បញ្ហាចោទឡើងចំពោះកុមារដែលពិបាកញ៉ាំអាហារ ប្រហែលជាកិច្ចការមួយដែលលំបាកនៅពេលផ្ដល់នូវរបបអាហារសុខភាពចម្រុះដល់គេ។ មិនថា ដោយសារតែកូនលោកអ្នកជួបបញ្ហាប្រតិកម្មចំណីអាហារ ឬមានបញ្ហាអាល្លែកហ្ស៊ី ឬដោយសារតែជាទម្លាប់រស់នៅរបស់គេក្ដី ដោយហេតុនេះលោកអ្នកអាចជួបប្រទះបញ្ហាមួយចំនួននៅពេលដែលត្រូវបំពេញនូវតម្រូវការរបបអាហារប្រចាំថ្ងៃ (RDAs) របស់ពួកគាត់មាន ដូចជា វីតាមីន សារធាតុរ៉ែខនិក ជាពិសេសកាល់ស្យូម។
កុមារលូតលាស់ឆ្អឹងជារៀងរាល់ថ្ងៃ ដូច្នេះហើយពួកគេទាមទារសារធាតុកាល់ស្យូម ដើម្បីពង្រឹងឆ្អឹង និងធ្មេញឲ្យរឹងមាំនាពេលអនាគត។ កាល់ស្យូមមានតួនាទីទប់ស្កាត់ជំងឺពុកឆ្អឹងដែលបណ្ដាលមកពីឆ្អឹងស្រួយ និងចុះខ្សោយដែលបណ្តាលឲ្យឆ្អឹងងាយបាក់។ កាល់ស្យូមគឺជាផ្នែកមួយជួយជំរុញឲ្យប្រព័ន្ធសរសៃប្រសាទ និងសាច់ដុំមានដំណើរការល្អ ជួយនូវដំណើរការ ឈាមកក និងជំរុញអង់ស៊ីម ដែលបំប្លែងអាហារទៅជាថាមពល។ សារធាតុរ៉ែខនិកដ៏អស្ចារ្យនេះ ក៏ជួយបង្ការជំងឺក្រិសដែលបណ្ដាលឲ្យឆ្អឹងកុមារទន់នឹងងាយបាក់។
ស្វែងយល់ពីកម្រិតរបបអាហារប្រចាំថ្ងៃរបស់កូនលោកអ្នក ប្រសិនបើលោកអ្នកមិនច្បាស់អំពីកម្រិតរបបអាហារប្រចាំថ្ងៃរបស់បុត្រធីតារបស់លោកអ្នកនោះទេ លោកអ្នកនឹងពិបាកក្នុងការកំណត់បរិមាណកាល់ស្យូមត្រឹមត្រូវ ដើម្បីបំប៉នកូនលោកអ្នក។ កម្រិតរបបអាហារូបត្ថម្ភប្រចាំថ្ងៃសំខាន់ណាស់ ព្រោះវាបង្ហាញលោកអ្នកនូវបរិមាណកាល់ស្យូមគ្រប់គ្រាន់មួយដែលកូនលោកអ្នកត្រូវការប្រចាំថ្ងៃ។ ចាំបាច់ត្រូវជួបប្រឹក្សាយោបល់ជាមួយគ្រូពេទ្យ ឬពេទ្យជំនាញផ្នែកកុមារ ដើម្បីបានយល់ដឹងអំពីបរិមាណអាហារូបត្ថម្ភប្រចាំថ្ងៃរបស់កូនលោកអ្នក ព្រមទាំងស្វែងយល់អំពីមធ្យោបាយធ្វើឲ្យកូនលោកអ្នកទទួលបាននូវអាហារូបត្ថម្ភបានគ្រប់គ្រាន់តាមការកំណត់ ជាពិសេសកាល់ស្យូម។
ប្រភពកាល់ស្យូមច្រើនទៀតក្រៅពីអាហារផលិតពីទឹកដោះ អាហារផលិតពីទឹកដោះដូចជាទឹកដោះគោ យ៉ាអ៊ួ និងឈីស សុទ្ធសឹងតែជាប្រភពកាល់ស្យូមដ៏មានប្រយោជន៍ ប៉ុន្តែកុំបារម្ភ ទោះបីជាកូនតូចរបស់លោកអ្នកមានបញ្ហាមិនអាចរំលាយស្ករទឹកដោះបាន ឬមានបញ្ហាអាល្លែកហ្ស៊ីជាមួយទឹកដោះគោក្ដី ក៏កូនលោកអ្នកនៅតែអាចទទួលបានកម្រិតរបបអាហារប្រចាំថ្ងៃ (RDA) ដែលជាតម្រូវការរបស់ខ្លួនតាមរយៈអាហារចម្រុះដែលមានផ្ទុកដោយកាល់ស្យូមខ្ពស់ ងាយស្រួលរក ហើយភាគច្រើនសមស្របនឹងរបបអាហាររបស់ប្រជាជនខ្មែរយើង។
ប្រភពអាហារទាំងនោះរួមមាន ៖ • ត្រីខសាឌីនមានខ្លាញ់ • ត្រីម្យ៉ាងស្រដៀងត្រីព្រួល • ត្រីសាឌីនធំ • បង្គា • ស្ពៃបូកគោ • ស្ពៃតឿ • ផ្កាស្ពៃខៀវ • សណ្ដែកបារាំង • តៅហ៊ូ • សណ្ដែកស • សណ្ដែកក្រហម • សណ្ដែកហូឡាន់តាវ • គ្រាប់អាល់ម៉ុន និងគ្រាប់កៅឡាក់ជាដើម។
ដូចលោកអ្នកបានឃើញហើយថា កូនលោកអ្នកអាចរក្សាបាននូវបរិមាណកាល់ស្យូមត្រឹមត្រូវដោយពុំចាំបាច់ត្រូវការអាហារផលិតពីទឹកដោះឡើយ។ ប៉ុន្តែសូមកុំបញ្ឈប់ផ្ដល់ត្រឹមតែអាហារដែលបានលើកឡើងខាងលើនេះឲ្យសោះ។ លោកអ្នកក៏អាចជ្រើសរើសផលិតផលសម្បូរជាតិកាល់ស្យូមខ្ពស់ដែលមានដូចជា ទឹកសណ្ដែកសៀង បាយ ឬអាល់ម៉ុន គ្រាប់ធញ្ញជាតិ និងអាហារសម្រន់ផ្សេងទៀត។ សម្រាប់ទឹកផ្លែឈើសម្បូរជាតិកាល់ស្យូមខ្ពស់មានដូចជា ផ្លែប៉ោម និងទឹកក្រូចស្រស់ជាដើម មានផ្ទុកកាល់ស្យូមដែលមានអត្រាស្រូបយកខ្ពស់។ ប៉ុន្តែមុននឹងទិញអាហារទាំងនេះ គប្បីប្រឹក្សាជាមួយគ្រូពេទ្យ និងចងចាំទុកនូវកម្រិតរបបអាហារប្រចាំថ្ងៃសម្រាប់កូនលោកអ្នក និងការទទួលទានប្រភពអាហារសម្បូរកាល់ស្យូមដទៃទៀត។ កត្តានេះនឹងជួយទប់ស្កាត់លោកអ្នកក្នុងការផ្ដល់កាល់ស្យូមជ្រុលហួសប្រមាណដល់កូនលោកអ្នក។
បន្ថែមគុណប្រយោជន៍ល្អៗក្នុងអាហារប្រចាំថ្ងៃ ប្រសិនបើកូនលោកអ្នកមានបញ្ហាមិនអាចរំលាយស្ករទឹកដោះបាន ហើយមិនចូលចិត្តទទួលទានបន្លែ (ដូចក្មេងភាគច្រើន) លោកអ្នកអាចបន្ថែមជាតិកាល់ស្យូមក្នុងមុខម្ហូបក្រៅពីអាហារផលិតពីទឹកដោះជារៀងរាល់ថ្ងៃបាន។ ទាំងនេះជាដំបូន្មានមួយចំនួន ៖ • បន្ថែមសណ្ដែកស/សណ្ដែកក្រហមក្នុងស៊ុប • ញ៉ាំបន្លែ ឬធញ្ញជាតិជាមួយគ្រាប់អាល់ម៉ុន និងសណ្ដែកហូឡាន់តាវ • ច្របាច់ទឹកផ្លែឈើស្រស់ដែលមានជាតិកាល់ស្យូមមួយកែវសម្រាប់អាហារពេលព្រឹក ឬទទួលទានទឹកសណ្ដែកក៏បាន។ • បន្ថែមម្សៅស្រូវសាលីក្នុងរបបអាហារដទៃទៀត ដោយមិនចាំបាច់តែអាហារពេលព្រឹកនោះទេ។ • បន្លំដាក់បន្លែបៃតងចាស់បន្តិច (ដូចជាផ្កាស្ពៃខៀវ ឬស្ពៃតឿ) ក្នុងអាហារ។ • ទទួលទានអាហារសម្រន់មានជាតិកាល់ស្យូមដូចជា ក្រូច ល្វា និងគ្រាប់ធញ្ញជាតិជាដើម។
លោកអ្នកអាចធ្វើបានច្រើនយ៉ាង ! ប្រសិនបើនៅតែបារម្ភថា កូនលោកអ្នកទទួលទានសារធាតុកាល់ស្យូមប្រចាំថ្ងៃមិនគ្រប់គ្រាន់ទៀត មានវិធីជាច្រើនទៀតដែលលោកអ្នកអាចធ្វើបាន។ វិធីទាំងនោះមានដូចជា៖
បំពេញបន្ថែម ៖ កាល់ស្យូមបំពេញបន្ថែមត្រូវបានណែនាំឲ្យប្រើប្រាស់ទៅតាមអាយុ និងភេទសម្រាប់អ្នកដែលទទួលបរិមាណសារធាតុរ៉ែខនិកពីរបបអាហារមិនគ្រប់គ្រាន់ ពិសេសសម្រាប់អ្នកដែលមានបញ្ហាមិនអាចរំលាយស្ករទឹកដោះបាន។ សូមប្រាប់គ្រូពេទ្យអំពីប្រភេទ និងបរិមាណកាល់ស្យូមបំពេញបន្ថែមដែលលោកអ្នកផ្ដល់សម្រាប់កូនលោកអ្នកតាមអាយុ និងភេទរបស់ពួកគេ មុនពេលឈានទៅជំហានបន្ទាប់ទៀត។
វីតាមីន D ៖ រាងកាយកូនលោកអ្នកត្រូវការវីតាមីន D ដើម្បីស្រូបយកជាតិកាល់ស្យូមចូលក្នុងខ្លួន។ ការឲ្យស្បែកនៃរាងកាយត្រូវពន្លឺថ្ងៃពេលព្រឹកក្នុងមួយថ្ងៃឲ្យបាន10-15នាទី អាចជួយផ្ដល់វីតាមីន D បាន ក៏ដូចជាត្រូវទទួលទានអាហារ ដែលផ្ទុកវីតាមីន D ខ្ពស់ផងដែរ។ អាហារទាំងនោះរួមមាន ស៊ុតផ្នែកលឿង ត្រីទឹកប្រៃ និងថ្លើមជាដើម។
ការហាត់ប្រាណ ៖ ការជិះកង់ ការរត់ត្រឹកៗ ការលេងបាល់ ការរាំ និងហាត់លើកទម្ងន់យ៉ាងតិច30-60នាទីក្នុងមួយថ្ងៃ បីទៅប្រាំដងក្នុងមួយសប្ដាហ៍អាចជួយពង្រឹងម៉ាស និងដង់ស៊ីតេឆ្អឹងឲ្យរឹងមាំ។ លំហាត់ប្រាណទាំងនេះ ជួយជំរុញឲ្យឆ្អឹងនៃរាងកាយរឹងមាំ។
ចៀសវាងកាហ្វេអ៊ីន ៖ ជាតិកាហ្វេអ៊ីនមាននៅក្នុងតែ កាហ្វេ និងភេសជ្ជៈកំប៉ុងមួយចំនួន។ ជាតិកាហ្វេអ៊ីនធ្វើឲ្យរាងកាយកូនលោកអ្នកពិបាកស្រូបយកជាតិកាល់ស្យូម។
ចែករំលែកព័តមាននេះ