ខេត្តកំពង់ឆ្នាំង ៖ ក្នុងឱកាសទៅចូលរួមមហោស្រពបង្ហើរខ្លែងខ្មែរ លើកទី២០ កាលពីថ្ងៃទី១៤ ខែធ្នូ ឆ្នាំ២០១៦នេះ មន្ទីរវប្បធម៌ និងវិចិត្រសិល្បៈ ខេត្តកំពង់ឆ្នាំង បានទទួលចំណាត់ថ្នាក់លេខ១ ទូទាំងប្រទេស។ នេះជាមោទនៈភាពសម្រាប់ខេត្ត ក៏ដូចជាសម្រាប់មន្ត្រីនៃមន្ទីរ និងអ្នកខេត្តកំពង់ឆ្នាំងផងដែរ។
លោកស្រី នូ ពុទ្ធធឿន ប្រធានការិយាល័យ អភិវឌ្ឍន៍វប្បធម៌ នៃមន្ទីរវប្បធម៌ និងវិចិត្រសិល្បៈខេត្ត បានរៀបរាប់ពីកត្តា ដែលធ្វើឲ្យការបង្ហើរខ្លែងឯកទូទាំងប្រទេស ខេត្តកំពង់ឆ្នាំងឈានទៅរកភាពជោគជ័យ ទទួលបានចំណាត់ថ្នាក់លេខ១ទូទាំងប្រទេសមានដូចជា ទី១-ខ្លែងហោះបានល្អ ទី២-សំឡេងឮ ហើយពីរោះ និងឆ្លងឆ្លើយគ្នាបានល្អ ទី៣-គំនូរ សោភ័ណភាព រំលេចទៅដោយ អត្តសញ្ញាណរបស់ខេត្ត មានដូចជានិមិត្តសញ្ញាឆ្នាំង រូបភ្នំក្រាំងដីមាស និងទេសភាព និងទី៤- រួមផ្សំសម្លៀកបំពាក់ របៀបជាប្រពៃណីបុរាណ មានខោចែវ ក្រវាត់ក្រមាចង្កេះ ចំណែកស្រីៗស្លៀកហូល និងពាក់អាវយឺត ដែលក្រសួងផ្តល់ឲ្យ។
លោកស្រីក៏បានអំពាវនាវដល់បងប្អូនប្រជាពលរដ្ឋខ្មែរទាំងអស់ឲ្យជួយគាំទ្រ ចំពោះខ្លែងខ្មែរយើងដែលធ្លាប់មានតាំងពីបុរាណកាលមក ។ ជាមួយគ្នានេះដែរ លោកស្រី ប្រធានការិយាល័យ អភិវឌ្ឍន៍វប្បធម៌ នៃមន្ទីរវប្បធម៌ និងវិចិត្រសិល្បៈខេត្ត ក៏បានបញ្ជាក់ទៀតថា កាលពីថ្ងៃទី៥ ខែវិច្ឆិកា ឆ្នាំ២០១៥ ក្នុងឱកាសទៅចូលរួមមហោស្រព ប្រឡងមុខម្ហូបអាហារខ្មែរថ្នាក់ជាតិដែលមាន១៨ ខេត្តក្រុងចូលរួម ខេត្តកំពង់ឆ្នាំង ក៏ទទួលបានចំណាត់ថ្នាក់លេខ១ ផងដែរ ខាងបង្អែមគឺត្រប៉ែស។
កាលណោះ ត្រប៉ែ ខេត្តកំពង់ឆ្នាំងមានឈ្មោះ(ត្រប៉ែស្រែថ្មី)។ ចំណែកមុខម្ហូប ២មុខទៀត មិនទទួលបានចំណាត់ទេ កាលណោះ វិញ្ញាសា គឺសម្លទំពាំង។ ខេត្តកំពង់ឆ្នាំងបានស្លទំពាំងដោយដាក់ ឈ្មោះថា(សម្លប្រហើរទំពាំងព្រៃ អណ្តូងឬស្សី ភ្នំក្រាំងដីមាស) និងម្ហូបមួយមុខទៀតប្រចាំតំបន់ គឺឈ្មោះ (ប្រហុកអាំងព្រៃខ្មែរ )។ នេះជាមោទនភាព ដែលគ្រាន់តែរយៈពេលខុសគ្នា ២០ថ្ងៃ មន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានទទួលជ័យលាភីលេខ១ លើ២វិញ្ញាសា ទី១គឺមុខម្ហូប ផ្នែកបង្អែម និងទី២ បានជ័យលាភីលេខ១ លើវិញ្ញាសា បង្ហើរខ្លែងឯក៕
ចែករំលែកព័តមាននេះ