ខេត្តប៉ៃលិន ៖ កសិករដែលប្រកបរបរដាំដំឡូងមីបានព្រួយបារម្ភ និងរអ៊ូររទាំយ៉ាងខ្លាំង ដោយសារដំឡូងមីនៅឆ្នាំ២០១៦នេះ មាន ការធ្លាក់ចុះតម្លៃយ៉ាងគំហុក ដែលធ្វើឱ្យប៉ះពាល់ដល់ជីវភាពរស់នៅប្រចាំថ្ងៃរបស់ពួកគាត់ ។ ម្យ៉ាងវិញទៀត ដំឡូងមីស្រស់ដែលពួកគាត់ បានដឹកទៅលក់នៅឯប្រទេសថៃ តាមច្រកអន្តរជាតិព្រំជារៀងរាល់ឆ្នាំ រហូតមកដល់ឆ្នាំនេះ ត្រូវខាងភាគីថៃហាមមិនឱ្យនាំចូលទៅលក់នៅប្រទេសគេ ដោយអនុញ្ញាតឱ្យនាំចូលតែដំឡូងមីស្ងួត ឬកែច្នៃទៅជាម្សៅមីរួចប៉ុណ្ណោះ ។
បើតាមប្រភពពីឈ្មួញកណ្តាលជាច្រើននាក់រស់នៅក្នុងខេត្តប៉ៃលិនបានឱ្យដឹងដូចៗគ្នាថា រៀងរាល់ឆ្នាំពួកគាត់បានទិញដំឡូងមីពីប្រជាពលរដ្ឋទាំងស្រស់ទាំងស្ងួត រួចដឹកបន្តទៅលក់នៅប្រទេសថៃ ដោយមិនមានការហាមឃាត់អ្វីនោះទេ គ្រាន់តែបង់ប្រាក់ឱ្យថ្លៃក្បា លរថយន្តឱ្យខាងភាគីខ្មែរ និងភាគីថៃនោះជាការស្រេច ។ ប៉ុន្តែនៅឆ្នាំនេះ ពិតជាមានការលំបាក ព្រោះខាងភាគីថៃ គេហាមដាច់ខាតមិននាំដំឡូងមីស្រស់នៅប្រទេសរបស់គេទេ ដោយអនុញ្ញាតតែចំណិតដំឡូងមីស្ងួត និងកំណត់ទម្ងន់ថែមទៀត បើលើសទម្ងន់ត្រូវគេផាកពិន័យ និងដកហូតយករថយន្តផងដែរ ។
មូលហេតុទាំងអស់ខាងលើនេះហើយ ដែលនាំឱ្យតម្លៃដំឡូងមីកាន់តែចុះថោកទៅៗ ។ ម្យ៉ាងវិញទៀត ការទិញដំឡូងមីស្រស់ពីកសិករ ត្រូវទម្លាក់ថ្លៃចុះថោក ព្រោះថ្លៃឈ្នួលកម្មករកាប់ចិញ្ច្រាំ ថ្លៃហាល ថ្លៃចូលម៉ាស៊ីនឡសំងួត និងថ្លៃដឹកជញ្ជូនផ្សេងៗទៀត ។
ប្រភពដដែលបានបញ្ជាក់ទៀតថា ពួកគាត់សុំឱ្យអាជ្ញាធរពាក់ព័ន្ធ ប្រចាំច្រកទ្វារអន្តរជាតិព្រំ មេត្តាជួយសម្របសម្រួល និងរកដំណោះស្រាយជួយពួកគាត់ឱ្យបាននាំដំឡូងមីស្រស់ចូលទៅលក់ដូរនៅទីផ្សារប្រទេសថៃ ព្រោះខាងភាគីខ្មែរយើងនាំចូលទៅប្រទេសថៃ មានតែកសិផលបន្តិចបន្តួចប៉ុណ្ណោះ ដូចជាពោត បណ្តែក ដំឡូងមី ផ្លែស្វាយ និងកសិផលផ្សេងៗមួយចំនួនទៀតតាមរដូវកាលប៉ុ ណ្ណោះ រីឯខាងភាគីថៃវិញ បាននាំទំនិញចូលមកខាងខ្មែរយើងជារៀងរាល់ថ្ងៃ ដូចជាគ្រឿងដែក ស៊ីម៉ង់តិ៍ សម្ភារប្រើប្រាស់កសិកម្មឧស្សាហកម្មគ្រប់ប្រភេទ ជាពិសេសគឺគ្រឿងឧបភោគបរិភោគដឹកចូលរាប់សិបតោនក្នុង១ថ្ងៃៗ តែមិនត្រូវបានភាគីខ្មែរមានការផ្អាក ឬចាត់ វិធានការទៅខាងភាគីថៃឡើយ ។
ពាក់ព័ន្ធនឹងបញ្ហានេះ លោក សុខ សាវុធ ប្រធានការិយាល័យច្រកទ្វារអន្តរជាតិព្រំ បានឱ្យដឹងថា ខាងច្រករបស់លោកបើក ឱ្យនាំចូលនាំចេញជាធម្មតា សំខាន់គឺត្រូវមានឯកសារត្រឹមត្រូវទៅតាមផ្លូវច្បាប់ ។ ចំណែកឯការហាមមិនឱ្យនាំដំឡូងមីស្រស់ចូលទៅលក់ដូរនៅប្រទេសថៃ នោះមិនមាននោះទេ ។ រីឯការនាំផលិតផលចូលមកពីប្រទេសថៃ ក្នុង១ថ្ងៃៗមានប៉ុន្មានតោននោះ ខាងលោកក៏មិនដឹងច្បាស់ដែរ ។
ជាមួយគ្នានេះដែរលោក សុខ សាធីម ប្រធានមន្ទីរពាណិជ្ជកម្មខេត្តប៉ៃលិន បានឱ្យដឹងថា បញ្ហាដំឡូងមីស្រស់ដែលគេហាម ឃាត់មិនឱ្យនាំចូលទៅលក់ដូរនៅប្រទេសថៃនោះ ព្រោះប្រទេសទាំងពីរធ្លាប់ធ្វើចុះអនុសារណៈយោគយល់រវាងខេត្តជាប់ព្រំដែនទាំងពីរ ដោយហាមមិនឱ្យនាំយកដំឡូងមីស្រស់ចូលទៅលក់នៅប្រទេសថៃឡើយ ដោយចង់ឱ្យកសិករខ្មែរយើងមានការងារធ្វើ ដូចជាការចិញ្ច្រាំ ដំឡូងមីហាល ឬកែច្នៃទៅជាម្សៅមីរួចរាល់ ទើបអាចនាំទៅលក់ដូរនៅទីនោះបាន ៕
ចែករំលែកព័តមាននេះ