ខេត្តត្បូងឃ្មុំ ៖ អ្នកជីកត្រពាំងម្នាក់បានស្លា.ប់ និង២នាក់ទៀតបានរងរបួសធ្ងន់ ដោយសាររថយន្ត១បាំងកន្លះបុកពេញទំហឹងកាលពីវេលាម៉ោង៤ទៀបភ្លឺ ថ្ងៃទី២៣ ខែធ្នូ ឆ្នាំ២០១៦ …
ខេត្តត្បូងឃ្មុំ ៖ អ្នកជីកត្រពាំងម្នាក់បានស្លាប់ និង២នាក់ទៀតបានរងរបួសធ្ងន់ ដោយសាររថយន្ត១បាំងកន្លះបុកពេញទំហឹងកាលពីវេលាម៉ោង៤ទៀបភ្លឺ ថ្ងៃទី២៣ ខែធ្នូ ឆ្នាំ២០១៦ នៅលើផ្លូវជាតិលេខ៧ ចំណុចភូមិសួងលិច សង្កាត់សួងក្រុងសួង ។
លោក ឆៃ សុខុន អធិការរងនគរបាលក្រុងសួង ទទួលផែនសណ្តាប់ធ្នាប់ បានប្រាប់ឲ្យដឹងថា ប្រជាពលរដ្ឋប្រុសស្រីដែលបាននាំគ្នាជិះម៉ូតូបន្តកន្ទុយគ្នាពី៥-៦គ្រឿងចេញពីភូមិរកាធំ ឃុំជីរោទិ៍ទី១ ស្រុកត្បូងឃ្មុំដើម្បីទៅជីកត្រពាំងនៅក្នុងទឹកដីខេត្តក្រចេះយកមកលក់ ស្របពេលដែលជិះមកដល់កន្លែងកើតហេតុក៏ត្រូវបានរថយន្តប្រភេទធុនតូច១បាំងកន្លះបើកបញ្ច្រាសទិសគ្នាឆែលមកបុកម៉ូតូនៅចំណែកខាងស្តាំដៃពេញទំហឹងតែម្តង ។
លោក ឆៃ សុខុន បានប្រាប់បន្តថា ប្រជាពលរដ្ឋរងគ្រោះឈ្មោះ លី សៀកលីម ភេទប្រុស អាយុ២៨ឆ្នាំ រងរបួសធ្ងន់ ជាអ្នកបើកបរម៉ូតូម៉ាកវ៉េវ ពណ៌ខ្មៅ ពាក់ស្លាកលេខ កំពង់ចាម 1M-9054 ចំណែកម៉ូតូ១គ្រឿងទៀតម៉ាកវ៉េវ ពណ៌ខ្មៅ គ្មានស្លាកលេខ ជិះគ្នា២នាក់ប្តីប្រពន្ធ ដោយប្តីឈ្មោះ ទូច រឿន អាយុ៤៧ឆ្នាំ រងរបួសធ្ងន់ ចំណែកប្រពន្ធឈ្មោះ ហោ ស្រ៊ុន អាយុ៥៧ឆ្នាំ បានស្លាប់នៅនឹងកន្លែងកើតហេតុ ។
ក្រោយពេលកើតហេតុ សមត្ថកិច្ចបានចុះមកជួយអន្តរាគម៍នាំអ្នករងរបួសទៅសង្គ្រោះនៅមន្ទីរពេទ្យបង្អែកស្រុកជាបន្ទាន់ ចំណែកសពស្ត្រីដែលស្លាប់បានប្រគល់ឲ្យទៅសាច់ញាតិយកទៅធ្វើបុណ្យតាមប្រពៃណី ។
លោកអធិការរងនគរបាលក្រុងសួង បញ្ជាក់ថា រហូតមកដល់ព្រឹកថ្ងៃទី២៣ ធ្នូ សមត្ថកិច្ចបានចុះទៅឆែកកាមេរ៉ាសុវត្ថិភាពដែលស្ថិតនៅមុខផ្ទះរបស់ប្រជាពលរដ្ឋ គ្រាន់តែឃើញរថយន្តនោះខ្មៅៗមិនច្បាស់ស្លាកលេខទាល់តែសោះ តែទោះបីជាយ៉ាងណាសមត្ថកិច្ចនឹងខិតខំស្វែងរករថយន្តបង្កហេតុបន្ថែមទៀត ដើម្បីចាប់យកមកផ្តន្ទាទោសតាមច្បាប់ ៕
ចែករំលែកព័តមាននេះ