រាជធានីភ្នំពេញ ៖ គិតមកដល់ឆ្នាំ២០១៦ ធនធានហិរញ្ញវត្ថុត្រូវបានផ្ទេរឲ្យរដ្ឋបាលឃុំ-សង្កាត់បានកើនឡើងជិត១២ដង បើប្រៀបធៀបនឹងធនធានហិរញ្ញវត្ថុដែលបានផ្ទេរក្នុងឆ្នាំ២០០២ ។ នៅក្នុងរយៈពេលជាង១៤ឆ្នាំកន្លងមកនេះ ធនធានហិរញ្ញវត្ថុមានសរុបប្រមាណជាង៥០០លានដុល្លារអាមេរិកត្រូវបានផ្ទេរឲ្យរដ្ឋបាលឃុំ-សង្កាត់ ។ នេះបើតាមការបញ្ជាក់របស់លោក ជា ចាន់តូ ទេសាភិបាលធនាគារជាតិនៃកម្ពុជា ។
ថ្លែងនៅក្នុងពិធីផ្សព្វផ្សាយគោលនយោបាយអភិវឌ្ឍន៍ឃុំ-សង្កាត់ ឆ្នាំ២០១៧-២០២០ នាព្រឹកថ្ងៃទី២៧ វិច្ឆិកា កន្លងទៅ លោកទេសាភិបាលបានលើកឡើងថា ឥឡូវនេះ ថ្នាក់មូលដ្ឋានឃុំ-សង្កាត់មានលទ្ធភាពគ្រប់គ្រាន់ បន្ទាប់ពីមានការកែទម្រង់រដ្ឋបាលថ្នាក់ក្រោមជាតិ ហើយនៅក្នុងនោះថ្នាក់ក្រោមជាតិ ក៏មានអាទិភាពជាច្រើនទៀតផងដែរ រួមទាំងប្រព័ន្ធកសាងផែនការអភិវឌ្ឍន៍ កម្មវិធីវិនិយោគ ការគ្រប់គ្រងហិរញ្ញវត្ថុ និងការងារអាទិភាពមួយចំនួនទៀត ។
លោកថ្លែងថា ៖ « យោងតាមធនធានហិរញ្ញវត្ថុដែលបានផ្ទេរឲ្យរដ្ឋបាលឃុំ-សង្កាត់កន្លងមក បានកើនឡើងជារៀងរាល់ឆ្នាំ គិតមកដល់ឆ្នាំ២០១៦ គឺកើនឡើងជិត១២ដង បើធៀបនឹងធនធានហិរញ្ញវត្ថុបានផ្ទេរក្នុងឆ្នាំ២០០២ ។ នៅក្នុងរយៈពេលជាង១៤ឆ្នាំកន្លងមកនេះ ធនធានហិរញ្ញវត្ថុមានសរុបប្រមាណជាង៥០០លានដុល្លារអាមេរិកត្រូវបានផ្ទេរឲ្យរដ្ឋបាលឃុំ-សង្កាត់ » ។ ក្រៅពីនេះ ក៏មានការកៀរគរធនធានពីដៃគូអភិវឌ្ឍន៍សង្គមស៊ីវិល សប្បុរសជន និងការចូលរួមនានាពីសហគមន៍នៅមូលដ្ឋានជាច្រើនរយលានដុល្លារទៀតផង ។
តាមរយៈធនធានហិរញ្ញវត្ថុទាំងនេះ បានធ្វើឲ្យឃុំ-សង្កាត់មានលទ្ធភាពក្នុងការផ្ដល់សេវាសាធារណៈ និងការអភិវឌ្ឍហេដ្ឋារចនាសម្ព័ន្ធជនបទរាប់ពាន់គម្រោងក្នុងមួយឆ្នាំៗ ដូចជា ការកសាងផ្លូវជនបទ ស្ពាន អណ្ដូងទឹក ស្រះទឹក ប្រព័ន្ធធារាសាស្ត្រ សាលារៀន ប៉ុស្ដិ៍សុខភាព និងការផ្ដល់សេវាសង្គម ដើម្បីឆ្លើយតបតាមតម្រូវការចាំបាច់របស់មូលដ្ឋាន និងប្រជាពលរដ្ឋដែលជាការរួមចំណែកដ៏មានប្រសិទ្ធភាពក្នុងការកាត់បន្ថយភាពក្រីក្ររបស់ប្រជាពលរដ្ឋ ។
លោក ជា ចាន់តូ បានបញ្ជាក់ថា ៖ «គោលនយោបាយអភិវឌ្ឍន៍ឃុំ-សង្កាត់ ឆ្នាំ២០១៧-២០២០ មានគោលដៅសំខាន់ គឺដើម្បីអភិវឌ្ឍឃុំ-សង្កាត់ ដែលត្រូវបានកសាងឡើងដោយឈរលើមូលដ្ឋានពិតជាក់ស្ដែងនៃការរីកចម្រើនរបស់សង្គម ព្រមទាំងជាការឆ្លើយតបចំពោះសំណូមពរធំៗទៀតនៅក្នុងដំណើរការបន្តអភិវឌ្ឍន៍ឃុំ-សង្កាត់ និងការលើកស្ទួយកម្រិតជីវភាពរស់នៅរបស់ប្រជាពលរដ្ឋតាមបណ្ដាមូលដ្ឋានឲ្យកាន់តែរីកចម្រើនថែមទៀត » ៕
ចែករំលែកព័តមាននេះ