រាជធានីភ្នំពេញ ៖ ចំនួនភ្ញៀវទេសចរបរទេសដែលចូលទស្សនានៅរមណីយដ្ឋានអង្គរក្នុងឆ្នាំ២០១៦ មានជាង២,១លាននាក់ កើនឡើង៤,៦៣% និងទទួលបានប្រាក់ចំណូលសរុបប្រមាណជាង៦២លានដុល្លារ កើនឡើង៤,២១% បើធៀបនឹងឆ្នាំ២០១៥ ។ នេះបើយោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ។
ដោយឡែកសម្រាប់ខែធ្នូ ឆ្នាំ២០១៦ គ្រឹះស្ថានអង្គរបានលក់ប័ណ្ណចូលទស្សនាតំបន់អង្គរជូនភ្ញៀវបរទេសបានចំនួន២៤៩.៤៨២នាក់ ប្រមូលចំណូលបាន ៧.១៦១.៣០០ដុល្លារ ។
យោងតាមសេចក្ដីប្រកាសដដែលបញ្ជាក់ថា ចាប់ពីថ្ងៃទី១ កុម្ភៈ ឆ្នាំ២០១៧ តទៅគ្រឹះស្ថានអង្គរនឹងដំឡើងថ្លៃលក់ប័ណ្ណ ចូលទស្សនារមណីយដ្ឋានអង្គរ ក្នុងនោះប័ណ្ណចូលទស្សនាមាន៣ប្រភេទគឺ
១-ប្រភេទទី១ ចូលទស្សនា១ថ្ងៃ មានតម្លៃ៣៧ដុល្លារ។
២-ប្រភេទី២ ចូលទស្សនា៣ថ្ងៃ មានតម្លៃ៦២ដុល្លារ ដែលមានសុពលភាពរយៈពេល១០ថ្ងៃ ។
៣-ប្រភេទទី៣ តម្លៃ៧២ដុល្លារចូលទស្សនា បាន៧ថ្ងៃ មានសុពលភាពរយៈពេល៣០ថ្ងៃ ។
រដ្ឋមន្ត្រីក្រសួងទេសចរណ៍ លោក ថោង ខុន មានប្រសាសន៍នាពេលថ្មីៗនេះថា ៖ « ទោះជាកំណើនភ្ញៀវអន្តរជាតិមិនច្រើនក្តី តែក៏មិនតិចប៉ុន្មានដែរ ដែលលទ្ធផលនេះ គឺដោយសារស្ថានភាពប្រទេសកម្ពុជាស្ថិតក្រោមពន្លឺនៃសន្តិភាព និងមានទំនាក់ទំនងកិច្ចសហប្រតិបត្តិការល្អជាមួយដៃគូអន្តរជាតិនានា » ។
ទន្ទឹមនឹងនេះ ការតភ្ជាប់ជើងហោះហើរត្រង់ពីកម្ពុជាទៅកាន់តំបន់ទេសចរណ៍ធំៗនៅក្រៅប្រទេស ក៏ជាកត្តារួមចំណែកធំមួយផងដែរ ។ កាលពីមុន ភ្ញៀវទេសចរអន្តរជាតិចូលមកកម្ពុជា មុននឹងមកដល់ត្រូវចុះចតនៅប្រទេសជិតខាងសិន ដូចជា ថៃ វៀតណាម ម៉ាឡេស៊ី និងសិង្ហបុរី ជាដើម ។ ប៉ុន្តែបច្ចុប្បន្ននេះ កម្ពុជាមានជើងហោះហើរត្រង់ជាច្រើន ដែលជាមធ្យោបាយដ៏ប្រសើរបំផុត ហើយបាននិងកំពុងតភ្ជាប់បន្ថែមទៅកាន់ប្រទេសមួយចំនួនទៀត ។
ជាមួយគ្នានេះ កម្ពុជាក៏បាននិងកំពុងរៀបចំផែនការយុទ្ធសាស្ត្រដូចជា ៖ ១-ការពង្រឹងគុណភាពសេវាកម្មទេសចរណ៍ ដែលចាំបាច់ត្រូវមានធនធានមនុស្សប្រកបដោយជំនាញវិជ្ជាជីវៈ ក្នុងនោះមគ្គុទេ្ទសក៍ទេសចរណ៍ភាសាជប៉ុន គឺជាកត្តាសំខាន់មួយ ។ យើងក៏បានរៀបចំការប្រកួតប្រជែងជ្រើសរើសមគ្គុទ្ទេសក៍ទេសចរណ៍និយាយភាសាជប៉ុនឆ្នើមជាប្រចាំផងដែរ ហើយក្នុងឆ្នាំ២០១៦នេះ យើងគ្រោងនឹងរៀបចំនៅខែវិច្ឆិកា ។ ២-ការអភិវឌ្ឍផលិតផលទេសចរណ៍នានាដូចជា សណ្ឋាគារលំដាប់ផ្កាយ៥ សាលសន្និសីទ និងមជ្ឈមណ្ឌលពិព័រណ៍អន្តរជាតិ ភោជនីយដ្ឋានធំៗ ផ្សារទំនើប កន្លែងលេងកម្សាន្តលក្ខណៈគ្រួសារ និងមជ្ឈមណ្ឌលកម្សាន្តសម្រាប់មនុស្សពេញវ័យ កីឡាទេសចរណ៍ នាវាទេសចរណ៍ តំបន់ទេសចរណ៍ផ្ទះទី២ (Second Home Tourist) និងទេសចរណ៍វ័យចំណាស់នៅតាមតំបន់គោលដៅទាក់ទាញទេសចរណ៍ដូចជា រាជធានីភ្នំពេញ តំបន់សៀមរាបអង្គរ និងតំបន់ឆ្នេរ ដែលត្រូវការចាំបាច់វិនិយោគិនមកបណ្តាក់ទុនអភិវឌ្ឍន៍ផលិតផលទាំងអស់ខាងលើ ៕
ចែករំលែកព័តមាននេះ