ខេត្តកំពង់ធំ ៖ អាជ្ញាធរស្រុកស្ទោង និងសង្កាត់រដ្ឋបាលព្រៃឈើស្ទោង រងការចោទប្រកាន់ថា បានបើកភ្លើងខៀវឲ្យឈ្មួញធ្វើអាជីវកម្មកូនឈើយ៉ាងអនាធិបតេយ្យនៅក្នុងទឹកដី …
ខេត្តកំពង់ធំ ៖ អាជ្ញាធរស្រុកស្ទោង និងសង្កាត់រដ្ឋបាលព្រៃឈើស្ទោង រងការចោទប្រកាន់ថា បានបើកភ្លើងខៀវឲ្យឈ្មួញធ្វើអាជីវកម្មកូនឈើយ៉ាងអនាធិបតេយ្យនៅក្នុងទឹកដីរបស់ខ្លួន ដោយពុំមានវិធានការទប់ស្កាត់ ហើយម្នាក់ឆ្លើយយករួចខ្លួន ហាក់ដូចជាមិនទទួលខុសត្រូវនូវទង្វើទាំងអស់របស់ខ្លួនសោះ ។
ប្រជាពលរដ្ឋរិះគន់ថា ជារៀងរាល់ថ្ងៃសកម្មនៃការកាប់បំផ្លាញព្រៃឈើជាពិសេសកូនឈើតូចៗត្រូវបានគេកាប់បំផ្លាញដឹកយកមកលក់តាមដេប៉ូឈើនៅក្នុងស្រុកស្ទោងដោយរលួន ដោយសារតែអាជ្ញាធរ និងសមត្ថកិច្ចព្រៃឈើស្រុកស្ទោងបើកភ្លើងខៀវឲ្យ ។ ពួកលោកបន្តថា ក្នុងមួយឆ្នាំៗនៅពេលបុណ្យរុក្ខទិវាម្តងៗនាំគ្នាដាំកូនឈើបានបួនប្រាំពាន់ដើមនោះថតផ្សាយតាមទូរទស្សន៍ ចុះការកាប់បំផ្លាញកូនឈើតូចៗក្នុងមួយថ្ងៃៗទូទាំងខេត្តកំពង់ធំរាប់ពាន់រាប់ម៉ឺនដើមនោះបែរជាមើលមិនឃើញមិននាំគ្នាទប់ស្កាត់ បើនៅតែដូច្នេះមិនយូរប៉ុន្មានទេ ព្រៃឈើទាំងតូចទាំងធំនឹងត្រូវរលាយអស់ជាក់ជាមិនខាន ។
ជុំវិញករណីនេះ លោក ព្រឹម រដ្ឋា អភិបាលស្រុកស្ទោង បានប្រាប់«កោះសន្តិភាព» នៅរសៀលថ្ងៃទី១០ ខែមករា ឆ្នាំ២០១៧ តាមទូរស័ព្ទថា នៅក្នុងស្រុកស្ទោងគ្មានកូនឈើវែងហើយត្រង់ៗឲ្យពួកគាត់កាប់ទេ គឺពលរដ្ឋនាំគ្នាកាប់ដឹកមកពី ស្រុកប្រាសាទបល្ល័ង្ក និងកាប់មកពីស្រុកសង្គមថ្មី ខេត្តព្រះវិហារ យកមកលក់នៅស្រុកស្ទោង ។ លោកបានឲ្យខាងសង្កាត់រដ្ឋបានព្រៃឈើស្ទោងកោះហៅម្ចាស់ដេប៉ូឈើមកធ្វើកិច្ចសន្យារួចហើយ ។ ហើយមួយរយៈនេះលោកជាប់រវល់ដឹកនាំកម្លាំងចុះទៅបង្ក្រាបបទល្មើសនេសាទ ពេលបង្ក្រាបរួចរាល់លោកនឹងមានវិធានការចំពោះការធ្វើអាជីវកម្មកូនឈើនេះម្តង ។
លោក ម៉ុល វណ្ណ នាយសង្កាត់រដ្ឋបាលព្រៃឈើស្ទោង បានប្រាប់ថា ចំពោះបញ្ហាខាងលើនេះ លោកបានចាត់ឲ្យនាយរងម្នាក់ចុះទៅធ្វើកិច្ចសន្យាជាមួយនឹងម្ចាស់ដេរប៉ូរួចហើយ អ្នកខ្លះប្រាប់ថា កូនឈើនេះសេសសល់ពីឆ្នាំមុន ហើយលោកនឹងសហការជាមួយខាងស្រុកចុះធ្វើឡើងវិញអំពីបញ្ហានេះ ។
លោក តឹប ញាតា នាយខណ្ឌរដ្ឋបាលព្រៃឈើកំពង់ធំ ប្រាប់នៅរសៀលថ្ងៃដដែលនេះថា ចំពោះករណីនេះលោកនឹងឲ្យខាងសង្កាត់រដ្ឋបាលព្រៃឈើស្ទោងចុះពិនិត្យ និងធ្វើរបាយការណ៍មកស្រុកដើម្បីសុំគោលការណ៍ពីខាងមន្ទីរ និងគណៈបញ្ជាការឯកពីភាពខេត្ត ពីព្រោះឥឡូវនេះខាងរដ្ឋបាលព្រៃឈើ គឺស្ថិតនៅក្រោមមន្ទីរកសិកម្ម រុក្ខាប្រមាញ់ និងនេសាទ មិនអាចដូចពីពេលមុនៗនោះទេ ៕
ចែករំលែកព័តមាននេះ