រាជធានីភ្នំពេញ ៖ មតិជាច្រើនលើកឡើងថា រោងភាពយន្តលុច្សហាក់នៅមិនទាន់កែប្រែធ្វើភាពយន្តឲ្យទំនើបទាន់សម័យនៅឡើយ ។ រោងកុនលុច្សមិនមែនគ្មានលទ្ឋភាពកែលម្អទេ តែចង់រក្សាទុកអ្វីដែលជារបស់ចំណាស់ ហើយកែប្រែ ខ្លះៗប៉ុណ្ណោះ ។
រោងភាពយន្តដ៏ល្បីដែលកើតឡើងក្នុងអំឡុងសម័យអាណានិគមនិយមបារាំង គឺរោងកុនលុច្ស បានក្លាយជារោងកុនបែបបុរាណតែមួយគត់នៅកម្ពុជាដែលបើកដំណើរការរហូតមកដល់បច្ចុប្បន្ន ។ បើទោះបីជាបំពាក់ឧបករណ៍បច្ចេកវិទ្យាទំនើបចុងក្រោយក្តី ក៏រោងភាពយន្តនេះមិនផ្លាស់ប្តូររូបរាងឡើយ ដើម្បីបន្តអភិរក្ស និងចូលរួមគាំទ្រវិស័យភាពយន្តខ្មែរ ។
ការលើកឡើងនេះក្រោយពីរោងភាពយន្តលុច្សដែលចំណាស់ជាងគេនៅកម្ពុជារៀបចំទីតាំងអង្គុយ បច្ចេកវិទ្យាសំឡេង និងម៉ាស៊ីនចាក់បញ្ចាំងឲ្យដើរទាន់រោងភាពយន្តទំនើបដូចរោងភាពយន្តនៅតាមបណ្តាប្រទេសក្នុងតំបន់ ។ អ្វីដែលគេចាប់អារម្មណ៍ គឺរោងភាពយន្តនេះបានក្លាយជាទីកន្លែងរំលឹកអនុស្សាវរីយ៍របស់គូស្នេហ៍វ័យចំណាស់ជាច្រើន ។
អ្នកគ្រប់គ្រងរោងភាពយន្តលុច្សបញ្ជាក់កាលពីពេល ថ្មីៗកន្លងមកថា ដោយសារតែការស្រឡាញ់ចូលចិត្ត និងចង់លើកតម្កើងតម្លៃសិល្បៈភាពយន្តខ្មែរ និងចង់ទុករោងភាពយន្តនេះជាទីកន្លែងរំលឹកអនុស្សាវរីយ៍សម្រាប់អ្នកធ្លាប់មើលភាពយន្តកន្លងមក ទើបមិនដាច់ចិត្តវាយកម្ទេចរោងភាពយន្តនេះធ្វើជាទីតាំងអាជីវកម្ម ផ្សេងៗ។ រោងភាពយន្តនេះបើកដំណើរការចាប់តាំងពីឆ្នាំ១៩៣៨មក ហើយធ្លាប់ចាក់បញ្ចាំងខ្សែភាពយន្តខ្មែរ ល្បីៗពីអតីតកាលរហូតដល់បច្ចុប្បន្ន ។ អ្វីដែលកាន់តែធ្វើឲ្យពិបាកនឹងសម្រេចចិត្តបិទរោងភាពយន្តនេះ គឺកន្លងមកមានគូស្នេហ៍វ័យចំណាស់ជាច្រើនបានធ្វើដំណើរមកមើលភាពយន្តដើម្បីរំលឹកពីអនុស្សាវរីយ៍គ្រាដែលពួកគាត់នៅកំលោះក្រមុំ ។ រោងភាពយន្តលុច្សត្រូវបានចាត់ទុកថា ជាទីកន្លែងសម្រាប់អភិរក្ស និងជាបេតិកភណ្ឌមួយមិនគួរមើលរំលង ពិសេសរោងភាពយន្តនេះបានជួយលើកតម្កើងមុខមាត់ភាពយន្តខ្មែរដែលជាក់ស្តែងភាពយន្តខ្មែរដ៏ល្បីចុងក្រោយគឺរឿង«កំណត់ហេតុនាងនាថ» ត្រូវចាក់បញ្ចាំងនៅរោងភាពយន្តនេះចាប់តាំងពីថ្ងៃទី២៤ ខែវិច្ឆិកាមក ។
លោកចាន់ណា រ៉ូណាន់ ផលិតករខ្សែភាពយន្តរឿង «កំណត់ហេតុនាងនាថ» បញ្ជាក់ថា លោកសម្រេចចិត្តជ្រើសរើសរោងភាពយន្តលុច្សសម្រាប់ចាក់បញ្ចាំងលោកព្រោះតែលោកយល់ថា រោងភាពយន្តនេះនៅតែទទួលបានការគាំទ្រច្រើនពីទស្សនិកជនគ្រប់ស្រទាប់វណ្ណៈ។ អ្វីដែលពិសេសគឺរោងភាពយន្តនេះតែងស្វាគមន៍នូវរាល់ស្នាដៃផលិតរបស់កូនខ្មែរដែលជាចំណែកជួយដល់ផលិតករក៏ដូចជាមុខមាត់ខ្សែភាពយន្តខ្មែរ។ ក្រៅពីជារោងភាពយន្តចំណាស់នៅកម្ពុជា រោងភាពយន្តលុច្សបានបំពាក់ឧបករណ៍ទំនើបទាន់សម័យទាំងទីតាំង និងសំឡេងមិនចាញ់រោងភាពយន្តទំនើបនៅនានានៅកម្ពុជា និងបណ្តាប្រទេសក្នុងតំបន់ទេ។ ការរួមចំណែកចាក់បញ្ចាំងខ្សែភាពយន្តនៅរោងភាពយន្តលុច្សនឹងបន្តជួយគាំទ្រ អភិរក្ស និងអភិវឌ្ឍរោងភាពយន្តបុរាណចុងក្រោយនៅកម្ពុជាឲ្យបន្តមានជីវិតសម្រាប់កូនខ្មែរជំនាន់ក្រោយបាន និងបានស្គាល់ ហើយលោកជឿជាក់ថា ខ្សែភាពយន្តរបស់លោកនឹងទទួលបានការគាំទ្រច្រើនពីទស្សនិកជននៅពេលចាក់បញ្ចាំង ៕
ចែករំលែកព័តមាននេះ