ចាំបានទេ! លោក ណាំ ប៊ុណ្ណារ័ត្ន វិលមកវិញហើយ ជាមួយនឹងការអបអរពីអ្នកគាំទ្រ
- ភ្នំពេញ
អតីតតារាចម្រៀងលោក ណាំ ប៊ុណ្ណារ័ត្ន បានវិលមកកាន់អាជីពសិល្បៈរបស់ខ្លួនឡើងវិញហើយ បន្ទាប់ពីខកខានអស់រយៈពេលជាច្រើនឆ្នាំមកនេះ
រាជធានីភ្នំពេញ ៖ អតីតតារាចម្រៀងលោក ណាំ ប៊ុណ្ណារ័ត្ន បានវិលមកកាន់អាជីពសិល្បៈរបស់ខ្លួនឡើងវិញហើយ បន្ទាប់ពីខកខានអស់រយៈពេលជាច្រើនឆ្នាំមកនេះ។ យ៉ាងណា ការវិលមករកក្បាលមេក្រូរបស់លោក ណាំ ប៊ុណ្ណារ័ត្ន នាពេលនេះ គឺលោកមិនបានទៅណាឆ្ងាយពីផលិតកម្មចាស់ឡើយ ពោលគឺលោកមកជ្រកនៅផលិតកម្មថោនដដែល។
ការវិលត្រឡប់មករកអាជីពរបស់លោកនាពេលនេះ គេសង្កេតឃើញថា លោកនៅតែទទួលបានការសាទរ និងគាំទ្រពីសំណាក់ប្រិយមិត្តជាច្រើនដដែល បើទោះបីជាលោកបានបាត់មុខមួយខ្យល់ធំក៏ដោយ។
ផលិតកម្មថោន បានប្រកាសពីការវិលត្រឡប់របស់លោក ណាំ ប៊ុណ្ណារ័ត្ន កាលពីពេលថ្មីនេះនៅលើផេកហ្វេសប៊ុកផ្លូវការរបស់ខ្លួន ដោយអមជាមួយនឹងបទចម្រៀងទីមួយរបស់តារាចម្រៀងរូបនេះ ដែលមានចំណងជើងថា «បិទទំព័រសេដ»។
ការប្រកាសពីការវិលត្រឡប់នេះ បានធ្វើអោយមហាជន ជាពិសេសបណ្តាអ្នកគាំទ្ររូបលោកជាច្រើនបានសម្តែងការសប្បាយរីករាយ និងនៅតែសរសើរពីទឹកដមសម្លេងរបស់លោកថា នៅតែរក្សានៅភាពដើម ខណៈពេលមានទស្សនិកជនក៏បានជជីកសួរពីការបាត់មុខរបស់លោក ណាំ ប៊ុណ្ណារ័ត្ន ផងដែរ។ ទោះជាយ៉ាងណា លោក ណាំ ប៊ុណ្ណារ័ត្ន នៅមិនទាន់ឃើញមានការឆ្លើយតបណាមួយចំពោះការសាកសួរពីអ្នកគាំទ្ររូបលោកនៅឡើយទេ។
ជាការកត់សម្គាល់ ក្រោយពីបានបង្ហោះខ្លឹមសារបទចម្រៀងខ្លីរបស់លោក ណាំ ប៊ុណ្ណារ័ត្ន ពីផលិតកម្មថោននៅលើបណ្តាញសង្គមត្រឹមរយៈពេលប្រមាណ២៤ម៉ោងតែប៉ុណ្ណោះ គេឃើញមានអ្នកចូលស្តាប់៤៥k ទៅហើយ។ ទាំងនេះបង្ហាញថា បទចម្រៀងរបស់លោកនៅតែមានការនិយមស្តាប់ និងគាំទ្រពីសំណាក់យុវវ័យដដែល បើទោះបីជាលោកអាក់ខានមិនបានចេញបទចម្រៀងថ្មីៗអស់រយៈពេលប៉ុន្មានឆ្នាំនេះក៏ដោយ។
លោក ណាំ ប៊ុណ្ណារ័ត្ន ធ្លាប់បានចាប់ឈោងភាពល្បីល្បាញគួរសមក្នុងអាជីពចម្រៀងរបស់លោកកាលពីជិត១០ឆ្នាំមុន ក្នុងពេលដែលបទចម្រៀងរបស់លោកទទួលបានការគាំទ្រច្រើនពីសំណាក់យុវវ័យ។ ទោះជាយ៉ាងណា ក្រោយពីចាប់ឈោងភាពល្បីល្បាញក្នុងសិល្បៈចម្រៀងមួយរយៈមក លោក ណាំ ប៊ុណ្ណារ័ត្ន បានបាត់មុខឈឹងពីអាជីពមួយនេះ ដោយមិនដឹងមូលហេតុ។ ទើបតែរយៈពេលចុងក្រោយនេះប៉ុណ្ណោះ ដែលឃើញបានឃើញលោកម្តងម្កាលនៅក្នុងការងារសិល្បៈ ក្នុងពេលដែលលោកបានកសាងគ្រួសារ ដោយបច្ចុប្បន្នលោកទទួលបានចំណងដៃកូន២រួចហើយ។
កន្លងមក បើទោះបីជាលោកខកខានមិនបានចេញបទចម្រៀង និងឡើងច្រៀងតាមឆាកតន្ត្រីនានាក៏ពិតមែន ប៉ុន្តែតារាចម្រៀងរូបនេះ ក៏ហាក់មិនទៅណាឆ្ងាយពីការងារសិល្បៈនេះដែរ ពោលគឺលោកនៅតែនិពន្ធបទចម្រៀងថ្មីៗសម្រាប់តារាចម្រៀងមួយចំនួនច្រៀងដាក់បញ្ចូលក្នុងខ្សែភាពយន្តជាបន្តបន្ទាប់ផងដែរ។ ទោះជាយ៉ាងណា គេរំពឹងថា ការវិលមកវិញពីតារាចម្រៀងម្ចាស់បទ «ម៉ែ» លោក ណាំ ប៊ុណ្ណារ័ត្ន នាពេលនេះ នៅតែទទួលបានជោគជ័យ និងការគាំទ្រពីសំណាក់យុវវ័យដដែល៕
ចែករំលែកព័តមាននេះ