រាជធានីភ្នំពេញ ៖ ស្ត្រីម្នាក់មកដាក់ពាក្យបណ្ដឹងសុំឱ្យនគរបាលប៉ុស្ដិ៍ចោមចៅ ជួយអន្តរាគមន៍ឃាត់ខ្លួនបុរសជាមេការសំណង់ម្នាក់ ដោយបានចោទប្រកាន់ថា ធ្វើសកម្មភាពឆបោកលុយចំនួន២ពាន់ដុល្លារ ក្នុងកិច្ចសន្យាព្រមព្រៀងថា
រាជធានីភ្នំពេញ ៖ ស្ត្រីម្នាក់មកដាក់ពាក្យបណ្ដឹងសុំឱ្យនគរបាលប៉ុស្ដិ៍ចោមចៅ ជួយអន្តរាគមន៍ឃាត់ខ្លួនបុរសជាមេការសំណង់ម្នាក់ ដោយបានចោទប្រកាន់ថា ធ្វើសកម្មភាពឆបោកលុយចំនួន២ពាន់ដុល្លារ ក្នុងកិច្ចសន្យាព្រមព្រៀងថា នឹងសាងសង់ផ្ទះឱ្យគាត់ ប៉ុន្តែក្រោយពេលទទួលបានលុយដល់ដៃហើយ ជនសង្ស័យមិនគោរពតាមកិច្ចសន្យាទាល់តែសោះ ។
គ្រាន់តែកាប់រណ្ដៅបាន១រណ្ដៅប៉ុណ្ណោះ អត់មានដឹកសម្ភារសំណង់ចូលនៅឡើយទេ ស្រាប់តែមកទាមទារឱ្យគាត់កក់លុយថែម៥ពាន់ដុល្លារទៀត ទើបព្រមធ្វើផ្ទះឱ្យ ។ បើមិនដូច្នេះទេ ខ្លួននឹងមិនធ្វើឱ្យឡើយ ហើយលុយកក់ចំនួន២ពាន់ដុល្លារនោះ និងត្រូវដាច់តែម្ដង ។
ស្ត្រីរងគ្រោះមិនព្រមដែរ ក៏បានទាមទារយកលុយគាត់កក់នោះមកវិញ ហើយក៏ឈប់ឲ្យជាងបោកនោះ សាងសង់ផ្ទះឲ្យតទៅទៀតដែរ ព្រោះខ្លាចខាតបង់ច្រើនជាងនេះថែមទៀត ។ មិនតែប៉ុណ្ណោះ គាត់បានប្រាប់ថា បើមិនឲ្យលុយកក់វិញទេ នឹងប្ដឹង ប៉ុន្តែមេការសំណង់នោះ នៅតែមិនព្រមឲ្យលុយវិញឡើយ ព្រោះអាងមានខ្នងប៉េអឹម និងអះអាងថា ខ្លួនបានយកលុយទិញ សម្ភារសំណង់អស់ហើយ ទើបនាងប្ដឹងឲ្យនគរបាលជួយអន្តរាគមន៍ ។
មិនតែប៉ុណ្ណោះ ស្ត្រីម្នាក់ដែលអះអាងថា ជាបងស្រីរបស់មេជាងនោះ បានឡូឡាពេញប៉ុស្ដិ៍នគរបាលចោមចៅ និងស្រែគំរាមនគរបាលថា «អត់ដាច់ខាត សូម្បីតែមួយរៀល ក៏មិនសងដែរ ហើយឃើញខ្ញុំខោមិនខោ អាវមិនអាវបែបហ្នឹង លោកប៉ូលិសឯងដឹងថា ខ្ញុំមានខ្នង ជានរណាទេ ចង់បញ្ជូនទៅដល់ណា ក៏ដល់ទៅមិនខ្លាចទេ» ។
ទង្វើដ៏ច្រង៉េងច្រង៉ាងបែបនេះមិនដឹងថា ស្ត្រីជាបងជនសង្ស័យខាងលើ មានខ្នងធំប៉ុនណាទេ នគរបាលចាត់ទុកថា ជាការប្រមាថមើលងាយច្បាប់បំផុត ព្រោះសម័យនេះហើយនិយាយអាងខ្សែអាខ្នងបែបនេះ តែក៏មិនត្រូវអាងខ្នងប្រព្រឹត្តអំពើបែបនេះឡើយ។
ការចាប់ខ្លួននោះបានធ្វើឡើង កាលពីវេលាម៉ោង៥ល្ងាចថ្ងៃទី៩ មករា ឆ្នាំ២០១៧ នៅក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
បុរសមេជាងសំណង់ខាងលើ ឈ្មោះស៊ីថា អាយុប្រហែល៣០ឆ្នាំ មានទីលំនៅក្នុងភូមិកើតហេតុខាងលើ ចំណែកឯជនរងគ្រោះឈ្មោះ ខាន់ ស្រស់ អាយុ២៤ឆ្នាំ មានទីលំនៅក្នុងភូមិនោះដែរ ។
ក្រោយមក ខណៈនោះស្ត្រីរងគ្រោះមិនព្រម ព្រោះខ្លាចចរិតក្រឡិចក្រឡុចនោះ ហើយក៏មានការនិយាយចរចាគ្នា រហូតដល់វេលាយប់ថ្ងៃដដែលនោះ ទើបត្រូវគ្នា ដោយជននោះ បានសុំធ្វើកិច្ចសន្យាសងនៅវេលាម៉ោង២រសៀលថ្ងៃទី១០ មករា នៅប៉ុស្ដិ៍នគរបាលចោមចៅនោះ ដោយមានអ្នកធានាត្រឹមត្រូវ ទើបជនរងគ្រោះយល់ព្រម ។
ចែករំលែកព័តមាននេះ