ខេត្តកំពង់ឆ្នាំង ៖ ចាប់បានហើយ អ្នកចូលចិត្តលួចយកសំរាមទៅដាក់ចោលនៅង្គោលភ្លើងសួនច្បារវិមានឯករាជ្យជារៀងរាល់យប់នោះ គឺជាអ្នកលក់នំប៉័ងនៅជិតសាលានយោបាយខេត្ត ស្ថិតក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំង ដែលការចាប់អ្នកអត់មាយាទនេះ ធ្វើឡើងនៅវេលាម៉ោង០៩ និង៣០នាទីយប់ថ្ងៃទី៣០ វិច្ឆិកា ខណៈបុគ្គលនោះកំពុងយកសំរាមទៅដាក់ទីនោះ
ខេត្តកំពង់ឆ្នាំង ៖ ចាប់បានហើយ អ្នកចូលចិត្តលួចយកសំរាមទៅដាក់ចោលនៅង្គោលភ្លើងសួនច្បារវិមានឯករាជ្យជារៀងរាល់យប់នោះ គឺជាអ្នកលក់នំប៉័ងនៅជិតសាលានយោបាយខេត្ត ស្ថិតក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំង ដែលការចាប់អ្នកអត់មាយាទនេះ ធ្វើឡើងនៅវេលាម៉ោង០៩ និង៣០នាទីយប់ថ្ងៃទី៣០ វិច្ឆិកា ខណៈបុគ្គលនោះកំពុងយកសំរាមទៅដាក់ទីនោះទៀត ។
លោកឆាយ ខែមរ័ត្ន អធិការនគរបាលឱ្យដឹងថា ស្ត្រីដែលយកសំរាមទៅដាក់ក្នុងសួនច្បារកង្រីនៅជិតវិមានឯករាជ្យ ឈ្មោះយក់ ថាវី អាយុ៤៥ឆ្នាំ មានទីលំនៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ។
លោកបន្តថា កន្លងទៅ ២-៣ថ្ងៃជាប់គ្នាមកហើយ នៅរាល់យប់គឺមានជនពុំស្គាល់មុខ យកសំរាមច្រកក្នុងថង់ និងការ៉ុង មកដាក់នៅបង្គោលភ្លើងសួនច្បារនាងកង្រី លុះព្រឹកឡើងទើបឃើញ ។ ដែលករណីនេះ ត្រូវមានការរិះគន់ខ្លាំងថា សមត្ថកិច្ចមិនអើពើពីបញ្ហានេះ ហើយលោកក៏បានដាក់កម្លាំងឃ្លាំមើលតែម្តង ។
ស្រាប់តែនៅម៉ោងជិត១០យប់ ក៏មានស្ត្រីខាងលើ រួមនិងកូនចៅជិះម៉ូតូអូសរ៉ឺម៉កមានប្រដាប់ប្រដាលក់ដូរផង ដែលទើបចេញពីកន្លែងលក់ដូរ បានមកឈប់នៅជាប់សួនច្បារកង្រី ហើយលើកយកថង់សំរាមទៅដាក់នឹងបង្គោលភ្លើងជាថ្មីម្តងទៀត ។ ភ្លាមនោះ កម្លាំងសមត្ថកិច្ចក៏បានចាប់ភ្លាមៗ នាំមកសាកសួរ ។
ក្រោយការសាកសួរ ស្ត្រីខាងលើបានសារភាពនូវទោសកំហុសរបស់ខ្លួន ហើយត្រូវសមត្ថកិច្ចបានឱ្យធ្វើកិច្ចសន្យាបញ្ឈប់សកម្មភាពនេះ ហើយក៏ឱ្យវិលត្រឡប់ទៅផ្ទះវិញ ។
គួរបញ្ជាក់ដែរថា បន្ទាប់ពីជនពុំស្គាល់មុខ លួចដាក់សំរាមនៅកន្លែងខាងលើ សមត្ថកិច្ចនគរបាលតែងជួលរ៉ឺម៉កម៉ូតូដឹកសំរាមយកទៅចោលជារៀងរាល់ព្រឹក ទើបដាក់កម្លាំងចាំឃ្លាំមើល រហូតចាប់បានតែម្តង ។
ចែករំលែកព័តមាននេះ