ខេត្តប៉ៃលិន ៖ ដើម្បីបង្កើន និងជួយសម្រួលសេដ្ឋកិច្ចគ្រួសារ ក្រៅពីធ្វើស្រែបង្កបង្កើនផលស្រូវ កសិកមួយចំនួនបានដាំដំណាំបន្ទាប់បន្សំ ដែលជាផ្នែកមួយជួយទ្រទ្រង់ដល់សេដ្ឋកិច្ចប្រចាំថ្ងៃ បើទោះបីដឹងថា ទិន្នផល
ខេត្តប៉ៃលិន ៖ ដើម្បីបង្កើន និងជួយសម្រួលសេដ្ឋកិច្ចគ្រួសារ ក្រៅពីធ្វើស្រែបង្កបង្កើនផលស្រូវ កសិកមួយចំនួនបានដាំដំណាំបន្ទាប់បន្សំ ដែលជាផ្នែកមួយជួយទ្រទ្រង់ដល់សេដ្ឋកិច្ចប្រចាំថ្ងៃ បើទោះបីដឹងថា ទិន្នផលដែលប្រមូលបានមក មិនប្រាកដប្រជាលើទីផ្សារក៏ដោយ តែក៏គ្រាន់បើជាងទុកដីទំនេរចោលដែរ។ ជាក់ស្ដែង កសិករមួយគ្រួសាររស់នៅប៉ៃលិន បានដាំស្វាយកែវរមៀតប្រមាណជាង១ពាន់ដើម ដោយទទួលបានផលជិត១០០តោនលក់ឲ្យឈ្មួញនាំចេញទៅប្រទេសជិតខាង ក្នុងតម្លៃជាង១ពាន់រៀលក្នុង១គីឡូក្រាម ។
អ្នកស្រី ទុយ ធា អាយុ៤៤ឆ្នាំ រស់នៅភូមិ បឌិននៀវ សង្កាត់ប៉ៃលិន ក្រុងប៉ៃលិន រៀបរាប់ថា គាត់បានដាំស្វាយកែវរមៀតចំនួន២ចម្ការ សរុបទៅជាង១ពាន់ដើម គឺដាំនៅភូមិបហ៊ុយជើង សង្កាត់បយ៉ាខា ក្រុងប៉ៃលិន ចំនួនជាង៥០០ដើម និងដាំនៅភូមិអូររអិល ឃុំស្ទឹងកាច់ ស្រុកសាលាក្រៅ ជាង៦០០ដើម ។ នៅពេលប្រមូលផលម្ដងៗ អ្នកស្រីទទួលបានជិត១០០តោន លក់ឲ្យឈ្មួញកណ្ដាលនាំទៅប្រទេសថៃ ។
អ្នកស្រីនិយាយថា ៖ « ខ្ញុំបានដាំស្វាយកែវរមៀតរយៈពេលជិត១០ឆ្នាំហើយ ដោយបានប្រមូលផលកាលពីប៉ុន្មានថ្ងៃមុននេះ លក់ឱ្យឈ្មួញបានជាង៧០តោន ដោយក្នុង១គីឡូក្រាម ខាងឈ្មួញខ្មែរទិញតម្លៃ១១បាត (ប្រាក់ថៃ) ស្មើនឹងជាង១ពាន់រៀល ដើម្បីយកលក់បន្តទៅប្រទេសថៃ តាមច្រកទ្វារអន្តរជាតិព្រំ ។ ស្វាយកែវរមៀតរបស់ខ្ញុំមានលក្ខណៈធំថ្លោសល្អ ព្រោះដាំនៅលើដីមានជីជាតិ ដោយ១ផ្លែមានទម្ងន់ជិត១គីឡូក្រាមឯណោះ ហើយផ្លែតូចជាងគេមានទម្ងន់ប្រហែលកន្លះគីឡូក្រាមដែរ » ។
អ្នកស្រីបន្ដថា ស្វាយដែលអ្នកស្រីដាំនៅភូមិបហ៊ុយជើងនេះ ទើបតែផ្លែបានរយៈពេល២ឆ្នាំនេះទេ និងចាប់ផ្ដើមបេះលក់ជាបណ្តើរៗហើយ បើសរុបទាំងអស់បានប្រហែលជា១០០តោន ។
អ្នកស្រីអះអាងថា ៖ « ផ្លែស្វាយនៅក្នុងចម្ការខ្ញុំគ្រាន់តែដាក់អ័រម៉ូនឱ្យផ្កាប៉ុណ្ណោះ ក្រោយមកទុកឱ្យផ្លែតាមធម្មជាតិ ដោយមិនបានបាញ់ថ្នាំពង្រីកផ្លែ ឬធ្វើឱ្យផ្លែល្អស្រស់នោះឡើយ ក្រែងប៉ះពាល់ដល់សុខភាពអ្នកទិញយកទៅទទួលទាន » ។
ដោយឡែក ឈ្មួញនាំចេញផ្លែស្វាយកែវរមៀតម្នាក់ឈ្មោះ ដុំ មុំ ភេទស្រី អាយុ៣០ឆ្នាំ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ បានឱ្យដឹងថា របរដើរម៉ៅទិញផ្លែស្វាយយកទៅលក់បន្តនៅប្រទេសថៃ ជួបផលវិបាកខ្លះ ព្រោះត្រូវបង់ឲ្យសមត្ថកិច្ចដែលប្រចាំការនៅច្រកទ្វារអន្តរជាតិព្រំ បើទោះបីជារាជរដ្ឋាភិបាលប្រកាសថា មិនយកពន្ធនាំចេញផលិតផលកសិកម្មក៏ដោយ ក៏ត្រូវបង់សេវាដែរ។ អ្នកស្រីថា ៖ « ការនាំចេញផ្លែស្វាយទៅប្រទេសថៃ គឺអត់ដឹកតាមរថយន្តនោះទេ ព្រោះបង់សេវានៅច្រកទ្វារអន្តរជាតិព្រំមានតម្លៃខ្ពស់ ។ ដូច្នេះ ខ្ញុំសុខចិត្តដឹកតាមម៉ូតូវិញ ព្រោះបង់សេវាតិចៗ អាចសល់ប្រាក់មួយចំនួន » ។
អ្នកស្រីបញ្ជាក់ថា ៖ « ទីផ្សារផ្លែស្វាយខ្មែរនៅក្នុងទឹកដីថៃ មានតម្លៃទៅតាមប្រភេទ បើផ្លែល្អអាចលក់បាន១គីឡូក្រាមតម្លៃ១៥ទៅ២០បាត តែបើផ្លែអត់ល្អទេ គឺលក់បានថ្លៃត្រឹមតែ១២ទៅ១៣បាតប៉ុណ្ណោះ ។ ប៉ុន្តែផ្លែស្វាយរបស់កសិករខាងលើសម្បូរគឺល្អច្រើន ដូច្នេះ ការលក់ដូរក៏មានតម្លៃខ្ពស់ផងដែរ » ។
គួររំឭកថា ផ្លែស្វាយកែវរមៀតខ្មែរបច្ចុប្បន្នបាននាំចេញទៅប្រទេសចិន ថៃ និងវៀតណាមជាដើម ដែលក្នុង១ឆ្នាំៗបាននាំចេញរាប់ម៉ឺនតោន ហើយនៅពេលខាងមុខ នឹងធ្វើការនាំចេញទៅប្រទេសកូរ៉េខាងត្បូងផងដែរ ។
បើតាមប្រធានសមាគមស្វាយកំពង់ស្ពឺ លោកអិុន ឆៃវ៉ាន បាននិយាយថា ស្វាយកែវរមៀតកំពុងតែមានការគាំទ្រនៅលើទីផ្សារបរទេស ហើយសមាគមកំពុងជំរុញប្រជាកសិករដាំស្វាយ ដើម្បីទទួលយកអ្វីដែលជាបច្ចេកទេសផលិតឲ្យស្របនឹងគុណភាពស្តង់ដាផងដែរ។ លោកថា ៖ « ថ្ងៃអនាគត សមាគមរំពឹងថា ការនាំចេញនឹងអាចកើនរហូតដល់៥០ម៉ឺនតោន ខណៈជាក់ស្តែង យើងទទួលបានតែ៣០ម៉ឺនតោន ហើយទំហំផ្ទៃដីដាំស្វាយកំពង់ស្ពឺបច្ចុប្បន្នមានចំនួន៤៥.០០០ហិកតា និងអាចកើនឡើងរហូតដល់៦ម៉ឺនហិកតានាពេលអនាគត » ។
លោក អិុន ឆៃវ៉ាន បញ្ជាក់ថា ៖ «គិតពីខែកញ្ញា ឆ្នាំ២០១៥ រហូតដល់ខែឧសភាឆ្នាំនេះ សមាគមបាននាំចេញស្វាយចំនួន៣០ម៉ឺនតោន ទាំងស្វាយខុសរដូវ និងស្វាយត្រូវរដូវ»៕
ចែករំលែកព័តមាននេះ