រាជធានីភ្នំពេញ ៖ នៅទីបំផុត លោក សុវណ្ណ រិទ្ធី ហៅតាវ៉ិចទ័រ និងក្រុមកំប្លែងនាយ ពាក់មី បានស្វែងរកទ្រនំថ្មីសម្រាប់ជ្រកកោនហើយ បន្ទាប់ពីលោក និងក្រុមកំប្លែងទាំងមូលបានសម្រេចចាកចេញពីស្ថានីយទូរទស្សន៍ស៊ីធីអិន ទីដែលពួកគេធ្លាប់ផ្តើមអាជីពសិល្បៈអស់រយៈពេលជាច្រើនឆ្នាំមកនេះ។
យ៉ាងណា ជំរកថ្មីដែលលោក សុវណ្ណ រិទ្ធី និងក្រុមកំប្លែងមកជ្រកកោននាពេលដែលនោះ គឺមិនមែនស្ថិតនៅក្រោមស្ថានីយទូរទស្សន៍ថ្មីណាមួយឡើយ ពោលគឺជាក្រុមហ៊ុនឯកជនមួយដែលមានបទពិសោធន៍ផលិតស្ពតពាណិជនកម្មធំៗ សម្រាប់ស្ថានីយទូរទស្សន៍ក្នុងស្រុកនានា។
អតីតអ្នករៀបចំកម្មវិធីកំសាន្តរបស់ស្ថានីយទូរទស្សន៍ស៊ីធីអិន លោក សុវណ្ណ រិទ្ធី ហៅតាវ៉ិចទ័រ បានលើកឡើងប្រាប់កោះសន្តិភាពតាមសារអេឡិចត្រូនិចថា កន្លែងថ្មីដែលលោក និងក្រុមកំប្លែងនឹងចាប់ផ្តើមការងារថ្មីនោះ គឺជាក្រុមហ៊ុនឯកជនឈ្មោះ MSA ជាក្រុមហ៊ុនផ្សព្វផ្សាយពាណិជ្ជកម្ម នៅតាមទូរទស្សន៍ និងផលិតស្ពតនានា។
លោកបញ្ជាក់ថា លោក និងក្រុមកំប្លែងទាំងអស់បានចុះកុងត្រានៅទីនេះ រយៈពេលច្រើនឆ្នាំ សម្រាប់ផលិតកម្មវិធីកំសាន្ត ដូចដែលលោកធ្លាប់បានធ្វើនៅស៊ីធីអិនដូច្នេះដែរ ខណៈពេលដែលរូបលោក និងក្រុមកំប្លែងបានតៀមរួចរាល់ហើយ សម្រាប់ដំណើរការការងារនៅទីនេះ។
យ៉ាងណា បើតាមលោក សុវណ្ណ រិទ្ធី សម្រាប់ការងារសម្តែងនៅតាមប៉ុស្តិ៍ទូរទស្សន៍ថ្មីណាមួយនោះ រូបលោកមិនអាចសម្រេចធ្វើដោយខ្លួនឯងបានឡើយ ពោលគឺលោកត្រូវការសម្រេចពីអ្នកដឹកនាំថ្មីនៅទីនោះជាមុនសិន ព្រោះលោក និងក្រុមកំប្លែងបានសម្រេចចុងកុងត្រាជាមួយក្រុមហ៊ុនរួចហើយ។
ដោយឡែកពាក់ព័ន្ធទៅនឹងការងារដឹកនាំសម្តែងរឿង «ពីរគ្រួសារ» និងការសម្តែងរបស់លោកនូវភាពយន្តសំណើចដែលមានចំណងជើងថា «រឿងខ្ញុំអញ្ចឹង» នៅស្ថានីយទូរស្សន៍ស៊ីធីអិ នាពេលកន្លងមកនោះ លោកបញ្ជាក់ថា រឿងទាំងពីរនេះ គឺជាកម្មវិធីរបស់ស៊ីធីអិន ហើយស្ថានីយបានចាត់ចែងអ្វីថ្មីទៀតនោះ លោកមិនដឹងឡើយ ដោយសារលោកបានចាកចេញពីទីនេះហើយ។
ទោះជាយ៉ាងណាលោក សុវណ្ណ រិទ្ធី ហៅតាវ៉ិច ទ័រ ក៏នៅតែថ្លែងអំណរគុណដល់ក្រុមហ៊ុន CBS នៃស្ថានីយទូរទស្សន៍ស៊ីធីអិន មិនបានផ្តល់ឱកាសការងារអោយលោក និងក្រុមកំប្លែង ហើយបានផ្តល់ឱកាសឲ្យរូបលោកបានបណ្តុះបណ្តាលបងប្អូនជាច្រើន អោយមានប្រជាប្រីយ និងមានជីវភាពធូរធារហូតដល់ថ្ងៃនេះ។
ជាការកត់សម្គាល់ ក្រោយពីការចាកចេញពីស្ថានីយទូរទស្សន៍ស៊ីធីអិនពីលោក សុវណ្ណ រិទ្ធី ហៅតាវ៉ិចទ័រ តារាកំប្លែងនាយ ពាក់មី និងក្រុមកំប្លែងទាំងអស់នោះមក គេសង្កេតឃើញអ្នកគ្រប់គ្រងថ្មីរបស់ស៊ីធីអិន បានចាប់ផ្តើមកែប្រែដោយបានដាក់ជំនួសនូវអ្នកដឹកនាំកម្មវិធីថ្មី និងបន្ថែមតារាថ្មីៗមួយចំនួនផងដែរ។
ក្នុងនោះកម្មវិធីសំណើចតាមភូមិដែលធ្លាប់ដឹកនាំដោយលោកតាវ៉ិចទ័រ ត្រូវបានជំនួសដោយលោក ដួង សុខគា ហើយពេលពិធីករថ្មីដែលធ្លាប់ជានាយ ពាក់មី នោះ ក៏ត្រូវបានជំនួសដោយលោក សុខគា និងពិធីការិនីគឺស្រីពីន ខណៈពេលដែលកម្មវិធី «បាទមេ» ដែលសម្តែងដោយនាយ ពាក់មី ក៏ត្រូវបានជំនួសដោយលោក ប៉ែន ចំរ៉ុង ក្រោមការដឹកនាំថ្មីពីពិធីការិនីចាស់វស្សាគឺអ្នកនាង យុគ្គ ចិន្តា ៕
ចែករំលែកព័តមាននេះ