នៅទីបំផុត គណៈកម្មការបានសម្រេចជ្រើសរើសបេក្ខជនផ្លូវការចំនួន៣រូបប៉ុណ្ណោះ សម្រាប់ឈរឈ្មោះដើម្បីបោះឆ្នោតជ្រើសរើសជាប្រធានសមាគមសិល្បករខ្មែរអាណត្តិថ្មី ។
បេក្ខភាព៣រូបនោះ រួមមានអតីតតារាសម្តែងលោកជំទាវ អ្នកឧកញ៉ា ស្រីតូច ចំណាន , លោក គួចខេវិន អ្នករៀបចំកម្មវិធីកម្សាន្តតាមទូរទស្សន៍ និងលោក ផាត់ តារារដ្ឋ ប្រធានគ្រួសារតារាកម្ពុជា ។ បេក្ខភាពទាំង៣រូបខាងលើនេះនឹងត្រូវអង្គបោះឆ្នោតដែលជាអ្នកសិល្បៈជាច្រើនរូប បោះឆ្នោតជ្រើសរើសជាប្រធានសមាគមសម្រាប់អាណត្តិថ្មី ដែលគ្រោងធ្វើឡើងនៅថ្ងៃទី២ ខែឧសភា ឆ្នាំ២០២៣ ខាងមុខនេះ នៅសាលសន្និសីទចតុមុខ ។
បេក្ខជន លោក ផាត់ តារារដ្ឋ បានអះអាងប្រាប់កោះសន្តិភាព តាមសារអេឡិចត្រូនិចថា គណៈកម្មការរៀបចំការបោះឆ្នោតបានសម្រេចចុងក្រោយជ្រើសរើសបេក្ខជនទាំង៣រូបនេះ ក្រោយពីបានបំពេញគ្រប់លក្ខខណ្ឌត្រឹមត្រូវ ។
លោកបញ្ជាក់ថា តាមពិតមានបេក្ខជនជាច្រើនបានដាក់ពាក្យសម្រាប់ឈរឈ្មោះជាប្រធានសមាគមសិល្បករខ្មែរ ប៉ុន្តែបេក្ខជនមិនបានបំពេញគ្រប់លក្ខខណ្ឌ និងឯកសារបានទាន់ពេលវេលា ។
លោកបន្តថា លក្ខខណ្ឌរបស់សមាគមនាឆ្នាំនេះ គឺមិនសំដៅលើសិល្បករដែលល្បីនោះឡើយ ពោល គឺអ្នកសិល្បៈនោះមានលទ្ធភាព និងសមត្ថភាពគ្រប់គ្រាន់សម្រាប់ដឹកនាំ ខណៈពេលលក្ខខណ្ឌឆ្នាំនេះមានភាពតឹងរឹងជាងបណ្តាឆ្នាំមុនៗ។
យ៉ាងណាបើតាមលោក ផាត់ តារារដ្ឋ ការសម្រេចដាក់ពាក្យឈរឈ្មោះជាបេក្ខភាពប្រធានសមាគមសិល្បៈករខ្មែររបស់លោកនាពេលនេះ គឺលោកមិនសំដៅយកចាញ់ឈ្នះជាមួយលោកជំទាវ ស្រីតូច ចំណាន នោះឡើយ ពោល គឺលោកគ្រាន់តែចង់អោយមានប្រវត្តិមួយសម្រាប់ខ្លួនឯង ដែលធ្លាប់ដឹកនាំអ្នកសិល្បៈដែលមានស្នាដៃមួយរូបដែរ ៕
ចែករំលែកព័តមាននេះ