ខេត្តតាកែវ ៖ រយៈពេលជាង១ខែកន្លងទៅនេះ ឈ្មួញកណ្តាលខ្មែរបានដើរប្រមូលទិញស្រូវពីតាមបណ្តាខេត្តនានាដឹកយកមកលក់ឱ្យឈ្មួញវៀតណាមនៅតាមច្រករបៀងនានាក្នុងខេត្តតាកែវរាប់ម៉ឺនតោន ។ ទោះបីជាច្រករបៀងទាំងអស់ត្រូវបានរដ្ឋាភិបាលបញ្ជាឱ្យអាជ្ញាធរគ្រប់ខេត្ត-ក្រុងបិទយ៉ាងណាក៏ដោយ តែសម្រាប់ខេត្តតាកែវពុំមានច្រកណាមួយត្រូវបិទទៅតាមបទបញ្ជានោះនៅឡើយទេ ។
លោក ញឹម ស្រ៊ន ប្រធានមន្ទីរកសិកម្មរុក្ខាប្រមាញ់ និងនេសាទខេត្តបានឱ្យដឹងថា រយៈពេលជាង១ខែមកនេះគិតត្រឹមថ្ងៃទី១៦ តុលា ដល់ថ្ងៃទី១៦ វិច្ឆិកា កន្លងមកនេះ អាជីវករខ្មែរបានប្រមូលទិញស្រូវនៅតាមបណ្តាខេត្តនានាមកលក់ទៅឱ្យឈ្មួញវៀតណាមតាមព្រំដែនច្រកខេត្តតាកែវ មានចំនួន៥៥.៩៨៩តោន តាមច្រក៤ស្រុកក្នុងនោះ តាមកំពង់ទូកកំពង់អំពិល ស្រុកបុរីជលសា មានចំនួន៧.១៧៥តោន ស្រុកអង្គរបុរី តាមច្រកកំពង់ទូក អង្គរបុរី មានចំនួន១២.៦២៣តោន តាមច្រកក្នុងស្រុកគិរីវង់ មានច្រកប្រឡាយព្រែកតាម៉ៅ និងច្រករបៀងដើមត្នោតក្នុងឃុំភ្នំដិន ចំនួន២៨.៧៣២តោន ស្រុកកោះអណ្តែតច្រករបៀងដើមដូង ៧.៤៦២តោន ក្នុងនោះស្រូវក្រអូប១គីឡូក្រាមតម្លៃ៩៥០រៀល អុីអ៊ែរ១គីឡូក្រាម៧៣០រៀល ។
ដោយឡែកស្រុកអង្គរបុរី រថយន្តដឹកស្រូវចូលមកដល់លើកស្រូវចូលទូករួចដឹកចេញតាមស្ទឹងបាក់ដៃ រីឯនៅស្រុកបុរីជលសារថយន្តដឹកមកដល់កំពង់ទូក កំពង់អំពិល ហើយលើកស្រូវដាក់ទូកដឹកតាមស្ទឹងរួចចេញតាមច្រករបៀងឆែ១ រីឯស្រុកកោះអណ្តែតដឹកចេញតាមច្រករបៀងដើមដូង និងដឹកតាមប្រឡាយ៩២ ។
តាមច្រកផ្លូវគោកឬកំពង់ទូកនេះ គឺអាជ្ញាធរយកលុយថ្លៃកំពង់ទូកតែប៉ុណ្ណោះ តែចំណែកស្រូវចុះតាមច្រកនៅស្រុកគិរីវង់វិញ សមត្ថកិច្ចប៉ូលិសបានឱ្យដឹងថា ចំពោះតួលេខខាងមន្ទីរកសិកម្ម វាខុសទៅនឹងចំនួនស្រូវដែលបាននាំចេញទៅលក់នៅវៀតណាម ។ នៅស្រុកគិរីវង់មាន២ច្រកប្រឡាយព្រែកតាម៉ៅ ទូកវៀតណាមមួយទូកអាចផ្ទុកស្រូវបានចំនួន១០រថយន្តយីឌុប ហើយ១ថ្ងៃដឹកចេញពី២ទៅ៣ទូក និង១ទូកយន្តត្រូវបង់លុយដល់សមាគមប្រឡាយទឹកចំនួន១០ម៉ឺនរៀល រីឯការនាំចេញតាមច្រកប្រឡាយព្រែកតាម៉ៅនេះត្រូវបាននាំេចញចំនួន២សប្តាហ៍ ស្រូវរាប់សិបពាន់តោនត្រូវបាននាំចេញ ។
បន្ទាប់ពីទឹកបានស្រក រថយន្តដឹកស្រូវទាំងអស់បានដឹកមកតាមផ្លូវខាងជើងច្រកភ្នំដិនទៅលក់នៅវៀតណាមតាមច្រករបៀងដើមត្នោតវិញម្តង តែដោយទឹកទើបតែស្រក ផ្លូវរងការខូចខាតយ៉ាងដំណំធ្វើឱ្យរថយន្តដឹកស្រូវរងការកកស្ទះរាប់សិបគ្រឿងមួយថ្ងៃៗ ។
ម្ចាស់រថយន្តដឹកស្រូវទៅលក់នៅច្រកដើមត្នោតនេះ បាននិយាយបែបរិះគន់ថា ពេលរថយន្តដឹកស្រូវមកដល់ខាងជើងភ្នំដិនគ្រប់រថយន្តដឹកស្រូវទាំងអស់ត្រូវបង់លុយ១ម៉ឺនរៀលសម្រាប់អាជ្ញាធរឃុំនិងស្រុក, ស្នាក់ការអាវុធហត្ថភ្នំដិន១រថយន្ត១ម៉ឺនរៀលដែរ, ថ្លៃផ្លូវរថយន្ត២ម៉ឺនរៀល, ដល់ប៉ូលិសដើមត្នោត១ម៉ឺនរៀល និងប៉ុស្តិ៍ទាហាន១ម៉ឺនរៀល សរុបការចំណាយខុសច្បាប់នៅលើទឹកដីខ្មែដល់សមត្ថកិច្ចនិងអាជ្ញាធរអស់៦ម៉ឺនរៀល និងចំណាយថ្លៃរថយន្តដឹកស្រូវចូលដល់ដីវៀតណាមមួយលើកទៀត ត្រូវបង់១រថយន្ត៣ម៉ឺនរៀល ដូច្នេះសរុបការចំណាយ ទាំងនៅលើទឹកដីខ្មែរ និងដីវៀតណាមអស់ចំនួន៩ម៉ឺនរៀល ៕
ចែករំលែកព័តមាននេះ