រាជធានីភ្នំពេញ ៖ ស្របពេលធនាគារជាតិនៃកម្ពុជាដាក់ឲ្យដំណើរការប្រព័ន្ធ Central Shared Switch ដែលអនុញ្ញាតឲ្យអ្នកប្រើប្រាស់កាតអេធីអឹមទាំងអស់អាចដកប្រាក់បានពីធនាគារផ្សេងៗដោយសេរីបាននោះ ប៉ុន្តែ
រាជធានីភ្នំពេញ ៖ ស្របពេលធនាគារជាតិនៃកម្ពុជាដាក់ឲ្យដំណើរការប្រព័ន្ធ Central Shared Switch ដែលអនុញ្ញាតឲ្យអ្នកប្រើប្រាស់កាតអេធីអឹមទាំងអស់អាចដកប្រាក់បានពីធនាគារផ្សេងៗដោយសេរីបាននោះ ប៉ុន្តែពួកគេក៏តម្រូវឲ្យមានការបង់ប្រាក់លើការប្រើប្រាស់សេវាកម្មនោះផងដែរ ។
ប្រធាននាយកប្រតិបត្តិធនាគារអេស៊ីលីដា ភីអិលស៊ី លោក អុិន ចាន់នី បានឲ្យដឹងនាព្រឹកថ្ងៃទី២៨ ធ្នូ ម្សិលមិញថា ការដាក់ឲ្យប្រើប្រាស់ប្រព័ន្ធ Central Shared Switch របស់ធនាគារជាតិ គឺអាចឲ្យធនាគារទាំងអស់តភ្ជាប់ជាមួយគ្នា ដែលអនុញ្ញាតឲ្យអតិថិជនអាចដកប្រាក់នៅធនាគារណាក៏បាន ។ ការអនុវត្តសេវាបែបនេះជាការល្អ ព្រោះនៅកម្ពុជាមានធនាគារពាណិជ្ជ និងធនាគារឯកទេសសរុបចំនួន៥១ ហើយធនាគារនីមួយៗមានទូអេធីអឹមរៀងខ្លួន ។
លោកមានប្រសាសន៍ថា ៖ « ការអនុញ្ញាតបែបនេះមានភាពងាយស្រួល ប៉ុន្តែអ្នកប្រើប្រាស់កាតអេធីអឹមដែលចង់ដកប្រាក់នៅធនាគារផ្សេង ពួកគេត្រូវបង់សេវាកម្មពីការប្រើប្រាស់សេវារបស់ពួកគេ ។ ប៉ុន្តែពួកគេនឹងមិនចំណាយសេវានោះទេ បើដកប្រាក់ពីធនាគារដែលពួកគេដាក់ប្រាក់ផ្ទាល់ » ។
លោកបន្តថា ៖ « នេះជាផែនការជំហានដំបូង ព្រោះប្រទេសជាសមាជិកអាស៊ាន មានផែនការតភ្ជាប់ប្រព័ន្ធទូទាត់សាច់ប្រាក់បែបនេះនៅពេលអនាគត ប៉ុន្តែអ្វីសំខាន់ គឺប្រព័ន្ធថ្នាក់ជាតិរបស់យើងរួចរាល់សិន » ។
លោកបន្តទៀតថា រហូតមកទល់ពេលនេះ ធនាគារពាណិជ្ជ និងធនាគារឯកទេសសរុបទាំងអស់បានរៀបចំខ្លួនរួចរាល់ហើយដើម្បីអនុវត្តការប្រើប្រាស់សេវាកម្មរួមនេះ ។
យោងតាមសេចក្តីប្រកាសព័ត៌មានរបស់ធនាគារជាតិនៃកម្ពុជា កាលពីម្សិលមិញបានឲ្យដឹងថា ប្រព័ន្ធនេះនឹងផ្តល់លទ្ធភាពឲ្យអតិថិជនធនាគារទាំងអស់អាចប្រើប្រាស់ប័ណ្ណឥណពន្ធ ឬកាតអេធីអឹមដកប្រាក់ និងទូទាត់តាមទីផ្សារ ទោះម៉ាស៊ីនអេធីអឹមនោះមិនមែនជារបស់គ្រឹះស្ថានធនាគារខ្លួនក៏ដោយ ។ ជាមួយគ្នានេះ ការទូទាត់តាមរយៈទូរស័ព្ទ និងទិញទំនិញតាមអនឡាញ នឹងធ្វើឡើងដោយងាយស្រួល មានសុវត្ថិភាព និងប្រសិទ្ធភាពខ្ពស់ ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា ប្រព័ន្ធបែបនេះត្រូវបានគេអនុវត្តជាយូរមកហើយនៅប្រទេសជឿនលឿននានា ប៉ុន្តែអ្វីសំខាន់ថា តើប្រព័ន្ធបច្ចេកវិទ្យាព័ត៌មានវិទ្យានីមួយៗអាចធ្វើបានឬនៅ ។ លោកថ្លែងថា ៖ « ការដាក់ឲ្យអនុវត្តនូវសេវាទូទាត់សាច់ប្រាក់រួមបែបនេះ វាជួយសម្រួលទីផ្សារហិរញ្ញវត្ថុនៅកម្ពុជា ប៉ុន្តែការប្រើប្រាស់សេវាបែបនេះ អតិថិជននឹងត្រូវបង់ថ្លៃសេវា ប្រសិនជាពួកគេប្រើប្រាស់ការទូទាត់នៅធនាគារផ្សេងក្រៅពីធនាគារដែលពួកគេដាក់សាច់ប្រាក់ » ៕
ចែករំលែកព័តមាននេះ