រាជធានីភ្នំពេញ ៖ ធនាគារជាតិនៃកម្ពុជា ហៅកាត់ថា NBC បានជំរុញឲ្យគ្រឹះស្ថានមីក្រូហិរញ្ញវត្ថុនានាបង្កើនការប្រើប្រាស់ប្រាក់រៀលនៅក្នុងការទូទាត់សាច់ប្រាក់របស់ខ្លួន ដើម្បីលើកកម្ពស់ឧត្តមភាពរូបិយប័ណ្ណជាតិ ។
យោងតាមសេចក្តីប្រកាសរបស់ធនាគារជាតិនៃកម្ពុជា (NBC) ដែលបានចេញផ្សាយកាលពីថ្ងៃទី១ ធ្នូ ធនាគារនេះបានតម្រូវឲ្យគ្រឹះស្ថានមីក្រូហិរញ្ញវត្ថុ (MFI) ទាំងអស់ត្រូវមានផលបត្រកម្ចី១០ភាគរយជារូបិយប័ណ្ណក្នុងស្រុក ដែលជាវិធានការដើម្បីជំរុញឲ្យមានការប្រើប្រាស់ប្រាក់រៀល ។ ប្រកាសដែលអនុវត្តចំពោះតែ MFI បានចូលជាធរមានចាប់តាំងពីដើមខែនេះ ហើយគ្រឹះស្ថានមីក្រូហិរញ្ញវត្ថុទាំងអស់មានរយៈពេល៣ឆ្នាំ រហូតដល់ឆ្នាំ២០១៩ ដើម្បីអនុវត្តឲ្យបានពេញលេញនូវគោលនយោបាយនេះ ។
ការផ្តល់ឥណទានជារូបិយវត្ថុជាតិ ត្រូវមានចែងនៅក្នុងយុទ្ធសាស្ត្រ និងគោលនយោបាយរបស់គ្រឹះស្ថាន ហើយ NBC អាចតម្រូវឲ្យMFI បង្កើនការផ្តល់ឥណទានជារូបិយវត្ថុជាតិបន្ថែមទៀតស្របតាមការចាំបាច់ ។
លោក ស៊ីម សេនាជាតិ អគ្គនាយកគ្រឹះស្ថានមីក្រូហិរញ្ញវត្ថុប្រាសាក់ បានថ្លែងថា ៖ « ពីមុនមកមានការផ្តល់ឥណទានជាប្រាក់រៀលច្រើនជាងដុល្លារ ។ ប៉ុន្តែក្រោយមក យើងពិបាករកឥណទានជាលុយរៀល និងមានអត្រាការប្រាក់ថ្លៃ ទើបយើងខ្ចីឥណទានភាគច្រើនពីបរទេសជាប្រាក់អឺរ៉ូ និងប្រាក់ដុល្លារ ។ អត្រាទូទាត់ឥណទាននៅប្រាសាក់មានប្រមាណ៥ភាគរយជាប្រាក់រៀល ។ ប៉ុន្តែយើងរំពឹងនឹងប្រើប្រាស់ប្រាក់រៀលបានច្រើនជាងមុន ដោយសារបច្ចុប្បន្ននេះ ធនាគារជាតិនៃកម្ពុជាបានលក់លុយខ្មែរច្រើន » ។
លោកបន្តថា ៖ « ការប្រើប្រាស់ប្រាក់រៀល វាជាការលើកកម្ពស់អត្តសញ្ញាណជាតិ ផ្ទុយទៅវិញ បើយើងពឹងផ្អែករូបិយប័ណ្ណបរទេសច្រើន វាធ្វើឲ្យសេដ្ឋកិច្ចរបស់យើងងាយរងផលប៉ះពាល់ នៅពេលប្រាក់របស់គេមានបញ្ហា ព្រោះយើងពឹងផ្អែកលើគេ ។ បច្ចុប្បន្ន ប្រជាជនយើង កាន់តែមានទំនុកចិត្តលើប្រាក់រៀលច្រើនជាងមុន ដោយសារអត្រាប្តូរប្រាក់របស់យើងមានស្ថិរភាពល្អ » ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ជាគោលការណ៍ រាជរដ្ឋាភិបាលចង់បន្ថយការប្រើប្រាស់ប្រាក់ដុល្លារនៅកម្ពុជា ។ ដូច្នេះ វិធានការដាក់ចេញដោយធនាគារជាតិនៃកម្ពុជា ជារឿងមួយក្នុងចំណោមរឿងជាច្រើន ដើម្បីជំរុញការប្រើប្រាស់ប្រាក់រៀលក្នុងសេដ្ឋកិច្ចជាតិ។ ប្រទេសនីមួយៗចង់ប្រើប្រាស់លុយខ្លួនឯង ដូចប្រទេសមួយ មានធម្មនុញ្ញមួយ ។ ដូច្នេះ ការធ្វើសន្សឹមៗ កុំបង្ខំគេ គេជឿមិនជឿ ជារឿងអន្តរកាល តែបើគិតពីផលប្រយោជន៍ជាតិយូរអង្វែងកម្ពុជាត្រូវប្រើប្រាស់ប្រាក់រៀល ។
លោកបណ្ឌិតបន្តថា ៖ « វិធានការនេះជារឿងល្អ និងកំពុងដើរលើផ្លូវត្រឹមត្រូវដើម្បីផលប្រយោជន៍ប្រទេសយើងទៅថ្ងៃក្រោយ និងជាមូលដ្ឋានសម្រាប់កសាងគ្រឹះសេដ្ឋកិច្ចជាតិ។ ដើម្បីឲ្យគេជឿទុកចិត្តលើប្រាក់របស់យើងទាល់តែយើងធ្វើ និងត្រូវខិតខំប្រឹងប្រែងបន្តទៀត » ៕
ចែករំលែកព័តមាននេះ