ខេត្តព្រះសីហនុ៖ ជនសង្ស័យចំនួន ០២នាក់ ត្រូវបានកម្លាំងប៉ុស្តិ៍រដ្ឋបាលឃុំបិតត្រាំង ឃាត់ខ្លួន ក្នុងខណៈពេលដែលកម្លាំងប៉ុស្តិ៍ ល្បាត។

លោកវរសេនីយ៍ទោ អ៊ួង វុទ្ធី អធិការនគរបាលស្រុកព្រៃនប់ បានអោយដឹងថា នៅថ្ងៃទី២៦កក្កដា ឆ្នាំ២០២២ វេលាម៉ោង ១១ និង ៤៥នាទីព្រឹក នៅចំណុចក្នុងតំបន់សេដ្ឋកិច្ចពិសេសបិតត្រាំង ស្ថិតក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ កម្លាំងនគរបាលប៉ុស្តិ៍ បាន ឃាត់ខ្លួនជនង្ស័យ ចំនួន ០២នាក់: ១.ឈ្មោះ សឿន សុខណន ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ។ ២.ឈ្មោះ ឆេន ឡុង ភេទប្រុស អាយុ ១៨ឆ្នាំ មុខរបកម្មករ ស្នាក់នៅផ្ទះជួលភូមិពូធឿង ឃុំបិតត្រាំង ស្រុកព្រៃនប់ ខេត្ត​ព្រះសីហនុ។

ការចាប់ខ្លួន​យុវជនទាំង ២នាក់នេះ បានធ្វើឡើង ខណៈពេលកម្លាំងប៉ុស្តិ៍ កំពុងល្បាត ហើយក៏ប្រទះឃើញជន​សង្ស័​យខាងលើ កំពុងធ្វើសកម្មភាពដេញវាយសិស្សសាលា នៅចំណុចខាងលើ។

ក្រោយពីធ្វើការឃាត់ខ្លួន យកមកសាក​សួរ ជនសង្ស័យ ឈ្មោះ សឿន សុខណន បានសារភាពថា កន្លងមក ខ្លួនធ្លាប់បានធ្វើសក​ម្មភាព​ឆក់ខ្សែក នៅក្នុងមូល​ដ្ឋានស្រុកព្រៃនប់ បានចំនួន​ ០៤លើក រួមមាន លើកទី១ថ្ងៃទី១៤.០៦.២០​២២ ធ្វើសកម្មភាពឆក់នៅ​ចំនុចផ្លូវបេតុង ក្នុងភូមិស្មាច់ដែង ឃុំរាម ​ដោយឆក់បានបណ្តោង ខ្សែក១ រូបបេះដូង ចំនួន០១។ លើកទី២ នៅថ្ងៃទី២១.០៧. ២០២២ ឆក់នៅចំនុចផ្លូវលំ ក្នុងភូមិរាម ឃុំរាម ស្រុកព្រៃ​នប់ ឆក់បានខ្សែក ១កំណាត់​។ លើកទី៣ ថ្ងៃទី២៥.០៧.២០​២២ ធ្វើសកម្មភាពឆក់នៅភូមិថ្មធំ ឃុំរាម បានខ្សែក ០១ខ្សែ។ លើកទី៤ អំឡុងខែ៦ ឆ្នាំ​២០​២២ ធ្វើសកម្មភាព ឆក់នៅ​ចំនុច សេតេ ក្រុងព្រះសីហនុ ​បានខ្សែក ០១ខ្សែ។ ក្រោយពីធ្វើសកម្មភាព ឆក់បាន គឺយកទៅលក់នៅ​ក្នុងផ្សារលើ ក្រុងព្រះសីហនុ។

លោកអធិការ បានបញ្ជាក់ថា ជនសង្ស័យទាំង ០២នាក់ គឺជាមុខសញ្ញា ដែល​សមត្ថកិច្ច តាមប្រមាញ់ តាំងពីពេល ដែលពួកគេបានធ្វើសកម្មភាពឆក់ រួចភ្លាមៗមកម្ល៉េះ។

ជនសង្ស័យ ទាំង ០២​នាក់ខាងលើ រួមជាមួយវត្ថុតាង គឺម៉ូតូ​ ០១គ្រឿង និងទូរសព្ទ ចំនួន ០២គ្រឿង ត្រូវបានបញ្ជូនទៅការិយាល័យជំនាញ ដើម្បីបន្តនីតិវិធី៕