រាជធានីភ្នំពេញ ៖ កម្លាំងនគរបាលអន្តោប្រវេសន៍នៃក្រសួងមាហាផ្ទៃ សហការជាមួយកម្លាំងនគរបាលការិយាល័យអន្តោប្រវេសន៍រាជធានីភ្នំពេញ និងមានការសម្របសម្រួលលោកសៀង សុខ ព្រះរាជអាជ្ញារងអមសាលាដំបូង បានចុះត្រួតពិនិត្យការស្នាក់នៅនិងបំពេញការងាររបស់ជនបរទេស នៅតាមបណ្តាហាងកាហ្វេ ផ្ទះម៉ាស្សា និងផ្ទះជួលមួយចំនួន ដោយបានឃាត់ខ្លួនជនជាតិវៀតណាមប្រុស-ស្រីចំនួន១៦នាក់(ស្រី១០នាក់) ក្នុងទឹកដីខណ្ឌចំការមន ។
ប្រតិបត្តិការនេះ ធ្វើឡើងកាលពីវេលាម៉ោង០៣ និង៣០នាទីរសៀលថ្ងៃទី២៨ វិច្ឆិកា នៅតាមបណ្តាហាងកាហ្វេ ផ្ទះម៉ាស្សា និងផ្ទះជួលមួយចំនួន ដែលមានទីតាំងនៅតាមបណ្តោយផ្លូវលេខ២៧៨ និងផ្លូវលេខ២៨០ ក្នុងសង្កាត់បឹងកេងកងទី២ ខណ្ឌចំការមន រាជធានីភ្នំពេញ។
ជនជាតិវៀតណាមប្រុស-ស្រីសរុបចំនួន១៦នាក់ ក្នុងនោះមានស្រី១០នាក់ ដែលកំពុងតែលួចចូលមកស្នាក់នៅ និងបំពេញការងារដោយគ្មានលិខិតស្នាមអ្វីទាំងអស់ និងពួកគេក៏ប្រឈមទៅនឹងការអនុវត្តន៍ចាប់ ដោយរង់ចាំធ្វើការបណ្តេញចេញ ។
ក្រោយពីត្រួតពិនិត្យការស្នាក់នៅ និងបំពេញការងាររបស់ជនជាតិវៀតណាមប្រុសស្រីទាំង១៦នាក់ ត្រូវបានឃាត់ខ្លួនយកទៅកាន់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដែលមានទីតាំងនៅទល់មុខ និងអាកាសយានដ្ឋានអន្តរជាតិភ្នំពេញ ដើម្បីរង់ចាំធ្វើការបណ្តេញចេញ។
ចែករំលែកព័តមាននេះ