញៀវទេសចរបរទេសដែលធ្វើដំណើរឆ្លងកាត់ ។
លោក ឌិន ពុទ្ធី ជាប្រធានសមាគមពង្រឹងសេដ្ឋកិច្ចក្រៅប្រព័ន្ធហៅកាត់ថា CIERA មានទីស្នាក់ការ និងលំនៅឋាននៅភូមិសាមគ្គីមានជ័យ សង្កាត់ប៉ោយប៉ែត ។ ប្រធានសមាគមរូបនេះ រងការចោទប្រកាន់ថា បានបើករថយន្តបុកលោកវរសេនីយ៍ត្រី ឈាន ពិសិដ្ឋ នាយរងប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត កាលពីព្រឹកថ្ងៃទី២២ ធ្នូ កន្លងទៅនេះ ដែលករណីខាងលើ បានធ្វើឱ្យមជ្ឈដ្ឋានមួយចំនួនយកទៅបង្ហោះក្នុងបណ្តាញសង្គមហ្វេសប៊ុកចោទថា នាយរងប៉ុស្តិ៍រូបនោះធ្វើពុតជាដួលសន្លប់គួរឱ្យហួសចិត្ត ខណៈហ្វេសប៊ុកមួយចំនួនទៀតបង្ហោះថា លោក ឈាន ពិសិដ្ឋ រងរបួសធ្ងន់ និងកំពុងសម្រាកព្យាបាលនៅឯមន្ទីរពេទ្យប្រទេសថៃ ៕
ចែករំលែកព័តមាននេះ