រាជធានីភ្នំពេញ ៖ ក្នុងគោលបំណងផ្សព្វផ្សាយ និងលើកតម្កើនសិល្បៈបុរាណខ្មែរ ដែលជាកេរមរតកដ៏ខ្ពង់ខ្ពស់នៃដូនតាបុព្វបុរស និងជំរុញឱ្យប្រជាជន ក៏ដូចជាស្រទាប់យុវវ័យស្រឡាញ់គាំទ្រវប្បធម៌ខ្មែរ សាលារបាំនរោត្តម បុប្ផាទេវី និងសហភាពសហព័ន្ធយុវជនកម្ពុជា ខេត្តស្វាយរៀង បានសហការរៀបចំព្រឹត្តិការណ៍មហោស្រពប្រចាំឆ្នាំដ៏ធំមួយ គឺរបាំក្បាច់បុរាណខ្មែរ រឿង «ព្រះបាទជ័យរវ្ម័នទី៧» ដកស្រង់ត្រង់ឈុត ស្នាព្រះហស្ថ និងសមិទ្ធផលនៃមហាវីរក្សត្រទាំង៣អង្គ។
មហោស្រពផ្ទាំងសិល្បៈទស្សនីយភាពនេះ ទទួលបានការគាំទ្រដោយក្រសួងវប្បធម៌ និងវិចិត្រសិល្បៈ ព្រមទាំងសហការផ្សព្វផ្សាយដោយទូរទស្សន៍ BTV ផងដែរ។ សិល្បករ និងសិល្បការិនីជាង២០០នាក់ នឹងចូលរួមសម្ដែងក្នុងព្រឹត្តិការណ៍ដ៏អស្ចារ្យមួយនេះ ដែលនឹងប្រព្រឹត្តទៅនៅសាលសន្និសីទចតុមុខ ថ្ងៃទី២៧-២៨ ខែសីហា ឆ្នាំ២០២២។
អ្នករៀបចំកម្មវិធីលោក កុលបុត្រា បានលើកឡើងប្រាប់កោះសន្តិភាពថា ផ្ទាំងទស្សនីយភាពនេះ ត្រូវបានតំឡើងដោយអ្នកគ្រូនៅសាលារបាំនរោត្តម បុប្ផាទេវី ដោយនៅក្នុនោះមានការចូលរួមសម្តែងពីសិល្បករ សិល្បការិនី ដែលធ្លាប់មានស្នាដៃមកពីគ្រប់មជ្ឈដ្ឋាន។
លោកបន្តថា សាច់រឿងខាងលើនេះធំ ហេតុនេះត្រឹមកូនសិស្សសាលារបាំនរោត្តម បុប្ផាទេវី នោះ មិនអាចសម្តែងបានឡើយ ហេតុនេះគឺទាមទារអោយមានការចូលរួមពីសិល្បករ សិល្បការិនី មកពីគ្រប់មជ្ឈដ្ឋាននានា។
លោកបញ្ជាក់ថា សិល្បករ សិល្បការិនី ដែលចូលរួមសម្តែងទាំងអស់ក៏នឹងត្រូវបានទទួលការបង្ហាត់បង្ហាញបន្ថែមមុនការសម្តែងមកដល់ ដើម្បីឲ្យសាច់រឿងមើលទៅមានភាពទាក់ទាញ និងត្រូវទម្រង់សិល្បៈបុរាណខ្មែរ។ យ៉ាងណាលោករំពឹងថា ការសម្តែងផ្ទាំងទស្សនីយភាពនេះនឹងទទួលបានជោគជ័យ រួមទាំងមានការចូលរួមទស្សនាពីសំណាក់ទស្សនិកជនមកពីគ្រប់ទិសទី ដើម្បីជាការចូលរួមចំណែកលើកស្ទួយដល់វិស័យសិល្បៈបុរាណខ្មែរយើង។
គួរបញ្ជាក់ថា សម្រាប់ការចូលទស្សនាលោកអ្នកអាចជាវសំបុត្រតាមរយៈអនឡាញ តេលេក្រាម ០៧៧ ៤៤៤ ៣៣៥ និងមានការលក់ផ្ទាល់នៅសាលសន្និសីទចតុម្មុខ ចាប់ពីថ្ងៃ២២ ដល់ថ្ងៃទី២៨ ខែសីហា ឆ្នាំ២០២២។ កន្លែងមានកំណត់! តម្លៃសំបុត្រមាន សំបុត្រពិសេស (VIP) ១០០,០០០៛ រីឯតំបន់ពណ៌បៃតង (Green Zone) ៤០,០០០៛ និងចំពោះតំបន់ពណ៌ខៀវ (Blue Zone) ២០,០០០៛ ។
ការសម្ដែងចែកចេញជា ២ ពេលក្នុងមួយថ្ងៃ គឺម៉ោង ៣:០០ រសៀល និង ៦:០០ ល្ងាច។ ហើយរឹតតែពិសេសទៀតនោះ ក៏មានការតាំងបង្ហាញគ្រឿងសិល្បៈបុរាណ និងការលក់ឧបករណ៍សិល្បៈបុរាណផ្សេងៗ និងវត្ថុអនុស្សាវរីយ៍ជាច្រើនមុខទៀតពីសំណាក់លោកគ្រូ និងអ្នកគ្រូ និងសមាគមនានា៕
ចែករំលែកព័តមាននេះ