រាជធានីភ្នំពេញ ៖ លោកហ៊ុន ម៉ាណែត តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នៅក្នុងពិធីប្រគល់សញ្ញាបត្របញ្ចប់ការសិក្សានិស្សិតថ្នាក់បរិញ្ញាបត្របច្ចេកវិទ្យា និងបច្ចេកទេសជាន់ខ្ពស់ជំនាន់ទី១-ជំនាន់ទី៨ នៃវិទ្យាស្ថានពហុបច្ចេកវិទ្យាកម្ពុជា កាលពីថ្ងៃទី៦ ធ្នូ បានមានប្រសាសន៍ថា ក្រៅពីប្រើប្រាស់សម្ភារឧបទ្ទេស ក្រៅពីការបង្រៀន និស្សិតខ្មែរបានបង្កើតស្នាដៃស្រាវជ្រាវបច្ចេកទេសទំនើបៗជាច្រើន ដែលត្រូវបានដាក់បង្ហាញ ហើយទទួលលទ្ធផលល្អទាំងក្នុងនិងក្រៅប្រទេស ដែលនេះគឺជាមោទនភាពនៃសមត្ថភាពយុវជន និងការផលិតរបស់ប្រជាពលរដ្ឋខ្មែរនៅក្នុងវិស័យបច្ចេកវិទ្យានិងវិស័យផ្សេងៗទៀត។
ឧទាហរណ៍ជាក់ស្តែងវិមានសន្តិភាព គឺជាស្នាដៃវិស្វកម្មរបស់កូនខ្មែនិងស្នាដៃជាច្រើនទៀត។ លោកបន្តថា ក្រោមម្លប់នៃសន្តិភាព វិស័យទេសចរណ៍នៅកម្ពុជាមានការកើនឡើងប្រមាណជិត៥លាននាក់ ដោយសារប្រទេសកម្ពុជាជាប់ចំណាត់ថ្នាក់លេខ១ ដែលជាទីកន្លែងគួរចង់មកទស្សនា(ប្រាសាទអង្គរវត្ត)និងមានប្រជាជនមានអត្តចរិតរួសរាយរាក់ទាក់ ។
លោកក៏បានបន្ថែមថា វិស័យសេដ្ឋកិច្ចមានការរីកចម្រើនដែលត្រូវបានគេចាត់ទុកជាប្រទេសជាប់ចំណាត់ថ្នាក់ជាប្រទេសមានកំណើនសេដ្ឋកិច្ចលឿនជាងគេ ក្នុងចំណោមបណ្តាប្រទេសដទៃទៀត ដែលមានសេដ្ឋកិច្ចលូតលាស់នៅលើពិភពលោក ដែលធ្វើឱ្យប្រជាជន រស់នៅក្នុងជីវភាពធូរធា និងបានធ្វើឱ្យធ្វើឱ្យយុវជនរស់នៅក្នុងសេចក្តីសង្ឃឹម និងបង្កឱកាសគ្រប់បែបយ៉ាងដល់យុជនចូលរួមអភិវឌ្ឍសង្គម។
លោកបន្តថា យុវជនម្នាក់តំណាងឱ្យអនាគតមួយ ក្នុងការកសាងអនាគតគ្រួសារមួយដ៏ប្រសើរ ហើយយុវជន គឺជាសសរទ្រូងរបស់ប្រទេសជាតិ ក្នុងការចូលរួមអភិវឌ្ឍប្រទេសជាតិ ។
ចែករំលែកព័តមាននេះ